ប្រជាពលរដ្ឋប្រហែល១០០នាក់ មកពីស្រុកចំនួនពីរក្នុងខេត្តកំពង់ធំ បានប្រមូលផ្ដុំគ្នានៅមុខទីស្ដីការក្រសួងមហាផ្ទៃ នៅព្រឹកថ្ងៃនេះ ដើម្បីសួរនាំអំពីសំណើសុំអន្តរាគមន៍របស់ពួកគេដែលបានស្នើក្រសួងមួយនេះឱ្យជួយដោះស្រាយវិវាទដីធ្លី ដែលពួកគេចោទអាជ្ញាធរថា បានឃុបឃិតយកដីសម្បទានសង្គមកិច្ចដែលរដ្ឋាភិបាលឱ្យប្រជាពលរដ្ឋទៅជួលនិងអាស្រ័យផលខ្លួនឯង។
លោក ម៉ោញ នួន ដែលអះអាងថា ជាតំណាងប្រជាពលរដ្ឋ៣៦៧គ្រួសារ រស់នៅឃុំចំណារលើ ស្ថិតក្នុងស្រុកស្ទោង ប្រាប់ថា អាជ្ញាធរមូលដ្ឋាននៅឃុំផាត់សណ្ដាយ បានយកដីសម្បទានសង្គមកិច្ចទំហំ១ ៧៨៥ហិកតា ដែលលោកនាយករដ្ឋមន្ត្រី ហ៊ុន សែន ផ្ដល់ឱ្យប្រជាពលរដ្ឋអាស្រ័យផលតាំងពីឆ្នាំ២០១៤នោះ ទៅចែកសាច់ញាតិនិងជួលឱ្យប្រជាពលរដ្ឋទៅវិញ។
លោក ម៉ោញ នួន ប្រាប់ថា៖ «សម្ដេចថា ប្រជាជននៅឃុំបណ្ដែតទឹក និងឃុំផាត់សណ្ដាយ អត់មានដី ហើយរកនេសាទក៏មិនបាន។ ដូច្នេះ សម្ដេចក៏សម្បទានដីទៅឱ្យប្រជាជនឃុំផាត់សណ្ដាយ ឱ្យបានអាស្រ័យផល។ ក្រោយមក ដីនោះមិនទាន់បានដល់ដៃប្រជាពលរដ្ឋ មានតែឈ្មួញនិងមន្ត្រីឃុបឃិតគ្នា ខ្លះពាក់ព័ន្ធនឹងដីសម្ដេចឆ្វៀលឱ្យ។ អ៊ីចឹង ប្រជាជនមិនសុខចិត្ត នាំគ្នាឡើងមកតវ៉ា»។
ប្រាប់ថាជាពលរដ្ឋរស់នៅភូមិកំពង់ចម្លង ឃុំផាត់សណ្ដាយ លោក ញ៉ែម សុផល និយាយថា រូបគាត់និងអ្នកភូមិអស់ជំនឿលើការដោះស្រាយរបស់អាជ្ញាធរខេត្តហើយ បន្ទាប់ពីពួកគាត់បាននាំគ្នាតវ៉ានៅថ្នាក់ខេត្តអស់រយៈពេល៩ខែមកហើយនោះ ប៉ុន្តែគិតមកដល់ថ្ងៃនេះ នៅតែមិនមានដំណោះស្រាយ។
លោក ញ៉ែម សុផល ប្រាប់ថា៖ «មិនដឹងគាត់ចែកឱ្យអ្នកណា បើមិនឃើញដល់ដៃ ប្រជាពលរដ្ឋមកតវ៉ានេះ អត់បានទាំងអស់។ បើអត់បាន យើងខ្ញុំមានអីអាស្រ័យផល? បើយើងតវ៉ាទៅគាត់ ដីហ្នឹងមានគេអាស្រ័យផល ខ្ញុំចង់សួរថា ចំណុចអាស្រ័យផលហ្នឹង តើលោកអាស្រ័យផលហើយមុននឹងសម្ដេចឆ្វៀលឱ្យឬក្រោយសម្ដេចឆ្វៀលឱ្យ ខ្ញុំចង់សួរត្រង់ហ្នឹង។ បើក្រោយសម្ដេចឆ្វៀលឱ្យ ហេតុអីមិនចែកឱ្យពួកខ្ញុំ»។
