អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន អះអាងថា ការសម្រេចឱ្យមន្ទីរសម្រាកព្យាបាល លី ស្រីវីណា បើកដំណើរការឡើងវិញបន្ទាប់ពីត្រូវបានបិទមួយរយៈនោះ គឺអាស្រ័យទៅលើលក្ខខណ្ឌនិងកិច្ចសន្យាត្រឹមត្រូវ។
មន្ទីរសម្រាកព្យាបាល លី ស្រីវីណា ត្រូវបានក្រសួងសុខាភិបាលសម្រេចឱ្យបើកដំណើរការឡើងវិញនៅថ្ងៃនេះ បន្ទាប់ពីបានបិទមួយរយៈដោយសារខ្វះលក្ខណៈសម្បត្តិក្នុងការជួយសង្គ្រោះអ្នកជំងឺ ក្រោយពីអ្នកជំងឺម្នាក់ស្លាប់។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានផ្ញើសារប្រាប់អ្នកសារព័ត៌មានតាមតេឡេក្រាមនៅថ្ងៃនេះថា ក្រសួងបានសម្រេចឱ្យមន្ទីរសម្រាកព្យាបាល លី ស្រីវីណា ដំណើរការឡើងវិញ ដោយសារគោរពតាមការកំណត់បម្រើតែសេវាបឋម និងមានកិច្ចសន្យាត្រឹមត្រូវតាមការណែនាំរបស់ក្រសួងសុខាភិបាល។
កាលពីថ្ងៃទី៦ ខែវិច្ឆិកា ក្រសួងសុខាភិបាលបានសម្រេចបិទមន្ទីរសំរាកព្យាបាលឈ្មោះ លី ស្រីវីណា ដែលជាកម្មសិទ្ធិរបស់អតីតតំណាងរាស្ត្របក្សប្រឆាំង លោកស្រី លី ស្រីវីណា ដោយហេតុផលថា មន្ទីរសម្រាកព្យាបាលនេះពុំមានលក្ខណៈសម្បត្តិគ្រប់គ្រាន់ក្នុងការផ្តល់សេវាសង្គ្រោះអ្នកជំងឺ បន្ទាប់ពីអ្នកជំងឺម្នាក់ស្លាប់។
យោងតាមសេចក្តីជូនដំណឹងរបស់មន្ទីរសម្រាកព្យាបាល លី ស្រីវីណា នៅលើបណ្តាញសង្គមហ្វេសប៊ុករបស់ខ្លួនកាលពីម្សិលមិញ បានឱ្យដឹងថា មន្ទីរសម្រាកព្យាបាលនេះនឹងចាប់ផ្តើមបើកទទួលព្យាបាលអ្នកជំងឺឡើងវិញ ចាប់ពីម៉ោង៣រសៀល ថ្ងៃទី២០ ខែវិច្ឆិកានេះតទៅ។
នៅពេលស្នើសុំបកស្រាយនៅថ្ងៃនេះ អ្នកស្រី លី ស្រីវីណា ប្រាប់ថា អ្នកស្រីសុំមិនបកស្រាយទៅកាន់អ្នកសារព័ត៌មាននោះឡើយ។
បីថ្ងៃក្រោយពីក្រសួងសុខាភិបាលបានប្រកាសបិទមន្ទីរសម្រាកព្យាបាលនេះ អ្នកស្រី លី ស្រីវីណា ដែលជាអតីតតំណាងរាស្ត្រអតីតគណបក្សសង្គ្រោះជាតិ បានដាក់សំណើទៅក្រសួងមហាផ្ទៃ ដើម្បីស្នើសុំសិទ្ធិធ្វើនយោបាយឡើងវិញ។
ក្រោយមក នៅថ្ងៃទី៩ ខែវិច្ឆិកានោះដែរ លោកស្រី លី ស្រីវីណា ក៏បានសរសេរលិខិតដាច់ដោយឡែកទៀតទៅកាន់លោកនាយករដ្ឋមន្ត្រី ហ៊ុន សែន ដើម្បីសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ក្រោយពីមានសំណើពីនាយករដ្ឋមន្ត្រី ព្រះមហាក្សត្រ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បានចេញព្រះរាជក្រឹត្យ ចុះថ្ងៃទី១២ ខែវិច្ឆិកា ឆ្នាំ២០២០ ត្រាស់បង្គាប់ផ្តល់នីតិសម្បទាឡើងវិញដល់លោកស្រី លី ស្រីវីណា ដែលត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល៥ឆ្នាំ តាមអំណាចសាលដីការបស់តុលាការ កាលពីថ្ងៃទី១៦ ខែវិច្ឆិកា ឆ្នាំ២០១៧។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា មានប្រសាសន៍ថា ការបើកដំណើរការមន្ទីរសម្រាកព្យាបាលនោះ ទំនងជារងសម្ពាធនយោបាយច្រើនជាងហេតុផលដែលក្រសួងអះអាងថា គោរពតាមការកំណត់បម្រើតែសេវាបឋម និងមានកិច្ចសន្យាត្រឹមត្រូវតាមការណែនាំរបស់ក្រសួងសុខាភិបាល។
លោក ស៊ឹង សែនករុណា មានប្រសាសន៍ថា៖ «បញ្ហានេះ ខ្ញុំគិតថា វាអាចពាក់ព័ន្ធស្ថានភាពនយោបាយ ពីព្រោះយើងឃើញរូបភាពចុងក្រោយ យើងឃើញមានលិខិតស្នើសុំចុះចូលផង [ចុះចូលជាមួយគណបក្សប្រជាជន] មានលិខិតស្នើសុំនីតិសម្បទាឡើងវិញ។ វាទាល់តែមានរូបភាពបែបហ្នឹងហើយ បានយើងឃើញមានការផ្តល់នូវសិទ្ធិឡើងវិញ បើសិនជាយើងប្រតិបត្តិច្បាប់ បើសិនជាមិនមានលក្ខណៈបច្ចេកទេស វិជ្ជាជីវៈត្រឹមត្រូវ ប្រហែលជាមិនអាចឱ្យបើកឡើងវិញបានទេ»។
ករណីនេះ លោក ករុណា ជំរុញទៅក្រសួងសុខាភិបាលត្រូវធ្វើការបកស្រាយឱ្យបានច្បាស់លាស់ជុំវិញការបិទនិងបើកឡើងវិញ ចំពោះមន្ទីរសម្រាកព្យាបាលលោកស្រី លី ស្រីវីណា ដើម្បីកុំឱ្យប្រជាពលរដ្ឋមានការសង្ស័យលើបញ្ហានេះ៕
