មេធាវីការពារក្តីឱ្យអតីតគណបក្សប្រឆាំង ឱ្យដឹងថា តុលាការខេត្តកំពត នៅថ្ងៃព្រហស្បតិ៍នេះ បានលើកពេលជំនុំជម្រះសំណុំរឿងកូនក្តី៤រូប ដោយសារចៅក្រមកាន់សំណុំរឿងជាប់ធ្វើចត្តាឡីស័កឬដាក់ខ្លួនឱ្យនៅដាច់ដោយឡែក ដើម្បីតាមដានសុខភាពពាក់ព័ន្ធកូវីដ១៩។
តាមដីកាកោះ ចុះថ្ងៃទី១៨ ខែវិច្ឆិកា ឆ្នាំ២០២០ ព្រះរាជអាជ្ញារងនៃអយ្យការអមសាលាដំបូងខេត្តកំពត លោក ខា ដែនណា បង្គាប់ឱ្យជនជាប់ចោទជាសកម្មជនបក្សប្រឆាំងចំនួន៤នាក់ ចូលទៅកាន់សាលាដំបូងខេត្តកំពត នៅថ្ងៃទី៣ ខែធ្នូ ឆ្នាំ២០២០ វេលាម៉ោង៨ព្រឹក ដើម្បីជំនុំជម្រះពីបទ មិនអនុវត្តសេចក្តីសម្រេចរបស់តុលាការ ប្រឆាំងសាលដីកាតុលាការកំពូល ប្រមូលផ្តុំញុះញង់ឱ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅស្រុកឈូក ខេត្តកំពត កាលពីឆ្នាំ២០១៩។
លោក សំ សុគង់ មេធាវីការពារក្តីឱ្យសកម្មជនអតីតបក្សប្រឆាំង មានប្រសាសន៍ថា សំណុំរឿងនេះត្រូវបានតុលាការសម្រេចពន្យារពេលបើកសវនាការជំនុំជម្រះហើយ ដោយសារចៅក្រម ជាប់ធ្វើចត្តាឡីស័កក្រោយពីមានព្រឹត្តិការណ៍សហគមន៍២៨វិច្ឆិកា។
លោកថា៖ «ថ្ងៃនេះ [កូនក្តី] ត្រូវចូល៤នាក់ មាន ង៉ែត ឃុច, នុត ពេជ្យ, សាង ចំរើន និង ហេង សែ ជាប់ចោទ ទី១ បទញុះញង់ ទី២ មិនគោរពទៅតាមសេចក្តីសម្រេចរបស់តុលាការ»។
បើតាមលោក សំ សុគង់ សមាសភាពជំនុំជម្រះលើសំណុំរឿងនេះមានលោក គាំ គង្គា ជាចៅក្រមជំនុំជម្រះ លោក ខា ដែនណា ជាតំណាងអយ្យការ និងលោកស្រី សាន់ ដារ៉ា ជាក្រឡាបញ្ជីសវនាការ។
ប្រធានលេខាធិការដ្ឋានរដ្ឋបាល និងជាអ្នកនាំពាក្យសាលាដំបូងខេត្តកំពត លោក ម៉ាន់ បូរេត មានប្រសាសន៍ថា សវនាការលើសំណុំរឿងនេះ ពិតជាត្រូវបានពន្យារពេលមែន ដោយសារ លោកចៅក្រម គាំ គង្គា បាននិងកំពុងធ្វើចត្តាឡីស័ក ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា។
លោកថា៖ «គាត់ [ចៅក្រម គាំ គង្គា] ធ្វើ [ចត្តាឡីស័ក] ចាប់ពីថ្ងៃទី២៨ ខែវិច្ឆិកាមក»។
ប្រធានមន្ទីរសុខាភិបាលខេត្តកំពត លោក ញា ប៊ុនថន មានប្រសាសន៍ថា គិតត្រឹមថ្ងៃព្រហស្បតិ៍នេះ មន្ត្រីតុលាការដែលធ្វើចត្តាឡីស័កមានតែម្នាក់ប៉ុណ្ណោះ ក្នុងចំណោមអ្នកពាក់ព័ន្ធដោយប្រយោលក្នុងព្រឹត្តិការណ៍សហគមន៍ ២៨វិច្ឆិកា សរុបចំនួន២១នាក់។
លោកថា៖ «នៅកំពតនេះ សុទ្ធតែ [អ្នកប៉ះពាល់] ប្រយោលទេ ទាំងអស់២១នាក់»។
កាលពីថ្ងៃទី២៦ ខែវិច្ឆិកា ឆ្នាំ២០២០នេះ សាលាដំបូងរាជធានីភ្នំពេញ បានបើកការជំនុំជម្រះអតីតសកម្មជន និងមន្ត្រីអតីតបក្សប្រឆាំងសរុបជិត១៤០នាក់ ពាក់ព័ន្ធបទចោទដូចគ្នា។ ប៉ុន្តែក្រោយសាកសួរមួយព្រឹក សំណុំរឿងត្រូវបានតុលាការលើកយកទៅសវនាការបន្តនៅដើមឆ្នាំ២០២១៕
