ប្រជាកសិករមួយចំនួននៅស្រុកស្អាង ខេត្តកណ្តាល ត្អូញត្អែរថា បន្លែរបស់ពួកគាត់ប្រឈមនឹងការឈូសចោលក្នុងរយៈពេលប៉ុន្មានថ្ងៃខាងមុខនេះ បើសិននៅតែពុំមានទីផ្សារសម្រាប់លក់ ស្របពេលដែលកម្ពុជាកំពុងជួបបញ្ហាជំងឺកូវីដ១៩ និងការនាំចូលបន្លែពីប្រទេសជិតខាងច្រើន។
លោក តៃ សុង កសិករដាំបន្លែនៅភូមិព្រែកអុងប៉ាង ឃុំទឹកវិល ប្រាប់វីអូឌីនៅថ្ងៃសុក្រនេះថា រូបលោកនិងកសិករផ្សេងទៀតនៅក្នុងឃុំ កំពុងមានក្តីបារម្ភជាខ្លាំង ដោយសារតែដំណាំបន្លែដែលគាត់បានដាំហើយ ពុំមានទីផ្សារ។
កសិកររូបនេះអះអាងថា លោកចំណាយដើមទុនប្រហែល៥ពាន់ដុល្លារ ដើម្បីដាំបន្លែសាឡាត់មួយរដូវៗ លើទំហំដី២ហិកតាកន្លះ។ លោកថា បច្ចុប្បន្ន បន្លែរបស់គាត់ដល់ពេលប្រមូលផលហើយ ប៉ុន្តែគ្មានអ្នកទិញនោះទេ។
លោក តៃ សុង ឱ្យដឹងថា នៅសល់ពេលប្រហែល៥ថ្ងៃទៀតប៉ុណ្ណោះ បន្លែរបស់គាត់នឹងត្រូវឈូសឆាយចោល បើនៅតែពុំមានអ្នកទិញ។
លោកបន្ថែមថា៖ «ឥលូវវាដល់ថ្ងៃកាត់ហើយ ប៉ុន្តែអត់មានអ្នកទិញទេ អ៊ីចឹងខ្ញុំស្តាយរបស់យើងល្អ វាជាបន្លែសុវត្ថិភាពទៀត វាអត់មានប្រើថ្នាំអីទាំងអស់។ អ៊ីចឹងខ្ញុំមានតែប្រកាសឱ្យបងប្អូនណាដែលគាត់ចង់បាន ឱ្យមកកាត់យកទៅលក់ខេត្តណាផ្សេង ឱ្យគាត់កាត់យកចុះ។ ព្រោះបើទុក ក៏ខ្ញុំជិតភ្ជួរចោលដែរ ដើម្បីយកដីហាលចោល។ ផ្អាកធ្វើមួយរយៈសិនទៅ ចាំកូវីដស្ងាត់ ចាំខ្ញុំដាំទៀត។ ក្នុង១ឆ្នាំ បញ្ហាគ្មានអ្នកទិញអ៊ីចឹងប្រហែលពី២ទៅ៤ដង»។
លោក តៃ សុង បន្ថែមថា ក្នុង១ឆ្នាំៗ លោកដាំបន្លែចន្លោះពី២ទៅ៤ដង ហើយបន្លែដែលគាត់ដាំក្នុង១រដូវ អាចប្រមូលបានប្រហែល៣០តោន។ កសិកររូបនេះ ឱ្យដឹងទៀតថា បន្លែដែលបានថ្លៃ គឺក្នុង១គីឡូចន្លោះពី ១ ០០០រៀល ទៅ ២ ០០០រៀល ប៉ុន្តែបច្ចុប្បន្ន ១គីឡូត្រឹមតែ៤០០រៀល ហើយគ្មានអ្នកទិញថែមទៀត។
លោក ហ៊ា ទូច កសិករមួយរូបទៀតនៅឃុំទឹកវិល ដែលដាំបន្លែដែរនោះ និយាយថា លោកបានចំណាយថវិកា៥លានរៀល ដើម្បីដាំបន្លែស្ពៃនិងសាឡាត់លើដីទំហំកន្លះហិកតា ប៉ុន្តែឥលូវត្រូវខាតបង់ទាំងស្រុង ដោយសារបន្លែរបស់គាត់លក់មិនដាច់។
លោកសង្កេតឃើញថា បញ្ហាដែលបន្លែរបស់ពួកគាត់លក់ពុំដាច់និងពុំមានទីផ្សារ ដោយសារតែបញ្ហាជំងឺកូវីដ១៩ ការដាំបន្លែក្នុងឃុំមានការកើនឡើង និងការនាំចូលបន្លែពីប្រទេសជិតខាងច្រើន។
កសិកររូបនេះ ឱ្យដឹងថា កសិករផ្សេងទៀតក៏កំពុងប្រឈមនឹងការជំពាក់បំណុលគេផងដែរ ដោយសារតែខ្ចីលុយធនាគារមកធ្វើដើមទុនសម្រាប់ដាំបន្លែ ប៉ុន្តែបែរជាពុំមានទីផ្សារទៅវិញ។
