ក្រសួងសុខាភិបាលនិយាយថា វិធានការដ៏មានប្រសិទ្ធភាពទប់ស្កាត់ជំងឺកូវីដ១៩ មិនឱ្យឆ្លងចូលសហគមន៍ ពាក់ព័ន្ធព្រឹត្តិការណ៍៣វិច្ឆិកា ជាសមត្ថភាពអច្ឆរិយរបស់នាយករដ្ឋមន្ត្រី ខណៈលទ្ធផលធ្វើតេស្តលើកទី៤ ដែលជាតេស្តលើកចុងក្រោយលើមនុស្សជាង១ពាន់នាក់កាលពីម្សិលមិញ គឺអវិជ្ជមានទាំងអស់។
អ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន បានលើកឡើងតាមរយៈអត្ថបទមួយចេញផ្សាយលើបណ្តាញសង្គមរបស់ក្រសួង នៅថ្ងៃទី១៩ ខែវិច្ឆិកា ឆ្នាំ២០២០នេះ ថាកម្ពុជាពិតជាមានសំណាងដែលមានប្រមុខដឹកនាំប្រទេសមានសមត្ថភាពអច្ឆរិយ ឈ្លាសវៃ ធ្វើឱ្យកម្ពុជាមិនមានការចម្លងវីរុសកូវីដ-១៩ ចូលក្នុងសហគមន៍ និងមិនទាន់មានអ្នកស្លាប់ដោយសារជំងឺនេះនៅឡើយរហូតមកទល់ពេលនេះ។
លោកស្រីសរសេរទៀតថា៖ «ព្រឹត្តិការណ៍៣វិច្ឆិកា បានបង្ហាញយ៉ាងច្បាស់ថា ប្រទេសតូចតាចមួយនេះ ក្រោមកណ្តាប់ដៃដែកថែបរបស់នាយករដ្ឋមន្ត្រី គឺពិតជាមានសមត្ថភាពពេញលេញក្នុងការគ្រប់គ្រងស្ថានភាពរាតត្បាតនៃជំងឺកូវីដ១៩ ដ៏កាចសាហាវមួយនេះ បានទាន់ពេលវេលា ប្រកបដោយប្រសិទ្ធភាពល្អប្រសើរបំផុត ដែលធ្វើឱ្យប្រជាជនកម្ពុជាអាចចៀសផុតបាននូវការចម្លងក្នុងលក្ខណៈទ្រង់ទ្រាយធំ»។
លោកស្រី ឱ វណ្ណឌីន គូសបញ្ជាក់ថា ការជួយផ្តល់ជាជំនួយសម្ភារនិងបរិក្ខារពេទ្យដល់ប្រជាជនឡាវ សម្រាប់ប្រយុទ្ធប្រឆាំងនឹងជំងឺកូវីដ១៩នាពេលថ្មីៗនេះ ក៏បានបង្ហាញដល់បណ្តាប្រទេសនានានិងពិភពលោកទាំងមូលថា កម្រមានប្រទេសណាដែលគ្រប់គ្រងស្ថានការណ៍បានរហ័ស លឿនទាន់ពេលវេលា និងកាត់ផ្តាច់បាននូវខ្សែចម្លងវីរុសកូវីដ-១៩ នៅក្នុងប្រទេសបានឆាប់និងល្អប្រសើរដូចមេដឹកនាំកម្ពុជា។
ប៉ុន្តែនៅពេលសួរថា តើព្រឹត្តិការណ៍៣វិច្ឆិកានេះ ក្រសួងចំណាយថវិកាជាតិអស់ប៉ុន្មានក្នុងការគ្រប់គ្រងស្ថានការណ៍នេះ លោកស្រីថា មិនទាន់មានព័ត៌មានពីរដ្ឋមន្ត្រីនៅឡើយ ។
លោកស្រីថា៖ «គាត់ [រដ្ឋមន្ត្រីក្រសួងសុខាភិបាល លោក ម៉ម ប៊ុនហេង] អត់ប្រាប់ខ្ញុំផង ខ្ញុំមិនដឹង»។
