អាជ្ញាធររាជធានីភ្នំពេញ បានទម្លាក់កំហុសទៅលើសង្គមស៊ីវិលដែលឈរឃ្លាំមើលការតវ៉ាថា បានដឹកនាំក្រុមភរិយានិងសាច់ញាតិអតីតសកម្មជនបក្សប្រឆាំង ទៅប្រមូលផ្តុំតវ៉ាដាក់ញត្តិនៅមុខព្រះបរមរាជវាំង បង្កឱ្យប៉ះពាល់សណ្ដាប់ធ្នាប់សាធារណៈ។
នៅព្រឹកថ្ងៃសុក្រនេះ ក្រុមស្ត្រីប្រហែល២០នាក់បាននាំគ្នាទៅប្រមូលផ្ដុំនិងស្រែកទាមទារនៅខាងត្បូងព្រះបរមរាជវាំងជាថ្មីទៀត ដើម្បីស្នើសុំព្រះមហាក្សត្រព្រះរាជទានជួយអន្តរាគមន៍ឱ្យមានការលើកលែងទោសដល់ស្វាមីនិងឱពុកម្ដាយរបស់ពួកគេដែលកំពុងជាប់ឃុំនៅពន្ធនាគារ។
ប៉ុន្តែការស្រែកទាមទារនេះ ត្រូវបានសន្តិសុខខណ្ឌដូនពេញ បានរារាំងនិងរុញច្រានពួកគេឱ្យទៅប្រមូលផ្តុំឆ្ងាយពីរបងព្រះបរមរាជវាំង ដោយអាជ្ញាធរថា ការស្រែកទាមទារនេះបានធ្វើឱ្យប៉ះពាល់ដល់សណ្ដាប់ធ្នាប់សាធារណៈនិងប៉ះពាល់សិទ្ធិមនុស្ស។
គណៈបញ្ជាការឯកភាពសាលាខណ្ឌដូនពេញដែលជិះតាមរថយន្ត បានស្រែកតាមឧគ្ឃោសនសព្ទ ដោយស្នើឱ្យសង្គមស៊ីវិលដែលពួកគេថាជាអ្នកដឹកនាំការប្រមូលផ្តុំនោះ ឱ្យជួយសម្របសម្រួលជាមួយក្រុមអ្នកប្រមូលផ្តុំ កុំឱ្យស្រែកតវ៉ាបែបនេះ។
គណៈបញ្ជាការឯកភាពសាលាខណ្ឌដូនពេញ បានថ្លែងថា៖ «ជាពិសេស បងអង្គការដែលដឹកនាំមក សូមឱ្យសម្រលសម្រួល អញ្ជើញគាត់ឱ្យមកសួនច្បារនេះមក ដើម្បីរក្សាសណ្ដាប់ធ្នាប់ របៀបរៀបរយ កុំឱ្យមានការរំខានដល់ព្រះបរមរាជវាំង។ លោក-លោកស្រីដែលជាអង្គការដែលឃ្លាំមើល អញ្ជើញពួកគាត់ឱ្យមកខាងសួនច្បារ ចៀសវាងមកប្រមូលផ្ដុំ ស្រែកឡូឡា សំឡេងរំខានដល់ព្រះបរមរាជវាំង»។
វីអូឌី មិនអាចសុំការអធិប្បាយពីអភិបាលខណ្ឌដូនពេញ លោក សុខ ពេញវុធ បានទេ។
ភរិយាលោក កាក់ កុម្ភារ អតីតសកម្មជនបក្សប្រឆាំង គឺអ្នកស្រី ព្រុំ ចន្ថា ប្រាប់អ្នកសារព័ត៌មានថា ពួកគាត់ចេញតវ៉ារៀងរាល់សប្ដាហ៍ មិនមានអង្គការសង្គមស៊ីវិលឬស្ថាប័នណាមួយដឹកនាំឡើយ។ អ្នកស្រីបន្តថា ការដែលពួកគាត់តវ៉ានេះ ដោយសារការចាប់ខ្លួននិងចោទប្រកាន់លើស្វាមីនិងអ្នកពាក់ព័ន្ធដោយអយុត្តិធម៌។
អ្នកស្រីថា៖ «[អង្គការសង្គមស៊ីវិល] មិនបានដឹកនាំទេ ពួកខ្ញុំឈឺចាប់ រងអំពើអយុត្តិធម៌ គេចាប់ប្ដី ចាប់ឪពុក ចាប់ម្ដាយ។ អ៊ីចឹងពួកខ្ញុំជាស្រ្តីដែលពិបាកបំផុត ត្រូវទាមទាររកយុត្តិធម៌ ព្រោះពួកគាត់អត់មានខុសអីផង […] អ៊ីចឹងពួកខ្ញុំត្រូវតែមានការទាមទារ ចាប់ប្ដីខ្ញុំទៅ បង្គោលគ្រួសារខ្ញុំទៅ បោកឆ្នាំងបាយពួកខ្ញុំទៅ សួរថា ពួកខ្ញុំមិនត្រូវទាមទារ? ហើយឱ្យខ្ញុំនៅស្ងាត់ស្ងៀមមែន?»
