គណបក្សនគរប្រជាធិបតេយ្យ ប្រកាសឈប់លូកដៃក្នុងបញ្ហាជម្លោះដីធ្លីមួយកន្លែង ស្ថិតក្នុងស្រុកម៉ាឡៃ ខេត្តបន្ទាយមានជ័យ ក្រោយពីមន្ត្រីជាន់ខ្ពស់រដ្ឋាភិបាលប្រាប់ឱ្យឈប់លូកដៃក្នុងរឿងនេះ ខណៈអាជ្ញាធរខេត្តកំពុងដោះស្រាយ។
ក្នុងលិខិតមួយចុះថ្ងៃទី០៧ ខែធ្នូ ឆ្នាំ២០២០ ប្រធានគណបក្សនគរប្រជាធិបតេយ្យ លោក ចាន់ យ៉េត និងសហការី បានប្រកាសឈប់លូកដៃក្នុងរឿងជម្លោះដីធ្លីរបស់ប្រជាពលរដ្ឋ នៅភូមិបឹងជង្រុក និងតំបន់៦៧១ ស្ថិតក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ តទៅទៀតហើយចាប់ពីថ្ងៃនេះទៅ។
ប្រធានគណបក្សនគរប្រជាធិបតេយ្យ លោក ចាន់ យ៉េត ប្រាប់វីអូឌីបន្ថែមលើលិខិតថា ក្រោយពីទទួលបានបណ្តឹងពីប្រជាពលរដ្ឋចំនួន២៣០គ្រួសារ នៅភូមិបឹងជង្រុក កាលពីថ្ងៃទី១ ខែធ្នូនេះ ឱ្យជួយតាមដាននិងដោះស្រាយបញ្ហាដីធ្លីរបស់ពួកគេនោះ លោកនិងសហការី បានចុះទៅស៊ើបអង្កេតករណីនេះ ប៉ុន្តែត្រូវបានហាមដោយមន្ត្រីជាន់ខ្ពស់នៃទីស្តីការគណៈរដ្ឋមន្ត្រី។
លោកបន្ថែមថា៖ «អាជ្ញាធរ លោកមិនព្រមវាស់វែងឱ្យពួកគាត់ [ពលរដ្ឋ២៣០គ្រួសារ] ទេ ទុកពន្យារពេលដល់ពេលនេះ។ បង្កាន់ដៃឬក៏ប្លង់ ក៏អត់មានចេញឱ្យពួកគាត់ដែរ ហើយឥលូវស្រាប់តែមានក្រុមហ៊ុនគេចុះអភិវឌ្ឍនៅតំបន់នោះ ហើយមន្ត្រីជាន់ខ្ពស់នៅខុទ្ទកាល័យសម្តេចគេចុះវិញ ហើយគេហាមមិនឱ្យខ្ញុំលូកដៃលើរឿងនេះទេ»។
កូនអតីតយោធិនពិការ និងតំណាងពលរដ្ឋ២៣០គ្រួសារ លោក ផុត ហួន និយាយថា កាលពីឆ្នាំ១៩៩៧ លោកនាយករដ្ឋមន្ត្រី ហ៊ុន សែន បានប្រកាសផ្តល់ដីទៅឱ្យយោធិនពិការ ក្នុងមួយគ្រួសារ ទំហំ៥ហិកតា ដែលមានពលរដ្ឋសរុប២៣០គ្រួសារ ប៉ុន្តែនៅឆ្នាំ២០១០ ទើបពួកគាត់និងសាច់ញាតិចូលទៅរស់នៅរហូតមកដល់បច្ចុប្បន្ន។
លោកបន្តថា រយៈពេលដែលពលរដ្ឋរស់នៅនិងអាស្រ័យផលជាង១០ឆ្នាំមកនេះ អាជ្ញាធរពាក់ព័ន្ធមិនបានចេញបណ្ណកម្មសិទ្ធិឱ្យទេ ហើយក៏មិនធ្លាប់មានបញ្ហាអ្វីដែរ។ លោកថា ទើបតែនៅឆ្នាំ២០២០នេះទេ មានក្រុមហ៊ុនដាក់គ្រឿងចក្រចុះមកឈូសឆាយដីធ្លី ដំណាំ និងបណ្តេញឱ្យពួកគាត់រុះរើលំនៅឋានចេញ ដោយចោទពួកគាត់ថា រស់នៅលើដីក្រុមហ៊ុនទៅវិញ។
លោកបន្ថែមថា៖ «ខ្ញុំមករស់នៅលើទឹកដីនេះជាង១០ឆ្នាំហើយ មានការបង្កបង្កើនផល មិនដែលមានអ្នកណាមករករឿងទេ ទើបតែមួយខែកន្លងមកនេះ ក្រុមហ៊ុនមកធ្វើនេះ បានរំលោភបំពាន ស.ជ.ណ របស់សម្តេចទាំងចាស់ទាំងថ្មី។ គាត់មកកៀបសង្កត់ឱ្យពួកខ្ញុំរុះរើផ្ទះសម្បែងចេញពីដីរបស់ក្រុមហ៊ុនដែលឈ្មួញបានទិញ ទិញដោយមិនដឹងរឿង និងមិនឱ្យឯកសារខ្ញុំមើល»។