វីអូឌី នៅពុំទាន់អាចសុំការបញ្ជាក់ពីរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បាននៅឡើយទេ នៅថ្ងៃព្រហស្បតិ៍នេះ ខណៈអគ្គនាយករដ្ឋបាលនិងហិរញ្ញវត្ថុក្រសួងសុខាភិបាល លោកស្រី យក់ សម្បត្តិ ប្រាប់ថាជាប់ប្រជុំ។
ប៉ុន្តែក្រសួងធ្លាប់បញ្ជាក់ក្នុងលិខិតចុះថ្ងៃទី៣១ ខែសីហា ឆ្នាំ២០២០ ថា សម្រាប់ជនបរទេសម្នាក់ការធ្វើតេស្តម្តង ត្រូវបង់១០០ដុល្លារ។ ប៉ុន្តែព្រឹត្តិការណ៍៣វិច្ឆិកានេះ រដ្ឋាភិបាលប្រកាសថា រដ្ឋជាអ្នកចំណាយ បូកទាំងមណ្ឌលសម្រាប់ធ្វើចត្តាឡីស័កផងដែរ។
លោកនាយករដ្ឋមន្ត្រី ហ៊ុន សែន ធ្លាប់ប្រកាសផ្ទាល់មាត់ឱ្យមន្ត្រីប្រើពាក្យព្រឹត្តិការណ៍៣វិច្ឆិកា ជំនួសការប្រើពាក្យការឆ្លងកូវីដ១៩នៅកម្ពុជា កើតចេញពីរដ្ឋមន្ត្រីក្រសួងការបរទេសហុងគ្រី ដែលមកទស្សនកិច្ចនៅកម្ពុជាកាលពីថ្ងៃទី៣ ខែវិច្ឆិកា ដើម្បីកុំឱ្យប៉ះពាល់ទំនាក់ទំនងការទូតរវាង កម្ពុជា-ហុងគ្រី។
បញ្ហានេះ លោកនាយករដ្ឋមន្ត្រីធ្លាប់ដាក់ចេញនូវអនុសាសន៍ឱ្យបញ្ចប់ព្រឹត្តិការណ៍៣វិច្ឆិកានេះ ត្រឹម៣សប្តាហ៍ ចាប់ពីថ្ងៃដែលកម្ពុជាបានប៉ះពាល់រដ្ឋមន្ត្រីការបរទេសហុងគ្រី ដែលត្រូវបានរកឃើញថាមានផ្ទុកកូវីដ១៩ពេលទៅដល់ប្រទេសថៃ បន្ទាប់ពីបញ្ចប់ទស្សនកិច្ចផ្លូវការរយៈពេល១ថ្ងៃនៅកម្ពុជា។
លោកថា៖ «ដើម្បីរំលត់សភាពការណ៍ ដែលហៅថា៣វិច្ឆិកានេះបាន ទាមទារឱ្យមានធ្វើចត្តាឡីស័កឱ្យបានហ្មត់ចត់បំផុត បើមិនដូច្នោះទេ មហន្តរាយនឹងកើតមានសម្រាប់ប្រទេសយើង មិនខុសពីប្រទេសដទៃដែលកំពុងតែឆ្លងកាត់នូវរោគរាតត្បាតទូទាំងប្រទេសដែលត្រួតត្រាមិនបាន»។
បើតាមក្រសួងសុខាភិបាល ព្រឹត្តិការណ៍៣វិច្ឆិកា មានមនុស្ស១ ៤២២នាក់ រួមទាំងនាយករដ្ឋមន្ត្រីផង ត្រូវក្រសួងសុខាភិបាលប្រកាសថា បានយកសំណាកមកធ្វើតេស្តរហូត៤ដង ដើម្បីតាមដានសុខភាព តែលទ្ធផលអវិជ្ជមាន។ តែយ៉ាងណា មានមនុស្ស៤នាក់បានឆ្លងវីរុសនេះក្នុងព្រឹត្តិការណ៍៣វិច្ឆិកា ប៉ុន្តែបានព្យាបាលជាសះស្បើយម្នាក់ នៅសល់៣នាក់ទៀតកំពុងសម្រាកព្យាបាលនៅមន្ទីរពេទ្យ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ហៅការអះអាងពីប្រសិទ្ធភាពក្នុងការដោះស្រាយវិបត្តិកូវីដ១៩ ក្នុងព្រឹត្តិការណ៍៣វិច្ឆិកានេះ ថាជាដំណឹងល្អសម្រាប់កម្ពុជា។ ប៉ុន្តែលោកថា ព្រឹត្តិការណ៍នេះអាចប៉ះពាល់ដល់ការចំណាយថវិកាជាតិ សម្រាប់គាំពារដល់យុទ្ធនាការទប់ស្កាត់ ខណៈកម្ពុជាកំពុងរងផលប៉ះពាល់ពីវិបត្តិនេះស្រាប់។
