ក្រសួងព័ត៌មាន ជំរុញអង្គភាពសារព័ត៌មានទាំងអស់ដែលរកប្រាក់ចំណូល ទៅចុះបញ្ជីនៅក្រសួងពាណិជ្ជកម្ម ដែលក្រសួងថា ដើម្បីអនុវត្តច្បាប់និងការពារផលប្រយោជន៍របស់អង្គភាព។
ការជំរុញនេះ បានធ្វើឡើងនៅក្នុងសន្និសីទសារព័ត៌មាននៅទីស្តីការក្រសួងព័ត៌មាន នៅព្រឹកថ្ងៃទី២៧ ខែវិច្ឆិកា ឆ្នាំ២០២០នេះ ដើម្បីផ្សព្វផ្សាយពីនីតិវិធីក្នុងការចុះបញ្ជីពាណិជ្ជកម្ម កិច្ចការពារម៉ាក និងពាណិជ្ជនាមសម្រាប់អាជ្ញាបណ្ណលើវិស័យព័ត៌មាននិងសោតទស្សន៍។
អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក មាស សុភ័ណ្ឌ មានប្រសាសន៍ក្នុងសន្និសីទសារព័ត៌មាននោះថា ការជំរុញឱ្យអង្គភាពសារព័ត៌មានដែលរកប្រាក់ចំណូល ទៅចុះបញ្ជីនៅក្រសួងពាណិជ្ជកម្ម ដើម្បីធានាថា អត្តសញ្ញាណនៃអង្គភាពឬស្ថាប័នសារព័ត៌មាននិងសោតទស្សន៍នីមួយៗមិនជាន់គ្នា និងការពារផលប្រយោជន៍ស្របច្បាប់របស់អ្នកស្នើសុំចុះឈ្មោះក្នុងបញ្ជីពាណិជ្ជកម្មនិងបញ្ជីម៉ាក។
លោកបន្តថា ការចុះបញ្ជីនេះ ក៏ជាការការពារការប្រកួតប្រជែងមិនស្មោះត្រង់ រួមទាំងជំរុញការអនុវត្តច្បាប់និងបទប្បញ្ញត្តិផ្សេងៗក្នុងវិស័យសារព័ត៌មានផងដែរ។
អ្នកនាំពាក្យក្រសួងរូបនេះ បញ្ជាក់ដែរថា កន្លងមក ក្រសួងបានរកឃើញថា មានអង្គភាពឬស្ថាប័នសារព័ត៌មានខ្លះបានប្រើប្រាស់ស្លាកសញ្ញានិងឈ្មោះជាន់គ្នា។
លោកបន្ថែមថា៖ «ពាក់ព័ន្ធការចុះបញ្ជីម៉ាកនិងពាណិជ្ជនាម ក៏មិនមែនជាកាតព្វកិច្ចតម្រូវដែរ គឺជាការស្ម័គ្រចិត្ត ដើម្បីការពារផលប្រយោជន៍របស់បងប្អូន ដោយថ្ងៃក្រោយទៅកុំឱ្យគេប្រើឈ្មោះហ្នឹង កុំឱ្យគេប្រើឡូហ្គោ [Logo] ហ្នឹង។ បងប្អូនខ្លាចគេប្រើ បងប្អូនត្រូវតែចុះបញ្ជីនៅក្រសួងពាណិជ្ជកម្ម ដើម្បីការពារម៉ាកឬកម្មសិទ្ធិបញ្ញារបស់យើង ថាយើងមានឈ្មោះមួយ ឡូហ្គោមួយ មិនឱ្យអ្នកណាប្រើបានទេ ព្រោះក្រសួងពាណិជ្ជកម្មទទួលស្គាល់ផ្លូវច្បាប់ហើយ»។
ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម លោក តូ រិទ្ធ មានប្រសាសន៍ថា អង្គភាពសារព័ត៌មានទាំងឡាយណាដែលធ្វើអាជីវកម្មផ្នែកសោតទស្សន៍ ត្រូវចុះបញ្ជីនៅក្រសួងពាណិជ្ជកម្ម។
