មន្រ្តីក្រសួងការបរទេសវៀតណាម បានលើកឡើងថា ទំនាក់ទំនងរវាងកម្ពុជានិងវៀតណាម នៅតែល្អូកល្អិនរវាងគ្នានឹងគ្នា ហើយបានច្រានចោលការចុះផ្សាយទាំងឡាយណាដែលថា ទំនាក់ទំនងរវាងប្រទេសទាំងពីរមានផលប៉ះពាល់ដោយសារតែកម្ពុជាងាកទៅជិតស្និទ្ធជាមួយចិន។
សារព័ត៌មាន Viet Nam News បានចុះផ្សាយថា អ្នកនាំពាក្យក្រសួងការបរទេសវៀតណាម អ្នកស្រី Lê Thị Thu Hằng បានថ្លែងក្នុងសន្និសីទសារព័ត៌មានកាលពីម្សិលមិញថា វៀតណាមតែងតែការពារ ថែទាំ ក៏ដូចជាផ្តល់អាទិភាពខ្ពស់នូវមិត្តភាពជាប្រពៃណី និងជាអ្នកជិតខាងជាមួយកម្ពុជា ហើយប្រាថ្នាឱ្យទំនាក់ទំនងទ្វេភាគីនេះកាន់តែមាននិរន្តរភាពនិងគ្រប់ជ្រុងជ្រោយ ដើម្បីជាប្រយោជន៍សម្រាប់ប្រជាជននៃប្រទេសទាំងពីរ។
អ្នកស្រីបានបញ្ជាក់ក្នុងសន្និសីទដដែលនោះថា រយៈពេលថ្មីៗនេះ ទំនាក់ទំនងវៀតណាមជាមួយកម្ពុជា ក៏កាន់តែមានភាពរីកចម្រើនជាវិជ្ជមានលើគ្រប់វិស័យ។ អ្នកស្រីបានរំឭកកាលពីខែកុម្ភៈ ឆ្នាំ២០១៩ ប្រធានាធិបតីវៀតណាម លោក Nguyễn Phú Trọng បានដឹកនាំគណៈប្រតិភូជាន់ខ្ពស់មកបំពេញទស្សនកិច្ចនៅកម្ពុជា ហើយកាលពីខែធ្នូ ឆ្នាំ២០១៨ និងខែតុលា ឆ្នាំ២០១៩ លោកនាយករដ្ឋមន្រ្តី ហ៊ុន សែន ក៏បានដឹកនាំមន្រ្តីរបស់ខ្លួនទៅធ្វើទស្សនកិច្ចនៅវៀតណាមផងដែរ។
អ្នកស្រីបានបន្ថែមថា ក្រៅពីនេះ មេដឹកនាំប្រទេសទាំងពីរ ក៏បានជជែកគ្នាពីការឆ្លើយតបទៅនឹងជំងឺកូវីដ១៩ និងការរក្សាការដោះដូរទំនិញ ក៏ដូចជាសកម្មភាពពាណិជ្ជកម្មតាមព្រំដែនផងដែរ។
វីអូឌី ពុំអាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា លោក កុយ គួង បានទេ នៅថ្ងៃសុក្រនេះ។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត យល់ស្របចំពោះការលើកឡើងរបស់អ្នកនាំពាក្យក្រសួងការបរទេសវៀតណាម អ្នកស្រី Lê Thị Thu Hằng។ លោកថា ចំណងមិត្តភាពនិងសាមគ្គីភាពរវាងកម្ពុជា-វៀតណាម មានតាំងពីយូរណាស់មកហើយ និងនៅក្រោមការដឹកនាំរបស់លោកនាយករដ្ឋមន្ត្រី ហ៊ុន សែន បច្ចុប្បន្ន ចំណងមិត្តភាពរវាងកម្ពុជាវៀតណាមនៅតែបន្តដោយមិនអាចបាត់ភាគីណាមួយឡើយ។
លោកបន្ថែមថា៖ «មិនអាចបាត់មួយមានមួយបានទេ យើងមិនអាចលើកទឹកដីវៀតណាមឬទឹកដីកម្ពុជាឱ្យឆ្ងាយពីគ្នាបានទេ។ នេះជាកត្តាសត្យានុម័តដែលរាជរដ្ឋាភិបាល គណបក្សប្រជាជនកម្ពុជា មាននយោបាយកសាងមិត្តភាព សាមគ្គីភាពជាមួយប្រទេសជិតខាង ដែលមិនមែនតែជាមួយប្រទេសវៀតណាមទេ គឺមានប្រទេសឡាវ ថៃ គឺយើងមានគោលនយោបាយការបរទេសត្រឹមត្រូវល្អ ដើម្បីសេចក្តីសុខរបស់ប្រជាពលរដ្ឋជាមួយប្រទេសជិតខាង»។
អ្នកនាំពាក្យរូបនេះបន្តថា ការដែលលើកឡើងថា ទំនាក់ទំនងវៀតណាម-កម្ពុជាមានផលប៉ះពាល់ ដោយសារតែកម្ពុជាងាកទៅជិតស្និទ្ធជាមួយចិននោះ គឺជាល្បិចកលរបស់ក្រុមប្រឆាំងដែលលោកថា តែងតែបំបែកបំបាក់សាមគ្គីភាពកម្ពុជាវៀតណាមតែប៉ុណ្ណោះ។
សាស្ត្រាចារ្យផ្នែកការទូត និងកិច្ចការពិភពលោកនៃសាកលវិទ្យាល័យ Occidental នៅសហរដ្ឋអាមេរិក លោកបណ្ឌិត អៀ សុផល បានលើកឡើងថា កម្ពុជាប្រហែលជាអាចខិតជិតចិនជាងមែន ដោយលោកបានលើកឡើងពីបញ្ហាសមុទ្រចិនខាងត្បូងថា កម្ពុជាហាក់នៅខាងចិនជាជាងវៀតណាម។
ទោះជាយ៉ាងណា លោកថា ប្រទេសវៀតណាមមិនរិះគន់ជាសាធារណៈដែរ ហើយទាំងវៀតណាមនិងកម្ពុជា ក៏មិនបែរខ្នងដាក់គ្នា និងនិយាយមិនល្អពីគ្នាដែរ។ លោកបន្តថា វៀតណាមនឹងជជែកជាលក្ខណៈឯកជនជាមួយកម្ពុជា ហើយលោកថា ការប្រើប្រាស់បណ្តាញសង្គមឬសេចក្តីប្រកាសព័ត៌មានដោយបង្ហោះលើអ៊ិនធឺណិត មិនមែនជាមធ្យោបាយការទូតល្អនោះទេ៕