តុលាការសាលាដំបូងរាជធានីភ្នំពេញ នឹងបន្តសវនាការលើសំណុំរឿងអតីតមន្ត្រីជាន់ខ្ពស់បក្សនិងសកម្មជនអតីតបក្សប្រឆាំង ជាង១០០នាក់ ពាក់ព័ន្ធនឹងបទចោទ «រួមគំនិតក្បត់» និង «ញុះញង់ឱ្យប្រព្រឹត្តបទល្មើសជាអាទិ៍» ទៅខែមករា និងខែមីនា ឆ្នាំ២០២១ ក្រោយពីបានសាកសួរជនជាប់ចោទជាង៣០នាក់។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង មានប្រសាសន៍ប្រាប់ក្រុមអ្នកសារព័ត៌មាន នៅថ្ងៃព្រហស្បតិ៍នេះថា ក្រោយពីបានបើកសវនាការពេញមួយព្រឹក ក្រុមប្រឹក្សាជំនុំជម្រះបានសម្រេចបញ្ចូលសំណុំរឿងចំនួន៤ ទៅជា២សំណុំរឿងវិញ ហើយនិងបន្តសវនាការលើសំណុំរឿងទី១ នៅថ្ងៃទី១៤ ខែមករា ឆ្នាំ២០២១ និងសំណុំរឿងទី២ នឹងបន្តសវនាការនៅថ្ងៃទី៤ ខែមីនា ឆ្នាំ២០២១។
លោកបន្តថា នាព្រឹកមិញនេះ មានជនជាប់ចោទចំនួន៣៤រូប បានចូលរួមឆ្លើយបំភ្លឺនៅក្នុងសវនាការ។
តែយ៉ាងណា អ្នកនាំពាក្យរូបនេះ មិនបានបញ្ជាក់ថាតើសំណុំរឿងណាខ្លះដាក់បញ្ចូលគ្នាជាសំណុំរឿងទី១ និងសំណុំរឿងទី២នោះទេ។
មេធាវីការពារក្តីឱ្យក្រុមមន្ត្រីនិងសកម្មជនអតីតគណបក្សប្រឆាំង លោក សំ សុគង់ ឱ្យដឹងកាលពីថ្មីៗនេះថា បើតាមដីកាកោះទាំង៤លើកដែលលោកបានទទួល មានកូនក្តីលោកជិត១៥០នាក់ ខ្លះនៅក្នុងប្រទេសនិងខ្លះទៀតនៅក្រៅប្រទេស ត្រូវបង្ហាញខ្លួននៅសាលាដំបូងរាជធានីភ្នំពេញ នៅថ្ងៃនេះ។
ស្របពេលតុលាការបើកសវនាការលើសំណុំរឿងអតីតមន្ត្រីនិងសកម្មជនគណបក្សសង្គ្រោះជាតិនេះដែរ កម្លាំងសមត្ថកិច្ចចម្រុះជាច្រើននាក់ក៏ត្រូវបានដាក់ពង្រាយការពារសន្តិសុខ និងទប់ស្កាត់មិនឱ្យមានការប្រមូលផ្តុំនៅមុខសាលាដំបូងរាជធានីភ្នំពេញផងដែរ៕