កាលពីថ្ងៃទី៦ ខែធ្នូនេះ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្តល់យោបល់ លោក ឈឹម ផលវរុណ បានផ្ញើសារតាមប្រព័ន្ធ Telegram ក្នុងក្រុមសមាជិកឧត្តមក្រុមប្រឹក្សា និងពិគ្រោះយោបល់ ដោយស្នើឱ្យប្រធានគណបក្សនគរប្រជាធិបតេយ្យ លោក ចាន់ យ៉េត ផ្អាកចូលរួមសម្របសម្រួលរកដំណោះស្រាយក្នុងបញ្ហាដីធ្លីនៅស្រុកម៉ាឡៃនោះ។ លោក ឈឹម ផលវរុណ បញ្ជាក់ថា បញ្ហាដីធ្លីនោះ គឺអាជ្ញាធរកំពុងដោះស្រាយហើយ។
តែយ៉ាងណា លោក ឈឹម ផលវរុណ ប្រាប់វីអូឌីនៅថ្ងៃអង្គារនេះថា លោកមិនបានហាមឧត្តមក្រុមប្រឹក្សាពិគ្រោះ និងពិគ្រោះយោបល់ណាម្នាក់ មិនឱ្យចូលលូកដៃក្នុងវិវាទដីធ្លីនោះឡើយ។
លោកបន្ថែមថា៖ «ខ្ញុំពុំបានហាមសមាជិកប្រតិភូនៃឧត្តមក្រុមប្រឹក្សាពិគ្រោះ និងផ្តល់យោបល់ណាម្នាក់ទេ តាំងពីចុះធ្វើការរហូតមកដល់ពេលនេះ។ ខ្ញុំមានតែពិគ្រោះនិងផ្តល់យោបល់ សហការ និងពិភាក្សាគ្នាអំពីលទ្ធភាពនៃការចុះទៅសិក្សានិងប្រមូលទិន្នន័យតែប៉ុណ្ណឹងទេ»។
ក្នុងកំណត់ហេតុរបស់អ្នកភូមិ បានឱ្យដឹងថា កាលពីថ្ងៃទី៤ ខែធ្នូ ឆ្នាំ២០២០នេះ អាជ្ញាធរស្រុក និងខេត្តជាច្រើននាក់ អមដំណើរជាមួយគ្រឿងចក្ររបស់ក្រុមហ៊ុន បានធ្វើសកម្មភាពឈូសឆាយលើដីធ្លី និងបំផ្លាញផលដំណាំផ្សេងៗរបស់អ្នកភូមិម្តងទៀត។
កាលពីខែកញ្ញា ឆ្នាំ២០២០ ក្រុមតំណាងពលរដ្ឋទាំង២៣០គ្រួសារ បានដាក់ពាក្យបណ្តឹងទៅក្រសួងមហាផ្ទៃ ជួយអន្តរាគមន៍និងដោះស្រាយដីធ្លីជូនពួកគេ ដោយផ្តល់បណ្ណកម្មសិទ្ធិ និងអន្តរាគមន៍ឱ្យមានការផ្តល់សំណង ករណីក្រុមហ៊ុនឈូសឆាយផលដំណាំពួកគេផងដែរ។
វីអូឌី ពុំអាចសុំការបញ្ជាក់ពីអភិបាលខេត្តបន្ទាយមានជ័យ លោក អ៊ុំ រាត្រី និងអភិបាលរងខេត្ត លោក ង៉ោ ម៉េងជ្រួញ បានទេ នៅថ្ងៃអង្គារនេះ ដោយពួកគាត់ប្រាប់ថាជាប់ប្រជុំ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្ដបន្ទាយមានជ័យ លោក ស៊ុំ ចាន់គា មានប្រសាសន៍ថា ក្រោយសមាហរណកម្ម លោកនាយករដ្ឋមន្ត្រី ហ៊ុន សែន បានប្រកាសផ្តល់ដីទៅឱ្យយោធិនពិការ ១គ្រួសារ ដី៥ហិកតាពិតមែន។
លោកបន្តថា នៅតំបន់បឹងជង្រុកនោះ បច្ចុប្បន្នមានពលរដ្ឋចំណូលថ្មី ពលរដ្ឋយោធិនពិការ និងអតីតកងទ័ពខ្មែរក្រហម រស់នៅលាយឡំគ្នា។ លោកថា ដើម្បីដោះស្រាយដោយផ្តល់យុត្តិធម៌ដល់ជនរងគ្រោះពិតប្រាកដ អាជ្ញាធរពាក់ព័ន្ធដែលចុះដោះស្រាយ ត្រូវពិនិត្យមើលទៅសៀវភៅគ្រប់គ្រងចំនួនទ័ពកាលពីឆ្នាំ១៩៩៤។
លោកបញ្ជាក់ថា៖ «មន្ត្រីរបស់រដ្ឋដែលដោះស្រាយនៅកន្លែងហ្នឹង ដើម្បីទទួលបានយុត្តិធម៌ផលប្រយោជន៍ដល់ប្រជាពលរដ្ឋពិតៗ ត្រូវពិនិត្យលើសៀវភៅហ្នឹងទៅថា មានឈ្មោះអីខ្លះ ហើយថា តើអ្នកដែលចូលមកនៅថ្មីៗហ្នឹងដោយរបៀបណា តាមរយៈណា»៕
