មេធាវីការពារក្ដីឱ្យក្រុមយុវជនខ្មែរថាវរៈ៥នាក់ បានស្នើទៅសាលាឧទ្ធរណ៍ឱ្យដោះលែងកូនក្ដីលោកនៅក្រៅឃុំ ដោយថា កូនក្ដីលោកទាំងអស់នឹងបង្ហាញខ្លួនគ្រប់នីតិវិធីរបស់តុលាការ ប៉ុន្តែលោកថា តំណាងអយ្យការទាមទារទៅចៅក្រមនៃតុលាការជាន់ខ្ពស់នេះឱ្យរក្សាសេចក្ដីសម្រេចរបស់តុលាការថ្នាក់ទាប។
លោក សំ ចំរើន មេធាវីការពារក្តីឱ្យក្រុមយុវជនខ្មែរថាវរៈចំនួន៥នាក់ បានប្រាប់វីអូឌីនៅថ្ងៃនេះថា សវនាការនៅសាលាឧទ្ធរណ៍បានបើកសវនាការនៅព្រឹកថ្ងៃនេះ ដើម្បីពិចារណាលើបណ្ដឹងជំទាស់របស់ក្រុមយុវជនខ្មែរថាវរៈដែលទាមទារសុំនៅក្រៅឃុំ បន្ទាប់ពីសាលាដំបូងរាជធានីភ្នំពេញបានបដិសេធកន្លងមកនោះ។
ក្រុមយុវជនខ្មែរថាវរៈ រួមមាន លោក ថា ឡាវី, កើត សារ៉ាយ, ព្រហ្ម មុន្នី, អេង ម៉ាឡៃ, មួង សុភ័ក្ត្រ ត្រូវបានសមត្ថកិច្ចចាប់ខ្លួនជាបន្តបន្ទាប់ ជុំវិញការតវ៉ាទាមទារឱ្យដោះលែងមេដឹកនាំសហជីព លោក រ៉ុង ឈុន ដែលត្រូវបានចាប់ខ្លួនកាលពីចុងខែកក្កដាកន្លងមក ជុំវិញការថ្លែងថា ពលរដ្ឋកម្ពុជានៅក្នុងខេត្តត្បូងឃ្មុំ បានបាត់បង់ដីស្រែចម្ការរបស់ពួកគេ ក្រោយការបោះបង្គោលព្រំដែនកម្ពុជា-វៀតណាម។
លោក សំ ចំរើន បានប្រាប់ថា គ្មានកូនក្ដីលោកណាម្នាក់មានវត្តមានក្នុងបន្ទប់សវនាការនៅសាលាឧទ្ធរណ៍នៅព្រឹកថ្ងៃនេះទេ ដោយលោកថា មន្ត្រីពន្ធនាគារមិនបានបញ្ជូនពួកគេទៅចូលរួមក្នុងសវនាការឡើយ ដោយសារមិនបានទទួលដីកាបង្គាប់ឱ្យចូលខ្លួន។
មេធាវីរូបនេះបានឱ្យដឹងថា លោកបានស្នើទៅចៅក្រមសាលាឧទ្ធរណ៍ឱ្យពិចារណានិងសម្រេចដោះលែងកូនក្ដីលោកទាំង៥នាក់ឱ្យនៅក្រៅឃុំ ដោយលោកថា កូនក្ដីលោកប្ដេជ្ញាចូលរួមនៅគ្រប់ដំណាក់កាលនៃនីតិវិធីរបស់តុលាការ។
លោក សំ ចំរើន មានប្រសាសន៍ថា៖ «នៅក្នុងច្បាប់ ជនត្រូវចោទត្រូវមានសេរីភាព ទីលំនៅ មុខរបរ ព្រោះពួកគេសន្យាចូលរួមតាមនីតិវិធីរបស់តុលាការ ហើយចំណុចសំខាន់នៅក្នុងមាត្រា២០៥ យើងព្យាយាមបង្ហាញថា យើងមានលក្ខខណ្ឌគ្រប់គ្រាន់ក្នុងការស្នើសុំអនុញ្ញាតនៅក្រៅឃុំបណ្តោះអាសន្ន»។
បើតាមមេធាវីរូបនេះ នៅក្នុងសវនាការព្រឹកមិញនេះ តំណាងអយ្យការ អ្នកស្រី យិន សុគន្ធារី បានជំទាស់នឹងការទាមទារនេះ ហើយបានស្នើទៅចៅក្រមសាលាឧទ្ធរណ៍តម្កល់ដីកាសម្រេចរបស់សាលាដំបូងរាជធានីភ្នំពេញដដែល ដែលបានបដិសេធសំណើសុំនៅក្រៅឃុំបណ្ដោះអាសន្ន ក្រោមហេតុផលថា កុំឱ្យប៉ះពាល់ដល់សណ្តាប់ធ្នាប់សង្គម។
លោក សំ ចំរើន បានឱ្យដឹងទៀតថា សេចក្ដីសម្រេចលើករណីនេះ ត្រូវបានក្រុមប្រឹក្សាជំនុំជម្រះនៃសាលាឧទ្ធរណ៍កំណត់ប្រកាសនៅព្រឹកថ្ងៃសុក្រក្នុងសប្ដាហ៍នេះ។
ក្រុមយុវជនខ្មែរថាវរៈ ត្រូវបានសមត្ថកិច្ចចាប់ខ្លួនកាលពីថ្ងៃទី១៣ ខែសីហា បន្ទាប់ពីពួកគេបានចូលរួមការតវ៉ាជាបន្តបន្ទាប់ ដែលទាមទារឱ្យដោះលែងលោក រ៉ុង ឈុន ប្រធានក្រុមប្រឹក្សាភិបាលសមាគមគ្រូបង្រៀនកម្ពុជាឯករាជ្យ និងជាអតីតសមាជិកជាន់ខ្ពស់មួយរូបរបស់គណៈកម្មាធិការជាតិរៀបចំការបោះឆ្នោតដែលជ្រើសរើសដោយគណបក្សសង្គ្រោះជាតិ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ដែលតាមដានករណីនេះ អះអាងថា ការបន្តឃុំខ្លួនក្រុមយុវជនទាំង៥នាក់នោះ គឺជាការរំលោភសិទ្ធិសេរីភាពមូលដ្ឋានក្នុងការបញ្ចេញមតិ ដោយសារតែពួកគេគ្រាន់តែជួបជុំសម្ដែងមតិតែប៉ុណ្ណោះ។
លោក អំ សំអាត មានប្រសាសន៍ថា៖ «ការសម្រេច វាជាឆន្ទានុសិទ្ធិរបស់តុលាការ ប៉ុន្តែបើសិនជាយើងមើលទិដ្ឋភាពទូទៅ កន្លងមក ទិដ្ឋភាពនៃការរិះគន់ ស្តែងការព្រួយបារម្ភរបស់សហគមន៍អន្តរជាតិ ក៏ដូចជាអ្នកជំនាញផ្នែកសិទ្ធិមនុស្សអង្គការសហប្រជាជាតិ ជាដើម ខ្ញុំគិតថា អ្នកទាំងអស់នោះមិនបាននៅក្រៅឃុំ ក៏ជាបន្ទុកការរិះគន់បន្ថែមទៀតដែរ ទាក់ទងនឹងសេរីភាពជាមូលដ្ឋានរបស់ប្រជាពលរដ្ឋ»៕