កម្ពុជាបានរកឃើញមនុស្ស៣នាក់ទៀតឆ្លងវីរុសកូរ៉ូណា ដែលនាំឱ្យចំនួនអ្នកឆ្លងវីរុសនេះសរុបកើនឡើងដល់៣២៩នាក់ ខណៈប្រទេសនេះកំពុងស្ថិតក្នុងក្ដីបារម្ភពីការឆ្លងរីករាលដាលក្នុងសហគមន៍។
ក្នុងសេចក្ដីប្រកាសព័ត៌មាននៅព្រឹកនេះ ក្រសួងសុខាភិបាលបានបញ្ជាក់ថា ករណី៣ថ្មីនេះ ត្រូវបានរកឃើញនៅលើបុរសកម្ពុជា២នាក់ និងស្ត្រីកម្ពុជាម្នាក់។
ក្រសួងបញ្ជាក់ថា បុរសកម្ពុជា អាយុ២៦ឆ្នាំ ដែលជាពលរដ្ឋមានលំនៅឋាននៅស្រុកដងទង់ ខេត្តកំពត និងបុរសកម្ពុជាម្នាក់ទៀត អាយុ៤៦ឆ្នាំ បានធ្វើដំណើរមកពីប្រទេសជប៉ុន មកដល់កម្ពុជាកាលពីថ្ងៃទី១៨ ខែវិច្ឆិកា។
បើតាមក្រសួង ពលរដ្ឋកម្ពុជាទាំងពីររូបនេះ ត្រូវបានបញ្ជូនទៅសម្រាកព្យាបាលនៅមណ្ឌលសុខភាពចាក់អង្រែ នៅរាជធានីភ្នំពេញ បន្ទាប់ពីធ្វើតេស្តលើកទី២ នៃថ្ងៃទី១៣ អំឡុងពេលធ្វើចត្តាឡីស័កនោះ រកឃើញលទ្ធផលវិជ្ជមាន។
ទន្ទឹមគ្នានេះ ក្រសួងបញ្ជាក់ទៀតថា អ្នកដំណើរ៤៨នាក់ផ្សេងទៀតដែលរួមដំណើរក្នុងជើងហោះហើរជាមួយបុរសកម្ពុជាទាំង២រូបនេះ ត្រូវបានធ្វើតេស្តសុខភាពរួចហើយដែរ ហើយលទ្ធផលពួកគេអវិជ្ជមានទាំងអស់ ប៉ុន្តែត្រូវបន្តរក្សាខ្លួនដាច់ដោយបន្តទៀតនៅមណ្ឌលទ័ពអាកាស និងនៅសណ្ឋាគារមួយកន្លែងក្នុងរាជធានីភ្នំពេញ។
ចំណែកអ្នកឆ្លងជំងឺកូវីដ១៩មួយរូបនេះ ក្រសួងបញ្ជាក់ថា គឺជាស្ត្រីវ័យ៣៥ឆ្នាំ មានទីលំនៅនៅឯស្រុកទឹកឈូ ខេត្តកំពត ហើយបានធ្វើដំណើរមកពីប្រទេសចិន ដល់កម្ពុជា កាលពីថ្ងៃទី១៨ ខែវិច្ឆិកាដែរ។
បើតាមក្រសួងសុខាភិបាល ស្ត្រីកម្ពុជារូបនេះត្រូវបានដាក់ឱ្យសម្រាកព្យាបាលនៅឯមណ្ឌលសុខភាពចាក់អង្រែផងដែរ ហើយអ្នកដំណើរ១៦១នាក់ផ្សេងទៀតដែលរួមដំណើរក្នុងជើងហោះហើរជាមួយស្ត្រីកម្ពុជារូបនេះ ត្រូវបានតេស្តសុខភាពរួចហើយដែរ តែលទ្ធផលអវិជ្ជមាន ហើយបន្តធ្វើចត្តាឡីស័កបន្ថែមទៀត។
គិតមកដល់ថ្ងៃនេះ មនុស្សដល់ទៅ៣២៩នាក់ហើយ ត្រូវបានរកឃើញឆ្លងជំងឺកូវីដ១៩នៅក្នុងប្រទេសកម្ពុជា ប៉ុន្តែក្រសួងសុខាភិបាលអះអាងថា អ្នកជំងឺកូវីដ១៩ ចំនួន៣០៤នាក់ហើយត្រូវបានព្យាបាលជាសះស្បើយ ខណៈអ្នកជំងឺ២៥នាក់ទៀតកំពុងស្ថិតក្រោមការព្យាបាលបន្ត ក្នុងនោះ៥នាក់កំពុងសម្រាកព្យាបាលនៅមណ្ឌលសុខភាពចាក់អង្រែ។
កម្ពុជាបានរកឃើញអ្នកឆ្លងជំងឺកូវីដ១៩ជាបន្តបន្ទាប់ ចំពេលដែលមានក្ដីបារម្ភពីការឆ្លងរីករាលដាលនៃជំងឺផ្លូវដង្ហើមនេះនៅក្នុងសហគមន៍។
កម្ពុជាបានប្រកាសពីការរកឃើញករណីឆ្លងក្នុងសហគមន៍ជាលើកដំបូងកាលពីចុងសប្ដាហ៍កន្លងមកនេះ បន្ទាប់ពីរកឃើញថា ស្ត្រីកម្ពុជាម្នាក់វ័យ៥៦ឆ្នាំ ដែលជាភរិយារបស់អគ្គនាយកពន្ធនាគារ លោក ឆែម សាវុធ បានឆ្លងជំងឺកូវីដ១៩ កាលពីថ្ងៃទី២៩ ខែវិច្ឆិកា។ គិតរហូតមកដល់ថ្ងៃនេះ ប្រភពនៃការឆ្លងទៅលើស្ត្រីកម្ពុជារូបនេះ មិនត្រូវបានគេរកឃើញនៅឡើយទេ។
ក្រសួងសុខាភិបាល បាននិយាយថា ក្រសួងបានប្រមូលសំណាកពីមនុស្សដល់ទៅ៨ ២១២នាក់ហើយ គិតចាប់តាំងពីថ្ងៃសៅរ៍សប្ដាហ៍មុនមក ប៉ុន្តែក្រសួងថា សំណាករបស់ពលរដ្ឋ៧ ១៣១នាក់ ត្រូវបានធ្វើតេស្តរួចរាល់ហើយនៅត្រឹមថ្ងៃម្សិលមិញនេះ។
លទ្ធផលនៃការធ្វើតេស្តលើសំណាកទាំងនេះ បង្ហាញថា មនុស្ស១៧នាក់បានឆ្លងជំងឺកូវីដ១៩ ហើយលទ្ធផលនៃការធ្វើតេស្តសំណាកដទៃទៀត រកឃើញថា អវិជ្ជមាន ឬមិនឆ្លងជំងឺផ្លូវដង្ហើមនេះទេ។
រដ្ឋាភិបាលកម្ពុជាបានសម្រេចហាមឃាត់ការជួបជុំមនុស្សចាប់ពី២០នាក់ឡើង បិទសាលារៀន សារមន្ទីរ រោងភាពយន្ត និងទីធ្លាសាធារណៈសម្រាប់ការហាត់ប្រាណ និងអំពាវនាវទៅប្រជាពលរដ្ឋកុំឱ្យចេញពីផ្ទះនៅអំឡុងរយៈពេល១៥ថ្ងៃនៃខែធ្នូនេះ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩នេះ៕
