លោកនាយករដ្ឋមន្ត្រី ហ៊ុន សែន ថ្លែងនៅថ្ងៃនេះថា លោកស្វាគមន៍ការបង្រួបបង្រួមរវាងក្រុមអ្នកនយោបាយកម្ពុជា ប៉ុន្តែ លោកព្រមានថា ការបង្រួបបង្រួមនយោបាយ នឹងមិនអាចធ្វើទៅបាននោះឡើយ ប្រសិនបើគូប្រជែងនយោបាយមានបំណងកម្ទេចក្រុមគ្រួសារលោក។
លោក ហ៊ុន សែន ដែលជាប្រធានគណបក្សប្រជាជនកម្ពុជាកំពុងកាន់អំណាច ថ្លែងបែបនៅក្នុងពិធីសំណេះសំណាលជាមួយក្រុមមេធាវីស្ម័គ្រចិត្តរបស់លោកនៅឯវិមានសន្តិភាពនៅព្រឹកថ្ងៃនេះ។
លោក ហ៊ុន សែន ថ្លែងថា៖ «បើដាក់គោលដៅបង្រួបបង្រួមខ្មែរ អូខេ។ បើដាក់គោលដៅកម្ចាត់ត្រកូល ហ៊ុន សូមផ្តាំទៅ ទោះបីរលាយផែនដី ក៏ហ៊ុន សែន នៅតែតស៊ូ ផ្តាំឱ្យហើយ! ឥឡូវ មិនមែនវៃ ហ៊ុន សែនទេ វៃត្រកូល ហ៊ុន ទាំងមូល។ អ៊ីចឹង តម្រូវឱ្យខ្ញុំមានរឿងអីដែលត្រូវគិត»។
លោក ហ៊ុន សែន ដែលកាន់អំណាចអស់រយៈពេល ៣៥ឆ្នាំមកហើយនោះ ថ្លែងបន្តថា លោកមិនគាំទ្រនូវការប្រើសារនយោបាយរបស់លោក សម រង្ស៊ី ដែលនិយាយកាលពីឆ្នាំ២០០៣កន្លងមកថា«បើស៊ី អត់សែន» ឬ «មានសែន អត់ស៊ី»។
ទន្ទឹមគ្នានេះ លោក ហ៊ុន សែន បញ្ជាក់ថា អ្នកនយោបាយរូបណាដែលពាក់ព័ន្ធផ្លូវច្បាប់ ត្រូវធ្វើតាមផ្លូវច្បាប់ឱ្យបានចប់សព្វគ្រប់មុននឹងធ្វើការចចារនយោបាយ ដោយថា មិនអាចធ្វើការចចារនយោបាយមុនអនុវត្តច្បាប់នោះទេ៕
អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ដែលធ្លាប់ជាប់ពន្ធនាគារជុំវិញបញ្ហានយោបាយនោះ ប្រាប់ថា ដំណាក់កាលនេះ ការចចារនយោបាយស្ថិតនៅក្នុងដៃមេដឹកនាំបក្សកាន់អំណាច។ បើលោក ហ៊ុន សែន ចង់ឱប្រទេសជាតិរីកចម្រើន និងមានសន្តិភាពពិតប្រាកដ ស្របតាមគោលការណ៍ប្រជាធិបតេយ្យ ត្រូវយកបញ្ហាដាក់លើតុជជែកគ្នាជាមួយថ្នាក់ដឹកនាំបក្សប្រឆាំង។
ទាក់ទងនឹងការលើកឡើងរបស់លោកនាយករដ្ឋមន្ត្រី ហ៊ុន សែន ដែលថា អ្នកនយោបាយខ្មែរមួយចំនួនចង់កម្ចាត់ត្រកូល«ហ៊ុន»នោះ លោក សុវណ្ណារ៉ា ប្រាប់ថា មិនជាប់ពាក់ព័ន្ធនឹងមន្ត្រី ឬថ្នាក់ដឹកនាំគណបក្សសង្គ្រោះជាតិនោះទេ។ លោកអះអាងថា កន្លងមកថ្នាក់ដឹកនាំគណបក្សសង្គ្រោះជាតិ តែងតែថ្លែងថា មិនយកខ្មែរណាធ្វើជាសត្រូវនោះទេ។