លោកបន្តថា ការជំរុញឱ្យអង្គភាពសារព័ត៌មានទាំងអស់ចុះបញ្ជីនៅក្រសួងពាណិជ្ជកម្ម ដើម្បីងាយស្រួលក្នុងការគ្រប់គ្រងការចុះបញ្ជីលើអាជ្ញាបណ្ណ ការចុះបញ្ជីម៉ាក និងពាណិជ្ជនាម សម្រាប់វិស័យសារព័ត៌មាននិងសោតទស្សន៍។
លោកបន្ថែមថា៖ «មានន័យថា ធ្វើម៉េចការពារលើការប្រើប្រាស់លើម៉ាកឈ្មោះពាណិជ្ជនាម កុំឱ្យមានការជាន់គ្នាឬក៏មានលក្ខណៈស្រដៀងគ្នា ភ័ន្តច្រឡំគ្នា ដែលពាក់ព័ន្ធកម្មសិទ្ធិបញ្ញាហ្នឹង គឺយើងញែកឱ្យដាច់ពីគ្នា ដើម្បីចៀសវាងការកើតឡើងនូវជម្លោះ»។
បើតាមលោក តូ រិទ្ធ ការចុះបញ្ជីជាលក្ខណៈក្រុមហ៊ុនគឺបង់តម្លៃ១លាន១ម៉ឺនរៀល និងការចុះបញ្ជីជាសហគ្រាសមានតម្លៃ១៨ម៉ឺនរៀល មានរយៈពេល៩៩ឆ្នាំ។
ប្រធានក្លឹបអ្នកកាសែតកម្ពុជា និងជានិពន្ធនាយកទូរទស្សន៍ PNN លោក ប៉ែន បូណា គាំទ្រឱ្យអង្គភាពសារព័ត៌មានទាំងអស់ចុះបញ្ជីនៅក្រសួងពាណិជ្ជកម្ម ដើម្បីការពារឈ្មោះ ម៉ាក និងពាណិជ្ជនាមរបស់ខ្លួន។ លោកថា បញ្ហានេះគឺមានអ្នកសារព័ត៌មានមួយចំនួនមិនទាន់បានយល់ និងកំពុងមានការព្រួយបារម្ភដោយខ្លាចមានតម្រូវនិងរឹតបន្ដឹងផ្សេងៗ។
តែយ៉ាងណា លោកថា ក្លឹបអ្នកកាសែតកម្ពុជា ក៏គ្រោងរៀបចំជំនួបមួយរវាងអ្នកសារព័ត៌មាននិងតំណាងក្រសួងព័ត៌មាន ដើម្បីឱ្យក្រសួងពន្យល់ឱ្យបានកាន់តែច្បាស់ដល់អ្នកសារព័ត៌មានផងដែរ។
លោកបន្ថែមថា៖ «ខ្ញុំគាំទ្រឱ្យមានការចុះបញ្ជី ពីព្រោះដើម្បីការពារឈ្មោះ ម៉ាក និងពាណិជ្ជនាមរបស់យើង ក្នុងនាមជាកម្មសិទ្ធិថា ឈ្មោះហ្នឹងជារបស់ស្ថាប័នយើង ថ្ងៃក្រោយបើសិនជាមានអ្នកណាមកបង្កើតឈ្មោះដូចយើង គឺអត់បានទេ ពីព្រោះយើងបានចុះបញ្ជីនៅក្រសួងព័ត៌មានរួចហើយ អាហ្នឹងជាភាពរឹងមាំផ្នែកផ្លូវច្បាប់របស់យើង ដែលខ្ញុំគិតថា យើងគួរតែធ្វើដែរ»។
របាយការណ៍របស់ក្រសួងព័ត៌មាន ចេញផ្សាយឆ្នាំ២០១៩ បានឱ្យដឹងថា កម្ពុជាមានកាសែតដែលផ្សាយជាប្រចាំចំនួន៥១២អង្គភាព ព័ត៌មានព្រឹតិ្ដបត្រដែលផ្សាយតាមអនឡាញចំនួន៧២អង្គភាព ស្ថានីយទូរទស្សន៍ផ្សាយតាមរលកធាតុអាកាសនិងទូរទស្សន៍ខ្សែកាបទាំងផ្សាយផ្ទាល់និងផ្សាយបន្តផ្ទាល់ មានចំនួនជាង២០០ និងស្ថានីយផ្សាយតាមប្រព័ន្ធឌីជីថលមានចំនួន៥៕