ម្ដាយកូនប្រុសអតីតសកម្មជនបក្សប្រឆាំង ស្នើទៅសមត្ថកិច្ចចាប់ខ្លួនជនល្មើសដែលវាយកូនប្រុសរបស់ខ្លួន ខណៈអតីតសកម្មជនបក្សប្រឆាំងម្នាក់ទៀតកំពុងគេចខ្លួន បន្ទាប់ពីជនមិនស្គាល់មុខវាយឱ្យរងរបួសក្នុងថ្ងៃជាមួយគ្នា។
អ្នកស្រី សំ ចិន្តា ភរិយាអតីតប្រធានប្រតិបត្តិគណបក្សសង្គ្រោះជាតិប្រចាំខេត្តកំពង់ឆ្នាំង លោក កែវ ថៃ ដែលកំពុងជាប់ឃុំនៅព្រៃស ប្រាប់វីអូឌីនៅថ្ងៃនេះថា កូនប្រុសរបស់គាត់ត្រូវបានជនមិនស្គាល់អត្តសញ្ញាណបីនាក់វាយនឹងដំបងឈើ បណ្តាលឱ្យបែកក្បាល ត្រូវថ្ពាល់ និងភ្នែក កាលពីល្ងាចថ្ងៃទី១២ ខែធ្នូ ខណៈកំពុងជិះកង់ហាត់ប្រាណតាមផ្លូវជាមួយមិត្តភក្តិ។
អ្នកស្រីបន្តថា កូនប្រុសរបស់គាត់ឈ្មោះ កែវ សុខសិរី ទើបអាយុ១៦ឆ្នាំ មិនដែលមានជម្លោះជាមួយអ្នកណាឡើយកន្លងមក។
អ្នកស្រីថា៖ «សូមឱ្យអាជ្ញាធរជួយរកយុត្តិធម៌ឱ្យកូនគាត់ផង ព្រោះកូនខ្ញុំមិនបានធ្វើអីខុសទេ»។
អ្នកស្រី សំ ចិន្តា បន្តថា គ្រួសារគាត់មិនទាន់ដាក់ពាក្យបណ្ដឹងទៅសមត្ថកិច្ចទេ ព្រោះគាត់បារម្ភពីសុវត្ថិភាពកូន ដោយសារមកដល់ពេលនេះ កូនប្រុសគាត់មិនទាន់បានធូរស្បើយ ខណៈគ្រូពេទ្យកំពុងធ្វើការតាមដានបន្តទៀត។
អ្នកស្រីថា៖ «វាឈឺពេញក្បាលទាំងអស់ គេវាយត្រូវក្បាល ក្បាលហ្នឹង បើនិយាយទៅខ្លាំងមែនទែន វាផតលលាដ៍ហ្នឹងផង ពេទ្យគេកំពុងតាមដានមើល មានឈាមកកក្នុងខួរក្បាលឬអត់ »។
យុវជន ឡា ម៉េងលី ដែលត្រូវជាមិត្តភក្តិ និងជិះកង់ជាមួយជនរងគ្រោះ រៀបរាប់ថា នៅល្ងាចថ្ងៃកើតហេតុ ពួកគាត់ទាំងពីរនាក់បានជិះកង់ហាត់ប្រាណពីផ្ទះ នៅភូមិសាលាឃុំ ឃុំពពេល ទៅភូមិសេះឡាប់ ឃុំឆ្នុកទ្រូ ស្រុកបរិបូណ៌។ យុវជនរូបនេះបន្តថា ពេលជិះកង់ហត់ ពួកគេក៏សម្រាកបន្តិច ស្រាប់តែមានបុរស៣នាក់ ស្ថិតក្នុងស្ថានភាពស្រវឹង ជិះម៉ូតូមកឈប់នៅទីនោះដែរ ហើយក៏វាយជនរងគ្រោះតែម្តង។
លោកថា៖ «វា [ជនបង្ក] ដកបង្គោលរបងវាយ [ជនរងគ្រោះ] អត់ដែលស្គាល់ផង គ្នា៣នាក់ អត់បានឈ្លោះប្រកែកគ្នាអីផង គាត់និយាយតែគាត់ ខ្ញុំនិយាយតែគ្នាខ្ញុំពីរនាក់ ប៉ុន្តែ៣នាក់ហ្នឹង អ្នកដែលវាយមិត្តខ្ញុំ គឺមានតែម្នាក់ទេ»។
វីអូឌី មិនអាចសុំការអត្ថាធិប្បាយពីអធិការនគរបាលស្រុកបរិបូណ៌ លោក ជាង សុវណ្ណារិទ្ធិ បានទេ នៅថ្ងៃនេះ។
ចំណែក អតីតសមាជិកក្រុមប្រឹក្សាសង្កាត់ជាប់ឆ្នោតច្បារអំពៅទី២ រាជធានីភ្នំពេញ លោក ជឿន សារឹម ដែលរងអំពើហិង្សារាងកាយដែរនោះ ប្រាប់វីអូឌីនៅថ្ងៃនេះថា កាលពីល្ងាចម៉ោង៦កន្លះ ថ្ងៃទី១២ ខែធ្នូ មានជនមិនស្គាល់មុខ ជិះម៉ូតូ២គ្រឿង មានគ្នា៤នាក់ និងមានដុំថ្មនិងដំបង បានស្ទាក់ព្រួតគ្នាវាយលោក ត្រូវចំភ្នែក ក្បាល និងខ្នង ខណៈរូបលោកកំពុងរត់ម៉ូតូកង់បីដឹកភ្ញៀវនៅម្ដុំបែកចាន ខណ្ឌពោធិ៍សែនជ័យ។
លោកចាត់ទុកការស្ទាក់ព្រួតគ្នាវាយទៅលើរូបលោកនេះថាជារឿងនយោបាយ ខណៈដែលលោកនិងគ្រួសារមិនដែលមានទំនាស់ជាមួយអ្នកណាពីមុនមកទេ។
