រដ្ឋបាលរាជធានីភ្នំពេញ ប្រកាសផ្តល់ថវិកាឧបត្ថម្ភរបស់រាជរដ្ឋាភិបាល ជូនប្រជាពលរដ្ឋដែលធ្វើចត្តាឡីស័កនៅរាជធានីភ្នំពេញ ក្នុងមួយគ្រួសារចំនួន២ម៉ឺនរៀលក្នុងមួយថ្ងៃ រយៈពេល១៥ថ្ងៃ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី១ ខែធ្នូ ឆ្នាំ២០២០ បានលើកឡើងថា ប្រជាពលរដ្ឋដែលត្រូវទទួលថវិកាឧបត្ថម្ភរបស់រាជរដ្ឋាភិបាល រួមមាន អ្នកដែលពាក់ព័ន្ធផ្ទាល់ជាមួយនឹងព្រឹត្តិការណ៍សហគមន៍២៨វិច្ឆិកា អ្នកដែលទទួលបានការធ្វើតេស្តហើយលទ្ធផលអវិជ្ជមាន អ្នកដែលធ្វើចត្តាឡីស័កនៅតាមផ្ទះនិងសណ្ឋាគារ និងអ្នកដែលមានជីវភាពខ្វះខាត។
កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានចេញបញ្ជាឱ្យក្រសួងសុខាភិបាល ដែលជាអ្នកគ្រប់គ្រងថវិកាបានពីការចូលរួមវិភាគទាន ឱ្យទម្លាក់លុយទៅតាមបណ្តារាជធានី-ខេត្តគោលដៅ ក្នុងមួយខេត្ត៥០លានរៀល ដើម្បីឧបត្ថម្ភគ្រួសារក្រីក្រដែលមកធ្វើចត្តាឡីស័កនូវថវិកាមួយគ្រួសារចំនួន២ម៉ឺនរៀល ក្នុងបំណងជួយសម្រួលដល់បន្ទុកគ្រួសាររបស់ពួកគេ។
លោក ហ៊ុន សែន ថ្លែងបន្តថា៖ «អ៊ីចឹង ខ្ញុំកំណត់ជាគោលការណ៍តែម្តង ក្នុង១គ្រួសារទទួលបាន២ម៉ឺនរៀលក្នុង១ថ្ងៃ ប៉ុន្តែយើងរាប់លំដាប់តែអ្នកក្រីក្របានហើយ ដែលយើងមានបណ្ណក្រីក្រហើយស្រេច»។
នាយករដ្ឋមន្ត្រីថ្លែងដែរថា ថវិកាជាង៤២ពាន់លានរៀលដែលបានពីវិភាគទានសម្រាប់ត្រៀមចំណាយ ក្នុងនោះជាង៣៧ពាន់លានរៀលបានដាក់ក្នុងធនាគារហើយ និងត្រៀមថវិកាជាតិមួយចំនួនទៀតបើមិនគ្រប់។
បើតាមក្រសួងសុខាភិបាល គិតមកដល់ថ្ងៃម្សិលមិញ អ្នកដែលបានប៉ះពាល់ក្នុងព្រឹត្តិការណ៍សហគមន៍២៨វិច្ឆិកា ហើយបានធ្វើតេស្តរកវីរុសកូវីដ១៩ សរុបមានចំនួន៤ ៨៦៩នាក់ ក្នុងនោះ លទ្ធផលអ្នកវិជ្ជមានកូវីដ១៩ មានចំនួន១៧នាក់៕