លោក មាជ សុវណ្ណារ៉ា ប្រាប់ថា៖ «អំណាចនៅលើបក្សកាន់អំណាច។ អ៊ីចឹង បក្សកាន់អំណាចជាអ្នករកច្រកក្នុងការជជែកគ្នា ប៉ុន្តែ កុំឱមានការបាក់មុខ បាក់មាត់ដល់គ្នា គឺយើងអាចទទួលយកគ្នាបានក្នុងកម្រិតណាៗ គឺជាការរកដំណោះស្រាយជជែកគ្នារវាងអតីមេបក្សសង្គ្រោះជាតិ លោក កឹម សុខា និងលោកនាយករដ្ឋមន្ត្រី ហ៊ុន សែន ទៅ។ ក្រុមការងារជជែកចចារគ្នា បោះដៃរកគ្នាទៅ បានវាចេញជាចំណុចរកដំណោះស្រាយ។ យើងឯកភាពជាតិគ្នា ដើម្បីឱ្យមានគណបក្សប្រឆាំងឡើងវិញក្នុងសង្គមប្រជាធិបតេយ្យ»។
ជម្លោះនយោបាយរវាងគណបក្សកាន់អំណាច និងបក្សប្រឆាំងដ៏ធំជាងគេនៅកម្ពុជា ចាប់ផ្ដើមចាប់តាំងពីចុងឆ្នាំ២០១៧កន្លងមក បន្ទាប់ពីបក្សប្រឆាំងត្រូវបានតុលាការកំពូលសម្រេចរំលាយចោល ហើយថ្នាក់ដឹកនាំជាន់ខ្ពស់ដល់ទៅ ១១៨រូប ត្រូវបានហាមឃាត់ធ្វើនយោបាយរយៈពេល ៥ឆ្នាំ។ ចំណែកមេដឹកនាំបក្សប្រឆាំង លោក កឹម សុខា ត្រូវបានសមត្ថកិច្ចចាប់ខ្លួនដាក់ឃុំ និងបន្តស្ថិតក្រោមបណ្ដឹងចោទពីបទ«ក្បត់ជាតិ»នៅតុលាការ។
ការបង្ក្រាបទៅលើបក្សប្រឆាំងនេះ បានកើតឡើងនៅក្រោយការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ ដែលបង្ហាញថា បក្សប្រឆាំងឈ្នះបានអាសនៈប្រហាក់ប្រហែលទៅនឹងបក្សកាន់អំណាច និងបានកើតឡើងនៅមុនការបោះឆ្នោតជាតិនៅឆ្នាំ២០១៨។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា មានប្រសាសន៍ថា អ្វីដែលលោកនាយករដ្ឋមន្ត្រី ហ៊ុន សែន លើកឡើងមិនទាន់បង្ហាញឱ្យឃើញច្បាស់នូវដំណោះស្រាយរវាងអ្នកនយោបាយបក្សកាន់អំណាច និងបក្សប្រឆាំងនោះឡើយ ប៉ុន្តែ លោកថា ដំណាក់កាលនេះ អ្នកនយោបាយ ត្រូវធ្វើយ៉ាងណាឱ្យប្រទេសជាតិរីកចម្រើន និងការពារប្រយោជន៍ជាធំ ទើបទទួលបានផលវិជ្ជមាន។
លោក ឯម សុវណ្ណារ៉ា ប្រាប់ថា៖ «ទស្សនៈខ្ញុំផ្ទាល់អ្នកនយោបាយប្រឆាំងគ្នា ប្រឆាំងទៅ ប៉ុន្តែត្រូវរក្សាផលប្រយោជន៍ជាតិឱ្យបានជូនប្រទេសជាតិ ទើបអាចប្រទេសមាននិរន្តរភាព បើធ្វើនយោបាយដើម្បីប្រឆាំងអ្នកនយោបាយនិងអ្នកនយោបាយ ធ្វើឱ្យជាតិប៉ះពាល់ មិនមែនអ្នកនយោបាយវ័យឆ្លាតទេ»៕