ពលរដ្ឋរស់នៅក្បែរទីលានចាក់សំរាមក្នុងសង្កាត់ដង្កោ ខណ្ឌដង្កោ រាជធានីភ្នំពេញ កំពុងកើតមានជំងឺផ្សេងៗ ដោយសារតែជំនន់ទឹកភ្លៀងស្រកទៅវិញ ក្លិនស្អុយកាន់តែខ្លាំងហូរតាមទឹកចេញពីគំនរសំរាម។
ពលរដ្ឋម្នាក់ លោក ឃិន សារ៉េត មានប្រសាសន៍ថា ក្នុងអំឡុងពេលដែលទឹកកំពុងជន់លិច ពលរដ្ឋនៅទីនោះបានបង្ខំចិត្តទៅរស់នៅលើគំនរសំរាម ហើយក៏ចុះមកវិញរកនៅក្បែរនោះពេលទឹកស្រក។ លោកបន្តថា ក្រោយពេលទឹកស្រកវិញ ក្លិនស្អុយកាន់តែខ្លាំង។
លោក ឃិន សារ៉េត៖ «ទឹកហូរចេញពីគំនរសំរាមចេញក្រៅមក គឺរមាស់តែម្តង ស្អុយខ្លាំង ប៉ុន្តែចេះតែទ្រាំ មិនដឹងធ្វើម៉េច។ ស្អុយដឹងតែហួសពីស្អុយពេកហើយ ប៉ុន្តែមិនដឹងយើងទៅរស់នៅកន្លែងណា និយាយរួម បងប្អូននៅហ្នឹងអត់មានគោលដៅទៅនៅកន្លែងណាកើត។»
តំណាងពលរដ្ឋរូបនេះបញ្ជាក់ថា ពលរដ្ឋបានបាត់បង់ចំណូលទាំងស្រុងពីរបររើសអេតចាយ ហើយក៏ប្រឈមជំងឺផ្សេងៗនិងខ្វះអាហារ។
អ្នកស្រី ស៊ុំ ស្រីយ៉ាន ជាពលរដ្ឋម្នាក់ទៀតដែលរស់នៅលើគំនរសំរាម៨ឆ្នាំមកហើយនោះ បានរៀបរាប់ថា ដោយសារទឹកកខ្វក់ខ្លាំង ធ្វើឱ្យអ្នកភូមិខ្លះបានកើតជំងឺនិងមានបញ្ហាជីវភាព។
អ្នកស្រី ស៊ុំ ស្រីយ៉ាន៖ «ទឹកស្រកទៅ មានបញ្ហាជីវភាព ពិបាករក និងផ្តាសាយតិចតួច បើសំរាមនៅពេញហ្នឹង ប៉ុន្តែខ្ញុំនៅហ្នឹងសាំហើយ បើអ្នកចម្ងាយចុះមក បានក្លិន […] មានអ្នកគ្រុនឈីកនៅសល់ ហើយអ្នកឈឺហ្នឹងបែបមកពី [មេរោគ] តាមទឹក តាមខ្យល់ តាមភ្លៀង។»
ចំណែកលោក ផល ផល្លា តំណាងសប្បុរសជនដែលបានយកអំណោយជួយដល់ពលរដ្ឋ បានឱ្យដឹងថា ក្រោយទឹកស្រក ពលរដ្ឋដែលរស់នៅក្បែរគំនរសំរាមបានកើតជាជំងឺផ្សេងៗ ហើយពួកគេបានបាត់បង់ទីជម្រកដោយសារផ្ទះត្រាំក្នុងទឹកយូរថ្ងៃ។
លោក ផល ផល្លា៖ «វាជាទឹកជំនន់ដែលកខ្វក់ខ្លាំងនៅតំបន់ដែលពួកគាត់រស់នៅ អ៊ីចឹងហើយ វាបណ្តាលឱ្យពួកគាត់កើតជំងឺផ្សេងៗជាច្រើន ដូចជា ទឹកស៊ីជើងរហូតដល់ដំបៅ រមាស់ រាក និងគ្រុនក្តៅ ជាដើម។ ដោយសារការដក់ត្រាំនៅក្នុងទឹកយូរពេក វាបានធ្វើឱ្យកូនខ្ទមរបស់ពួកគាត់នីមួយៗដែលធ្វើពីតង់នោះ មានការពុកផុយនិងខូចទាំងស្រុង។»
ឆ្លើយតបនឹងបញ្ហានេះ លោកស្រី សឿង សេរី ចៅសង្កាត់ដង្កោ មានប្រសាសន៍ថា លោកស្រីនឹងដោះស្រាយបញ្ហានេះ ប៉ុន្តែត្រូវឆ្លងកាត់អភិបាលខណ្ឌសិន។
លោកស្រី សឿង សេរី៖ «មីងនឹងធ្វើររបាយការណ៍ជូនទៅលោកស្រីអភិបាលខណ្ឌ ព្រោះវាហួសសមត្ថកិច្ចសង្កាត់ ហើយមីងមើលស្ថានការណ៍សិន ទើបធ្វើរបាយការណ៍។»
បើតាមលោក ឃិន សារ៉េត ឱ្យដឹងថា ពលរដ្ឋរស់នៅក្នុងតំបន់នោះមាន១២៥គ្រួសារ ជាពលរដ្ឋមានជីវភាពខ្វះខាត រស់នៅពឹងលើការរើសអេតចាយ។ លោកបន្តថា ក្នុងអំឡុងពេលទឹកជំនន់ខ្លាំង ពលរដ្ឋនៅទីនោះក៏ផ្ទុះការឆ្លងរាលដាលជំងឺគ្រុនឈីកដែលរហូតដល់ពេលនេះមិនទាន់ជាសះស្បើយទាំងស្រុងនៅឡើយ៕