អាជ្ញាធរខេត្តមណ្ឌលគិរី ឱ្យដឹងថា អាជ្ញាធរពាក់ព័ន្ធកំពុងសម្របសម្រួលរកដំណោះស្រាយវិវាទដីធ្លី រវាងតារាចម្រៀង លោក ព្រាប សុវត្ថិ និងសមាជិកក្រុមប្រឹក្សាខេត្តមណ្ឌលគិរី។
អភិបាលរងក្រុងសែនមនោរម្យ ខេត្តមណ្ឌលគិរី លោក ឃន់ អូន ដែលជាអ្នកសម្របសម្រួលដោះស្រាយវិវាទដីធ្លីនេះ ប្រាប់វីអូឌីនៅថ្ងៃសុក្រនេះថា ការដែលអាជ្ញាធរមិនទាន់អាចដោះស្រាយរឿងវិវាទដីធ្លីនេះបានភ្លាមៗ ដោយសារតែប្រវត្តិដីនេះមានភាពស្មុគស្មាញច្រើន។
លោកបន្តថា ភាពស្មុគស្មាញដែលអាជ្ញាធរពិបាកនឹងដោះស្រាយនោះ ដោយសារភាគីទាំងសងខាងមានលិខិតកាន់កាប់ដីធ្លីដូចគ្នា ក្នុងនោះ ម្ដាយរបស់លោក ព្រាប សុវត្ថិ ទិញពីប្រជាពលរដ្ឋកាលពីឆ្នាំ២០១៨ ខណៈលោក ម៉ៅ ធនារក្ស បានទិញដីនោះពីប្រជាពលរដ្ឋដែរកាលពីឆ្នាំ២០១២ ហើយដីនោះពីមុន ស្ថិតក្នុងភូមិសាស្ត្រស្រុកអូររាំង ប៉ុន្តែបច្ចុប្បន្ន ត្រូវបានកាត់ចូលក្នុងក្រុងសែនមនោរម្យ។
លោក ឃន់ អូន បន្ថែមថា៖ «អ្នកលក់ដីឱ្យលោក ម៉ៅ ធនារក្ស កាលពីឆ្នាំ២០១២នោះ បានស្លាប់ហើយ អ៊ីចឹងគាត់មានតែសាក្សីទេ […] លោក ធនារក្ស គាត់ទិញឆ្នាំ [២០១២] ហ្នឹង វាមុននឹងលោក ព្រាប សុវត្ថិ ប៉ុន្តែវាមានប្រែប្រួលដូចខ្ញុំបានជម្រាបជូន»។
លោកបន្តថា៖ «[លិខិតទិញលក់ដីរបស់] លោក ព្រាប សុវត្ថិ ក៏គាត់មានសុពលភាពដែរ។ អាជ្ញាធរក៏បានទទួលស្គាល់ចុះហត្ថលេខាឱ្យគាត់ដែរ ហើយក៏មានសាក្សីអ្នកលក់គាត់មកបំភ្លឺនិងទទួលខុសត្រូវ បង្ហាញការពិត ហើយអាជ្ញាធរភូមិឃុំក៏ទទួលស្គាល់»។
ទោះយ៉ាងណា អភិបាលរងក្រុងរូបនេះបានបញ្ជាក់ថា អាជ្ញាធរក្រុងនឹងហៅភាគីពាក់ព័ន្ធ ក្នុងនោះមាន អាជ្ញាធរភូមិ-ឃុំ សាក្សី និងប្រជាពលរដ្ឋដែលបានលក់ដីឱ្យម្ដាយលោក ព្រាប សុវត្ថិ ហើយនិងសាក្សីដែលបានបំភ្លឺឱ្យលោក ម៉ៅ ធនារក្ស រួមទាំងសមាជិកក្រុមប្រឹក្សាខេត្តមណ្ឌលគិរី លោក ម៉ៅ ធនារក្ស មកជួបគ្នា ដើម្បីស្វែងរកដោះស្រាយ នៅរសៀលថ្ងៃសុក្រនេះ។
វីអូឌី មិនទាន់អាចសុំការអត្ថាធិប្បាយជុំវិញវិវាទដីធ្លីនេះពីតារាចម្រៀង លោក ព្រាប សុវត្ថិ និងសមាជិកក្រុមប្រឹក្សា លោក ម៉ៅ ធនារក្ស បាននៅឡើយទេ នៅថ្ងៃសុក្រនេះ។
តារាចម្រៀង លោក ព្រាប សុវត្ថិ កាលពីថ្ងៃទី១៩ ខែវិច្ឆិកា ឆ្នាំ២០២០ បានដាក់លិខិតសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ដើម្បីឱ្យជួយដោះស្រាយបញ្ហាវិវាទដីធ្លីនេះ។ ក្នុងលិខិតនោះ លោក ព្រាប សុវត្ថិ បានចោទថា សមាជិកក្រុមប្រឹក្សាខេត្តមណ្ឌលគិរី លោក ម៉ៅ ធនារក្ស ថាបានប្រើប្រាស់សិទ្ធិអំណាចរំលោភបំពានយកដីដែលជាកម្មសិទ្ធិម្ដាយរបស់លោក ទំហំជិត២០ហិកតា ស្ថិតនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ដែលម្តាយរបស់លោកបានទិញពីប្រជាពលរដ្ឋ កាលពីឆ្នាំ២០១៨។
ចំណែកលោក ម៉ៅ ធនារក្ស បានចេញលិខិតបំភ្លឺ កាលពីថ្ងៃទី២៤ ខែវិច្ឆិកា ឆ្នាំ២០២០ ដោយច្រានចោលការចោទប្រកាន់ ដែលថា លោកទៅរំលោភដីរបស់ភាគី លោក ព្រាប សុវត្ថិ។
លោកថា បញ្ហាដីធ្លីនេះកំពុងស្ថិតក្នុងនីតិវិធីដោះស្រាយតាមផ្លូវច្បាប់ពីសំណាក់រដ្ឋបាលក្រុងសែនមនោរម្យ និងរដ្ឋបាលស្រុកអន្លង់វែង។
លោកបន្តថា បើនីតិវិធីច្បាប់រកឃើញថា ដីនោះពិតជាដីរបស់ភាគីខាងលោក ព្រាប សុវត្ថិ មែន នោះលោកនឹងប្រគល់ជូនដោយគ្មានលក្ខខណ្ឌ ប៉ុន្តែបើរកឃើញថា មានជនខិលខូចយកដីនេះ ទៅរត់ការលក់ឱ្យទៅភាគីលោក ព្រាប សុវត្ថិ វិញនោះ សូមឱ្យមានការទទួលយកការពិតដើម្បីបញ្ចប់បញ្ហានេះ៕