បន្ទាប់ពីជួបប្រជុំជាមួយមន្ត្រីនៅក្រសួងមហាផ្ទៃ ពលរដ្ឋ លោក ម៉ោញ នួន ប្រាប់ថា ក្រសួងបានទទួលយកញត្តិរបស់ប្រជាពលរដ្ឋ ហើយបានសន្យាថា នឹងពិនិត្យលើសំណុំរឿងនេះទៅតាមការទាមទាររបស់ក្រុមអ្នកភូមិ។
វីអូឌីមិនអាចសុំការអត្ថាធិប្បាយពីឃុំផាត់សណ្ដាយ លោក ហេង មនោ បានទេ។
អភិបាលស្រុកកំពង់ស្វាយ លោក អ៊ុន បុត្ត បដិសេធចំពោះការចោទប្រកាន់ ដោយលោកថា ដីដែលប្រមុខរដ្ឋាភិបាលកាត់ឆ្វៀលឱ្យប្រជាពលរដ្ឋនោះ អាជ្ញាធរមិនបានយកទៅចែកសាច់ញាតិ និងជួលឬលក់ទេ។
លោកបន្តថា រដ្ឋាភិបាលបានផ្ដល់ដីនោះទៅឱ្យប្រជាពលរដ្ឋចំនួន៤២០គ្រួសារនៅឃុំផាត់សណ្ដាយ និងឃុំកំពង់គោ ដែលបាននិងកំពុងអាស្រ័យផលលើដីនោះផ្ទាល់ ប៉ុន្តែសម្រាប់ពលរដ្ឋនៅឃុំចំណារលើវិញ លោកថា មិនទទួលបានដីទេ។
លោក អ៊ុន បុត្ត ប្រាប់ថា៖ «ពលរដ្ឋ៤២០គ្រួសារ គាត់ទាមទារដី ហើយគាត់ធ្លាប់ធ្វើពីមុនមក។ ដល់ពេល ស.ជ.ណ.១០៤៤ និង១០០៣ ចេញមក គឺរដ្ឋាភិបាលនឹងប្រគល់ដីឱ្យប្រជាជន៤២០គ្រួសារ ឃុំផាត់សណ្ដាយ និងឃុំកំពង់គោ បន្តសិទ្ធិអាស្រ័យផល។ អ៊ីចឹង ប្រជាជនដែលតវ៉ានេះ អត់មាននៅក្នុង៤២០គ្រួសារ អត់មានឈ្មោះក្នុងបញ្ជីហ្នឹងទេ ហើយគាត់មានអ្នករៀបចំញុះញង់ឱ្យគាត់ឡើងមកអ៊ីចឹង»។
អ្នកសម្របសម្រួលសមាគមអាដហុកប្រចាំខេត្តកំពង់ធំ លោក សុខ រដ្ឋា ជំរុញទៅអាជ្ញាធរខេត្ត ឱ្យធ្វើការសម្របសម្រួលនិងស្រាវជ្រាវចំពោះប្រជាពលរដ្ឋដែលបានដាក់ពាក្យបណ្ដឹងទាមទារដីមុនពេលរដ្ឋាភិបាលកាត់ឆ្វៀលឡើងវិញ។
លោក សុក រដ្ឋា ប្រាប់ថា៖ «អាជ្ញាធរគួរតែពិនិត្យឡើងវិញនូវបញ្ជីឈ្មោះដែលធ្វើការតវ៉ាតាំងពីដើមមក ដែលអាជ្ញាធរគាត់ស្រង់ពីដើមមក នៅក្នុងពាក្យបណ្ដឹងរបស់ពួកគាត់ យកអាហ្នឹងមកពិនិត្យឡើងវិញ»។
លោកបន្តថា ប្រសិនបើអាជ្ញាធរមិនធ្វើការដោះស្រាយទេ លោកថា ជម្លោះដីធ្លីនេះនឹងកាន់តែធំឡើង ដោយសារប្រជាពលរដ្ឋនៅបន្តតវ៉ានិងទាមទារដីដែលរដ្ឋាភិបាលផ្ដល់ឱ្យពួកគេ៕
