តុលាការនឹងបើកសវនាការសំណុំរឿង លោក រ៉ុង ឈុន ពាក់ព័ន្ធនឹងបទ«ញុះញង់បង្កឱ្យមានភាពវិកវរធ្ងន់ធ្ងរដល់សង្គម» ដែលទាក់ទងបញ្ហាព្រំដែនកម្ពុជា-វៀតណាម។
តាមលិខិតរបស់សាលាដំបូងរាជធានីភ្នំពេញចុះថ្ងៃទី១២ខែវិច្ឆិកាគឺ នឹងបើកសវនាការលើករណីរបស់សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន នៅថ្ងៃថ្ងៃទី២ ខែធ្នូ ឆ្នាំ២០២០ ពាក់ព័ន្ធបឹងបទចោទ «ញុះញង់បង្កឱ្យមានភាពវិកវរធ្ងន់ធ្ងរដល់សង្គម» លើបញ្ហាបោះបង្គោលព្រំដែនកម្ពុជាជាមួយប្រទេសវៀតណាម។
សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានចាប់ខ្លួនកាលពីថ្ងៃទី៣១ ខែកក្កដា ហើយប៉ុន្មានថ្ងៃក្រោយមក លោកត្រូវបានតុលាការចោទប្រកាន់ពីបទ«ញុះញង់»ពាក់ព័ន្ធនឹងការលើកឡើងពីការបោះបង្គោលព្រំដែនកម្ពុជាជាមួយប្រទេសវៀតណាម ដែលនិយាយថា បានធ្វើឱ្យដីស្រែរបស់ពលរដ្ឋនៅក្នុងខេត្តត្បូងឃ្មុំ ត្រូវបានកាត់ចូលទៅខាងវៀតណាម ៕