លោក ជឿន សារឹម បន្តថា គាត់មិនទាន់ដាក់ពាក្យបណ្ដឹងទៅសមត្ថកិច្ចទេ ដោយសារ បច្ចុប្បន្នលោកនិងគ្រួសារគេចខ្លួនមួយរយៈពេលសិន ដោយបារម្ភសុវត្ថិភាព ខណៈមានជនមិនស្គាល់អត្តសញ្ញាណបានតាមឃ្លាំមើលគ្រួសារគាត់។ លោកស្នើទៅអាជ្ញាធរឱ្យចាប់ខ្លួនជនល្មើសដែលបានវាយលើរូបគាត់និងអតីតសកម្មជនដទៃទៀត មកផ្ដន្ទាទោសតាមច្បាប់។
លោកថថា៖ «ខ្ញុំសូមសំណូមពរឱ្យអាជ្ញាធរវែកមុខជនដៃដល់ដែលប្រព្រឹត្តមកលើខ្ញុំ មិនថាប្រជាពលរដ្ឋធម្មតា មិនថាអតីតសមាជិកបក្សផ្សេងៗ សូមឱ្យគាត់ជួយរកយុត្តិធម៌ជូនប្រជាពលរដ្ឋឱ្យបានទាំងអស់គ្នា ស្មើៗភាពគ្នា»។
កាលពីថ្ងៃទី១៩ ខែតុលា ឆ្នាំ២០២០ អតីតក្រុមប្រឹក្សាខណ្ឌមានជ័យ មកពីគណបក្សសង្រ្គោះជាតិ លោក ឌិន វ៉ារិន ត្រូវជនមិនស្គាល់មុខយកដុំឥដ្ឋវាយចំក្បាល បណ្ដាលឱ្យរងរបួសធ្ងន់ធ្ងរ ប៉ុន្តែគិតមកដល់ថ្ងៃនេះ សមត្ថកិច្ចនៅមិនទាន់ចាប់បានជនល្មើសដែលវាយគាត់នៅឡើយ។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា មានប្រសាសន៍ថា នគរបាលមូលដ្ឋានកំពុងធ្វើការនិងស្រាវជ្រាវចំពោះករណីនេះ ដើម្បីវែកមុខរកអ្នកប្រព្រឹត្ត។
នៅពេលសួរថា តើសំណុំរឿងទាំងអស់នេះមានភាពស្មុគស្មាញអ្វីដែលធ្វើឱ្យសមត្ថកិច្ចពិបាកស្វែងរកជនល្មើសនោះ? លោក សាន សុខសីហា លើកឡើងថា ដោយសារមិនមានភស្តុតាងគ្រប់គ្រាន់ក្នុងការកំណត់អត្តសញ្ញាណជនល្មើស។
លោកថា៖ «ក្នុងអំឡុងពេលហ្នឹង សមត្ថកិច្ចគ្រប់ជំនាញក៏នៅតែបន្តស្រាវជ្រាវនិងស្វែងរកជនបង្កដែរ មិនមែនថា យើងមិនមានការស្វែងរកទេ មានន័យថា គ្រប់ករណីទាំងអស់តែងតែត្រូវបានយកចិត្តទុកដាក់និងស្រាវជ្រាវ ដើម្បីរកជនបង្ក តែលទ្ធភាពកំណត់បានពេលណា យើងពិបាកក្នុងការនិយាយ »។
នាយករងអង្គការលីកាដូ លោក អំ សំអាត ជំរុញទៅអាជ្ញាធរចាត់វិធានការស៊ើបអង្កេតករណីហិង្សា និងចាប់ជនបង្កលើអតីតសកម្មជនជាបន្តបន្ទាប់មកផ្តន្ទាទោសតាមច្បាប់ ដើម្បីកុំឱ្យករណីនេះកើតឡើងពេលក្រោយ និងបញ្ចៀសការរិះគន់ពីប្រជាពលរដ្ឋផងដែរ។
លោកថា៖ «សមត្ថភាពមន្ត្រីនគរបាលយុត្តិធម៌គឺមាន ប៉ុន្តែសំខាន់ត្រង់ថា តើយើងមានឆន្ទៈក្នុងការស្វែងរកយុត្តិធម៌សម្រាប់ពួកគាត់ទាំងអស់គ្នាឱ្យបានប្រាកដប្រជាអត់។ អ៊ីចឹងទាក់ទងបញ្ហាហ្នឹង ទោះបីជាប្រជាពលរដ្ឋឬសកម្មជនដែលមាននិន្នាការគណបក្សនយោបាយណាក៏ដោយ ក៏ត្រូវទទួលកិច្ចគាំពារពីអាជ្ញាធរមានសមត្ថកិច្ចដូចគ្នាដែរ។ បើមានការប្រព្រឹត្តបទល្មើសទៅលើគាត់ អាជ្ញាធរត្រូវចាត់វិធានការតាមផ្លូវច្បាប់ ដើម្បីរកយុត្តិធម៌ជូនជនរងគ្រោះ»។
បើតាមលោក អំ សំអាត ចាប់ពីឆ្នាំ២០១៨ រហូតមកដល់ថ្ងៃទី១៤ ខែធ្នូនេះ សកម្មជននិងមន្ត្រីមូលដ្ឋានអតីតគណបក្សសង្គ្រោះជាតិជាង១០នាក់ហើយដែលត្រូវជនមិនស្គាល់អត្តសញ្ញាណ ប្រើប្រាស់ហិង្សាវាយបណ្ដាលឱ្យរងរបួស៕