កូនស្រីអ្នកគាំទ្រអតីតគណបក្សប្រឆាំងនៅខេត្តកណ្ដាល ដែលសមត្ថកិច្ចចាប់ខ្លួនម្ដាយរបស់ពួកគេ កាលពីថ្ងៃទី២៣ ខែតុលា ឆ្នាំ២០២០ នៅមុខស្ថានទូតចិនប្រចាំកម្ពុជា កញ្ញា ផាន សាត បាននិយាយថា ពួកគេមិនចង់ទៅស្រែកតវ៉ា ហើយមកទ្រាំឱ្យអាជ្ញាធររុញច្រានបែបនេះទេ ប៉ុន្តែដោយយល់ថា ការចាប់ខ្លួននិងការចោទប្រកាន់លើម្ដាយជារឿងអយុត្តិធម៌សម្រាប់គ្រួសារពួកគាត់ ទើបពួកគាត់ធ្វើបែបនេះ។
កញ្ញា ផាន សាត បន្តថា៖ «គេចាប់ខ្ញុំ ម្ដាយខ្ញុំ អ៊ីចឹងគឺត្រូវតែមកហើយ បើគាត់មានកំហុស ខ្ញុំក៏មិនមកដែរ តែគាត់គ្មានកំហុសសោះ អយុតិ្តធម៌សម្រាប់គាត់ដែលចាប់គាត់ហ្នឹង»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា ហៅកាត់ CCHR លោកស្រី ចក់ សុភាព មានប្រសាសន៍ថា ក្រុមការងាររបស់លោកស្រីចុះទៅ គឺក្នុងនាមជាអ្នកសង្កេតការណ៍និងឃ្លាំមើលមិនមែនជាអ្នកដឹកនាំការប្រមូលផ្តុំតវ៉ាដូចការចោទប្រកាន់ឡើយ។
លោកស្រីបន្តថា ការចុះទៅសង្កេតឬឃ្លាំមើលរបស់អង្គការនេះ គឺធ្វើឡើងគ្រប់ព្រឹត្តិការណ៍ដែលកើតឡើង មិនមែនធ្វើតែលើគ្រួសារអតីតសកម្មជនបក្សប្រឆាំងនោះទេ។ លោកស្រីចាត់ទុកការលើកឡើងរបស់អាជ្ញាធរនេះ ថាមិនបានយល់ពីតួនាទីរបស់សង្គមស៊ីវិល។
លោកស្រី ចក់ សុភាព ថា៖ «មួយរយៈនេះ ក្រុមការងារដែលយើងចុះទៅអង្កេតការក៏ទទួលនូវការគំរាមកំហែងមួយចំនួនដែរ ដូចការលើកឡើងរបស់សមត្ថកិច្ច ធ្វើការចោទប្រកាន់ថា ក្រុមការងារយើងជាអ្នកបម្រើឱ្យបរទេស ដូចព្រឹកមិញនេះ ខាងសារព័ត៌មានបានឃើញដូចគ្នា គឺមានការចោទប្រកាន់ថា យើងនៅពីក្រោយខ្នងឬយើងជាអ្នកដឹកនាំបាតុកម្មជាដើម»។
នេះជាលើកទី៣ ដែលក្រុមភរិយានិងសាច់ញាតិអតីតសកម្មជនបក្សប្រឆាំង ទៅស្វែងរកព្រះរាជអន្តរាគមន៍ពីព្រះមហាក្សត្រ ប៉ុន្តែការដាក់ញត្តិនិងស្រែកទាមទារនេះ មិនមានមន្ត្រីព្រះបរមរាជវាំងចេញមកទទួលញត្តិឡើយ។
បើតាមក្រុមស្ត្រីទាំងនោះ ពួកគេបានធ្វើយុទ្ធនាការតវ៉ាទាមទារឱ្យដោះលែងស្វាមីនិងឪពុករបស់ពួកគាត់ពីក្រសួង ស្ថាប័នពាក់ព័ន្ធ និងអង្គការទូតនានា អស់រយៈពេល២២សប្តាហ៍មកហើយ គិតមកដល់ថ្ងៃសុក្រ ទី២០ ខែវិច្ឆិកានេះ៕