លោកព្រួយបារម្ភថា ហានិភ័យរបស់ប្រទេសអាចមិនបញ្ចប់ត្រឹមព្រឹត្តិការណ៍៣វិច្ឆិកានេះទេ បើរដ្ឋាភិបាលនៅបន្តធ្វេសប្រហែស នៅពេលជួបមន្ត្រីនានាក្នុងទំនាក់ទំនងការទូតនោះ។
លោកថា៖ «ការធ្វេសប្រហែស ដូចការដែលលោករដ្ឋមន្ត្រីការបរទេសហុងគ្រីអញ្ជើញមកហ្នឹង នេះជាការធ្វេសប្រហែសមួយធំ អាចបង្កហានិភ័យដល់សុខភាពសាធារណៈណាស់។ យើងគួរតែបន្តធ្វើតាមគោលការណ៍ណែនាំផ្នែកសុខភាពពីអង្គការសុខភាពពិភពលោក ទាក់ទងទៅនឹងយន្តការទប់ស្កាត់ការឆ្លងជំងឺនេះ»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មានប្រសាសន៍ថា៖ «ការធ្វេសប្រហែសរបស់រដ្ឋហ្នឹង ធ្វើឱ្យបន្ទុកចំណាយរបស់រដ្ឋកាន់តែខ្ពស់ថែមទៀត មិនត្រឹមប៉ុណ្ណឹងទេ វាប៉ះទៅដល់ការរកទទួលទានរបស់ប្រជាពលរដ្ឋយើង ពិសេសអ្នកដែលប្រកបមុខរបរតូចតាចនិងមធ្យមអីហ្នឹង គឺយើងឃើញថាមានការប៉ះពាល់»។
លោក មឿន តុលា លើកជាឧទាហរណ៍ថា ពេលពលរដ្ឋតវ៉ាទាមទាររកយុត្តិធម៌រឿងដីធ្លីជាដើម អាជ្ញាធររារាំងឬបំបែក ក្រោមហេតុផលថា ទប់ស្កាត់ការឆ្លងរាលដាលកូវីដ-១៩ ប៉ុន្តែថា កម្មវិធីរបស់រដ្ឋមួយចំនួនមានការជួបជុំមនុស្សច្រើនជាងអ្នកតវ៉ា តែមន្ត្រីភាគច្រើនមិនបានពាក់ម៉ាស តាមការណែនាំរបស់ក្រសួងសុខាភិបាលទេ។
ទោះយ៉ាងណា ក្រោយបិទបញ្ចប់ព្រឹត្តិការណ៍៣វិច្ឆិកានៅរាជធានីភ្នំពេញ និងខេត្តមួយចំនួនកាលពីថ្ងៃម្សិលមិញ ខណៈខេត្តមួយចំនួនទៀតនឹងបញ្ចប់ការធ្វើចត្តាឡីស័កជាបន្តបន្ទាប់រហូតដល់ថ្ងៃទី២៥ ខែវិច្ឆិកា រដ្ឋាភិបាលបានប្រកាសអនុញ្ញាតឱ្យរៀបចំពិធីរៀបអាពាហ៍ពិពាហ៍ ពិធីបុណ្យតាមបែបសាសនា សារមន្ទីរ រោងភាពយន្ត ចាប់ពីថ្ងៃនេះ ខណៈការបើកដំណើរការសាលារៀននៅរាជធានីភ្នំពេញ និងទីរួមខេត្តកណ្តាល នឹងចាប់ផ្តើមនៅថ្ងៃចន្ទសប្តាហ៍ក្រោយ ដោយត្រូវគោរពតាមវិធានសុខភាពរបស់ក្រសួងសុខាភិបាល៕
