សមាគមដែលធ្វើការពាក់ព័ន្ធនឹងវិស័យធនាគារនិងហិរញ្ញវត្ថុ ស្នើដល់សាធារណជន អតិថិជន និងអាជីវករ ធ្វើការទូទាត់ប្រាក់តាមប្រព័ន្ធអេឡិចត្រូនិច ដើម្បីបង្ការការចម្លងជំងឺកូវីដ១៩ ក្រោយពីក្រសួងសុខាភិបាលថា ជំងឺនេះអាចឆ្លងតាមរយៈការប្រើប្រាស់ក្រដាសប្រាក់។
សេចក្តីថ្លែងការណ៍រួមរបស់សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុនិងបច្ចេកវិទ្យាកម្ពុជា នៅថ្ងៃទី០៨ ខែធ្នូ ឆ្នាំ២០២០ បានលើកឡើងថា ពេលថ្មីៗនេះ មានការឆ្លងរាលដាលនៃជំងឺកូវីដ១៩ ក្នុងសហគមន៍ ខណៈក្រសួងសុខាភិបាលបានជូនដំណឹងថា ជំងឺកូវីដ១៩ ក៏អាចឆ្លងតាមរយៈការប្រើប្រាស់ក្រដាសប្រាក់ផងដែរ។
សេចក្តីថ្លែងការណ៍ បន្តថា ដើម្បីចូលរួមទប់ស្កាត់ការឆ្លងជំងឺកូវីដ១៩ វិស័យធនាគារ និងហិរញ្ញវត្ថុ លើកទឹកចិត្តដល់សាធារណជន អតិថិជន និងអាជីវករទាំងអស់ ធ្វើការទូទាត់ប្រាក់តាមប្រព័ន្ធអេឡិចត្រូនិច ដែលផ្តល់ដោយគ្រឹះស្ថានធនាគារនិងហិរញ្ញវត្ថុ។
សេចក្តីថ្លែងការណ៍បញ្ជាក់ទៀតថា សមាគមធនាគារ និងហិរញ្ញវត្ថុ ក៏បាននិងកំពុងសហការជាមួយធនាគារជាតិនៃកម្ពុជា ក្នុងការសម្រួលឱ្យមានការទូទាត់ប្រាក់តាមអេឡិចត្រូនិច ដល់គ្រឹះស្ថានធនាគារនិងហិរញ្ញវត្ថុ ឱ្យកាន់តែងាយស្រួល សុវត្ថិភាព និងកម្រៃសេវាសមរម្យ នាពេលខាងមុខនេះដែរ។
កាលពីចុងសប្តាហ៍មុន អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានឱ្យដឹងថា ជំងឺកូវីដ១៩ ក៏អាចឆ្លងតាមក្រដាសប្រាក់បានដែរ ហើយការឆ្លងនេះគឺលឿនជាទីបំផុត។
លោកស្រីបានអះអាងថា ប្រសិនបើអ្នកជំងឺកូវីដ១៩ កាន់ក្រដាសប្រាក់នោះ រួចហុចបន្ដទៅអ្នកដទៃទៀត ហើយនៅពេលអ្នកនោះចាប់កាន់លុយ ហើយយកដៃមកប៉ះច្រមុះ មាត់ ឬភ្នែកជាដើម នឹងធ្វើឱ្យឆ្លងជំងឺកូវីដ១៩ ជាក់ជាមិនខាន។ លោកស្រីបញ្ជាក់ថា ការឆ្លងនេះ តាមរយៈទឹករំអិលផ្លូវដង្ហើម ដូចជា សំបោរឬស្លេស្មទឹកមាត់របស់អ្នកជំងឺកូវីដ១៩ ដែលទំនៅលើក្រដាសប្រាក់ដែលអ្នកជំងឺបានកាន់៕
