អង្គការឃ្លាំមើលសិទ្ធិមនុស្ស (Human Rights Watch) បានអំពាវនាវទៅរដ្ឋាភិបាលជប៉ុនឱ្យបញ្ឈប់ការផ្ដល់ជំនួយទៅដល់នគរបាលកម្ពុជា ដោយថា ស្ថាប័នមួយនេះបានជាប់ពាក់ព័ន្ធនឹងការរំលោភបំពានសិទ្ធិមនុស្ស។
អង្គការការពារសិទ្ធិមនុស្សអន្តរជាតិមួយនេះ បានអំពាវនាវបែបនេះនៅក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ១ខែក្រោយពីជប៉ុនបានប្រកាសផ្ដល់ជំនួយជិត៣លានដុល្លារមកដល់នគរបាលជាតិកម្ពុជា។
កាលពីថ្ងៃទី៩ ខែវិច្ឆិកា ក្រសួងការបរទេសជប៉ុនបានប្រកាសថា រដ្ឋាភិបាលជប៉ុនបានយល់ព្រមផ្ដល់កម្ចីទំហំ ២៥ពាន់លានយ៉េន ឬប្រហែល ២៤០លានដុល្លារ មកដល់រដ្ឋាភិបាលកម្ពុជាសម្រាប់ឆ្លើយតបនឹងវិបត្តិសុខភាពសាធារណៈ។
បើតាមក្រសួងការបរទេសជប៉ុន ពិធីចុះហត្ថលេខាលើកិច្ចព្រមព្រៀងកម្ចីនេះ ត្រូវបានធ្វើឡើងនៅថ្ងៃទី៦ ខែវិច្ឆិកា រវាងរដ្ឋមន្ត្រីការបរទេសកម្ពុជា លោក ប្រាក់ សុខុន និងអគ្គរាជទូតជប៉ុនប្រចាំនៅរាជធានីភ្នំពេញ លោក ម៉ាសាហ៊ីរ៉ូ មិកាមិ។
ក្រៅពីកម្ចី ជប៉ុនក៏បានជួយជំនួយឥតសំណងទំហំ ៣០០លានយ៉េន ឬប្រហែល ២,៩លានដុល្លារ ទៅនគរបាលជាតិសម្រាប់ពង្រឹងសមត្ថភាពប្រឆាំងភេរវកម្ម តាមរយៈការទិញយានយន្ត និងសម្ភារដទៃទៀតដែលមានបំណងការពារថ្នាក់ដឹកនាំជាន់ខ្ពស់ ជាពិសេសកិច្ចប្រជុំកំពូលមេដឹកនាំអាស៊ាននៅកម្ពុជានៅឆ្នាំ២០២២ខាងមុខ។
នាយករងអង្គការឃ្លាំមើលសិទ្ធិមនុស្ស (HRW) ទទួលបន្ទុកសិទ្ធិមនុស្សតំបន់អាស៊ី លោក ហ្វីល រ៉ូប៊ឺតសុន (Phil Robertson) បាននិយាយក្នុងសេចក្ដីប្រកាសព័ត៌មានថា រដ្ឋាភិបាលជប៉ុនកំពុងតែបង្កហានិភ័យទៅដល់ជីវិតមនុស្ស ជាជាងផ្ដល់ការការពារដល់ពលរដ្ឋកម្ពុជា ដែលបង់ពន្ធឱ្យកម្លាំងនគរបាល។
លោក ហ្វីល រ៉ូប៊ឺតសុន និយាយថា៖ «រដ្ឋាភិបាលជប៉ុនកំពុងបង្កហានិភ័យដល់ជីវិតមនុស្ស ជាជាងផ្ដល់កិច្ចការពារដល់ដល់ពួកគេ តាមរយៈការបង្ហូរលុយរបស់អ្នកបង់ពន្ធទៅឱ្យកម្លាំងនគរបាលកម្ពុជា ដែលជាច្រើនទសវត្សរ៍ហើយ បានបង្ក្រាបយ៉ាងឃោរឃៅទៅលើក្រុមបាតុករអហិង្សា គណបក្សប្រឆាំង និងអ្នកសារព័ត៌មានរិះគន់»។
លោក រ៉ូប៊ឺតសុន និយាយបន្តថា៖ «រដ្ឋាភិបាលជប៉ុនមិនចង់ឃើញសម្ភារដែលពួកគេផ្ដល់ឱ្យ ស្ថិតនៅកន្លែងបង្ក្រាបរបស់នគរបាលនាពេលអនាគតនោះឡើយ»។
អង្គការសិទ្ធិមនុស្សអន្តរជាតិមួយនេះ បាននិយាយទៀតថា ជាយូរមកហើយ កិច្ចខិតខំប្រឹងប្រែងប្រយុទ្ធប្រឆាំងនឹងភេរវកម្មរបស់កម្ពុជា ត្រូវបានយកទៅប្រើប្រាស់មិនត្រឹមត្រូវ សំដៅទៅលើអ្នករិះគន់រដ្ឋាភិបាលនិងមេដឹកនាំបក្សប្រឆាំង។