លោកបន្ថែមថា៖ «ឥលូវកសិករម្នាក់ៗរកលុយដាំបន្តទៀតលែងចង់បានហើយ ព្រោះខាតគ្រប់តែគ្នា។ ហើយកសិករខ្លះខ្ចីលុយធនាគារដែរ បើមិនខ្ចីម៉េចកើត បើត្រូវធ្វើ ដល់អ៊ីចឹងលំបាកដែរ រកលុយបង់ធនាគារមិនបាន។ អ្នកខ្លះធ្វើយូរៗ ឈប់ធ្វើ ដោយសារអត់ដើមធ្វើបន្តទៀត»។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល លោក ប៊ុន ទួនស៊ីម៉ូណា មានប្រសាសន៍ថា ករណីបន្លែរបស់កសិករនៅស្រុកស្អាង ធ្លាក់ថ្លៃនិងគ្មានអ្នកទិញនោះ ដោយសារឈ្មួញមួយចំនួនបានលុបចោលការកម្ម៉ង់ទិញ ដោយសារបញ្ហាជំងឺកូវីដ១៩។ ទោះយ៉ាងណា លោកបដិសេធអត្ថាធិប្បាយ នៅពេលសួរថា តើមន្ទីរមានវិធានការយ៉ាងណាខ្លះជួយដល់កសិករ។
លោកបន្ថែមថា៖ «កសិករនៅតំបន់ហ្នឹង ភាគច្រើនដែលដាំហ្នឹង គឺកុងត្រាជាមួយអ្នកកម្ម៉ង់ទិញហើយ ប៉ុន្តែដោយសារមួយរយៈហ្នឹងវាមានបញ្ហាជំងឺកូវីដ ឈ្មួញមួយចំនួនបានលុបចោលការកម្ម៉ង់ទិញ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បញ្ហាជំងឺកូវ១៩ មិនមែនជាឧបសគ្គទាំងស្រុងសម្រាប់ការលក់ផលិតផលកសិកម្មនោះទេ។ លោកថា ការលក់ផលិតផលកសិកម្មមិនដាច់នេះ ដោយសារតែអាជ្ញាធរខ្វះយុទ្ធសាស្ត្រក្នុងការផ្សព្វផ្សាយ និងស្វែងរកទីផ្សារជូនកសិករ។
លោក ថេង សាវឿន បន្តថា បញ្ហាផលិតផលកសិកម្មលក់មិនដាច់និងខ្វះទីផ្សារ បានកើតឡើងជាយូរឆ្នាំមកហើយ ដោយសារការនាំចូលផលិតផលទាំងនោះមកពីប្រទេសជិតខាង។
លោកបន្ថែមថា៖ «វាមានបញ្ហាកូវីដមែន ប៉ុន្តែបន្លែសាឡាត់ និងផលិតផលផ្សេងៗហ្នឹង នៅតែមានការនាំចូលពីប្រទេសជិតខាង មកលក់នៅតាមទីផ្សារកម្ពុជា។ អ៊ីចឹងដើម្បីឱ្យផលិតផលក្នុងស្រុកមានទីផ្សារ យើងអាចកាត់បន្ថយការនាំចូលផលិតខ្លះពីប្រទេសវៀតណាមនិងថៃ។ ហើយយើងផ្តល់ឱកាសទីផ្សារហ្នឹងសម្រាប់ឱ្យកសិករដាំផលិតក្នុងស្រុកលក់ ចំណុចនេះ ខ្ញុំគិតថាអាចធ្វើបាន។ ហើយអ្នកភាគីពាក់ព័ន្ធ ទាំងអ្នកទិញ និងអ្នកដាំ ត្រូវសហការគ្នាស្វះស្វែងរកវិធីសាស្ត្រដោះស្រាយ ជាពិសេសត្រូវមានការគាំទ្រពីក្រសួងនិងមន្ទីរ ដើម្បីជួយដល់កសិករទាំងអស់ហ្នឹង»។
កាលពីថ្ងៃទី១៤ ខែកក្កដា ក្នុងពិធីសំណេះសំណាលមួយនៅមជ្ឈមណ្ឌលស្រាវជ្រាវ និងអភិវឌ្ឍន៍កសិកម្ម ក្នុងស្រុកពាមរក៍ ខេត្តព្រៃវែង លោកនាយករដ្ឋមន្ត្រី ហ៊ុន សែន បញ្ជាក់ថា កសិកម្មនៅកម្ពុជាមិនត្រឹមតែមិនប៉ះពាល់ដោយកូវីដ១៩ទេ ថែមទាំងមានឱកាសល្អសម្រាប់ពង្រឹងវិស័យកសិកម្មទៅវិញ៕