កម្លាំងសមត្ថកិច្ចចម្រុះជាច្រើននាក់ បានរឹតបន្តឹងសន្តិសុខនៅមុខសាលាដំបូងរាជធានីភ្នំពេញ នៅព្រឹកនេះ ខណៈពេលតុលាការបើកសវនាការលើសំណុំរឿងអតីតមន្ត្រីជាន់ខ្ពស់បក្សនិងសកម្មជន អតីតបក្សប្រឆាំងជាង១៥០នាក់ ពាក់ព័ន្ធនឹងបទចោទ «រួមគំនិតក្បត់» និង «ញុះញង់ឱ្យប្រព្រឹត្តបទល្មើសជាអាទិ៍»។
នៅបរិវេណមុខតុលាការ សមត្ថកិច្ចចម្រុះជាច្រើននាក់ក៏ត្រូវបានដាក់ពង្រាយ ដើម្បីរឹតបន្តឹងផ្នែកសន្តិសុខ ដោយពុំអនុញ្ញាតឱ្យមានការប្រមូលផ្តុំឬឈរនៅទីនោះទេ។
អតីតចៅសង្កាត់អូរចា នៅខេត្តបាត់ដំបង និងជាសកម្មជនអតីតគណបក្សសង្គ្រោះជាតិ កញ្ញា ស៊ិន ចាន់ពៅរ៉ូហ្សេត បានលើកឡើងថា កម្លាំងសមត្ថកិច្ចបានរឹតត្បិតមិនឱ្យមានការឈរប្រមូលផ្តុំតាមដានសវនាការរបស់អតីតសកម្មជនបក្សប្រឆាំង នៅមុខសាលាដំបូងរាជធានីភ្នំពេញឡើយ។
![](https://vodkhmer.news/wp-content/uploads/36-9-740x477.jpg)
កញ្ញាបន្តថា៖ «រដ្ឋាភិបាលគួរណាស់តែលុបចោលនូវការរឹតត្បិតសិទ្ធិសេរីភាពរបស់ពលរដ្ឋ ពីព្រោះយើងមកនេះ មិនមែនមកធ្វើបាតុកម្មអីទេ យើងមកលើកទឹកចិត្តអ្នកដែលគាត់ត្រូវបានឡើងតុលាការ […] ខ្ញុំចង់ដឹង ចង់តាមដានការកាត់ក្តីរបស់តុលាការ តើសម្រេចយ៉ាងណាចំពោះពួកគាត់»។
កញ្ញាបន្ថែមថា៖ «ហើយថ្ងៃនេះជាប្រវត្តិសាស្ត្រហើយ ដែលគេបានកោះអញ្ជើញឱ្យពលរដ្ឋខ្មែរជាង១០០នាក់ ឱ្យឡើងសវនាការ»។
ចំណែកអ្នកស្រី សេង ធារី ជាស្ថាបនិកអង្គការផ្នែកតស៊ូមតិ និងជាបុគ្គលមួយរូបដែលត្រូវបានតុលាការកោះហៅចូលសវនាការនៅថ្ងៃនេះ បាននិយាយថា អ្នកស្រីពុំមានការភ័យខ្លាចនោះទេ ហើយក៏ចូលបំភ្លឺនៅតុលាការតាមការកោះហៅ។
អ្នកស្រីថា៖ «ក្នុងការធ្វើដំណើរដោយអហិង្សា យើងនឹងជោគជ័យ បើអ៊ីចឹងចំពោះរូបកាយខ្ញុំ ចំពោះអ្វីដែលគេធ្វើចំពោះខ្ញុំ ខ្ញុំបានគិតដល់ហើយ ប៉ុន្តែខ្ញុំអត់ខ្លាចទេ»។
មេធាវីការពារក្តីឱ្យក្រុមមន្ត្រីនិងសកម្មជនអតីតគណបក្សប្រឆាំង លោក សំ សុគង់ ឱ្យដឹងកាលពីពេលថ្មីៗនេះថា បើតាមដីកាកោះទាំង៤លើកដែលលោកបានទទួល មានកូនក្តីលោកជិត១៥០នាក់ ខ្លះនៅក្នុងប្រទេសនិងខ្លះទៀតនៅក្រៅប្រទេស ត្រូវបង្ហាញខ្លួននៅសាលាដំបូងរាជធានីភ្នំពេញនៅថ្ងៃនេះ៕