អង្គការ HRW និយាយថា ក្រសួងការបរទេសជប៉ុនបានឆ្លើយតបនឹងការចោទសួររបស់ខ្លួនកាលពីថ្ងៃទី១៦ ខែវិច្ឆិកាកន្លងមកនេះ ប៉ុន្តែថា បដិសេធពន្យល់អំពីចំណុចអ្វីខ្លះដែលជប៉ុនចាត់ទុកជាការប្រឆាំងនឹងអំពើភេរវកម្ម។
ទោះជាយ៉ាងណា ក្រុមសិទ្ធិមនុស្សអន្តរជាតិមួយនេះនិយាយថា ជប៉ុនបានបញ្ជាក់ពីការផ្ដល់ជំនួយនេះមកកម្ពុជារួចហើយ ហើយប្ដេជ្ញាថា នឹងតាមដានការប្រើប្រាស់ជំនួយនេះឱ្យចំគោលដៅនិងមានប្រសិទ្ធភាព។
វីអូឌី បានព្យាយាមស្វែងរកការបកស្រាយពីអ្នកនាំពាក្យក្រសួងការបរទេសកម្ពុជា លោក កុយ គួង ប៉ុន្តែលោកមិនលើកទូរសព្ទនោះឡើយ។
អគ្គស្នងការរងនគរបាលជាតិ លោក អ៊ី សុខឃី ប្រាប់ថា លោកមិនអាចបកស្រាយបានទេ ដោយសារលោកមិនមានព័ត៌មាននេះនៅក្នុងដៃនៅឡើយ ហើយលោកប្រាប់ឱ្យសួរទៅអ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ដែលមិនបានឆ្លើយតបនឹងការស្វែងរកការបកស្រាយពី វីអូឌី នោះឡើយនៅថ្ងៃនេះ។
នាយករងអង្គការការពារសិទ្ធិមនុស្សលីកាដូ លោក អំ សំអាត ប្រាប់ថា ជប៉ុនផ្តល់ជំនួយឥតសំណងដល់កម្ពុជាជារឿងល្អ ប៉ុន្តែលោកថា ជប៉ុនត្រូវធ្វើការសិក្សាឱ្យបានគ្រប់ជ្រុងជ្រោយមុននឹងផ្តល់ជំនួយដល់កម្ពុជា ដើម្បីទប់ស្កាត់ការរំលោភសិទ្ធិមនុស្សនិងបំផ្លាញប្រជាធិបតេយ្យនៅកម្ពុជា។
លោក អំ សំអាត មានប្រសាសន៍ថា៖ «ទាក់ទងនឹងលទ្ធិប្រជាធិបតេយ្យនិងការគោរពសិទ្ធិមនុស្សនៅកម្ពុជា ហើយជាពិសេសប្រទេសដែលជាម្ចាស់ជំនួយមកកម្ពុជា ហើយជាប្រទេសដែលប្រកាន់លទ្ធិប្រជាធិបតេយ្យ គួរតែពិនិត្យមើលលើលក្ខខណ្ឌទាំងអស់ ហើយគួរតែសុំឱ្យមានការកែតម្រូវ ការកែតម្រូវបានន័យថា ចង់ធ្វើយ៉ាងណាឱ្យមានស្ថានភាពល្អប្រសើរឡើងចំពោះការគោរពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា»។
ក្នុងរបាយការណ៍របស់ខ្លួនកាលពីឆ្នាំ២០១៨ អង្គការឃ្លាំមើលសិទ្ធិមនុស្ស បានលើកឡើងនូវឈ្មោះនគរបាលជាន់ខ្ពស់៤រូបរបស់កម្ពុជា ក្នុងនោះមាន អគ្គស្នងការនគរបាលជាតិ នាយឧត្ដមសេនីយ៍ នេត សាវឿន, អគ្គស្នងការរងនគរបាលជាតិ នាយឧត្ដមសេនីយ៍ ម៉ក់ ជីតូ, រដ្ឋលេខាធិការក្រសួងមហាផ្ទៃ នាយឧត្ដមសេនីយ៍ សុខ ផល និងអតីតស្នងការនគរបាលរាជធានីភ្នំពេញ នាយឧត្ដមសេនីយ៍ ជួន សុវណ្ណ ដែលបច្ចុប្បន្ននេះ គឺជាអនុប្រធានអាជ្ញាធរជាតិប្រឆាំងគ្រឿងញៀន។
នគរបាលជាន់ខ្ពស់ទាំង៤រូបនេះ និងនាយឧត្ដមសេនីយ៍យោធា៨រូបផ្សេងទៀត ត្រូវបានអង្គការមួយនេះចោទថា «បានជាប់ពាក់ព័ន្ធនឹងការរំលោភបំពានសិទ្ធិមនុស្សនៅកម្ពុជាជាយូរមកហើយ»៕
