សាលាដំបូងខេត្តកោះកុង អះអាងថា ករណីតំណាងពលរដ្ឋ៣នាក់នៅឃុំជីខក្រោម ស្រុកស្រែអំបិល ដែលកំពុងជាប់បណ្តឹងនៅតុលាការខេត្តនេះ មិនមែនជាសំណុំរឿងជាប់ពាក់ព័ន្ធវិវាទដីធ្លីនោះទេ។
ការអះអាងរបស់តុលាការនេះធ្វើឡើងបន្ទាប់ពីអ្នកភូមិប្រមាណ៥០០នាក់មកពីស្រុកចំនួន៣នៃខេត្តកោះកុង បានប្រមូលផ្តុំគ្នាតវ៉ាមុខសាលាដំបូងខេត្តកាលពីថ្ងៃម្សិលមិញ ខណៈតំណាងពលរដ្ឋ៣នាក់ចូលបំភ្លឺនៅចំពោះមុខតុលាការទៅតាមបណ្តឹងរបស់បុគ្គលម្នាក់ឈ្មោះ ឆាយ វី។
ក្នុងសេចក្តីថ្លែងការណ៍មួយចុះថ្ងៃទី១៨ ខែវិច្ឆិកា សាលាដំបូងខេត្តកោះកុងឱ្យដឹងថា តំណាងពលរដ្ឋ៣នាក់ រួមមាន អ្នកស្រី ផាវ ញ៉ើង អ្នកស្រី សេង លីន និងអ្នកស្រី ខន ផុន ត្រូវបានអយ្យការអមសាលាដំបូងខេត្តកោះកុង ចោទប្រកាន់ពីបទ «ញុះញង់ឱ្យប្រព្រឹត្តអំពើបង្កឱ្យមានការវឹកវរដល់សន្តិសុខសង្គម និងបទបរិហារកេរិ៍្តជាសាធារណៈ» ដែលមានអ្នកស្រី ឆាយ វី ជាដើមបណ្តឹង។
តុលាការខេត្តកោះកុងបានលើកឡើងថា កាលពីម្សិលមិញនេះ តំណាងពលរដ្ឋទាំង៣នាក់នោះ បានចូលខ្លួនទៅបំភ្លឺចំពោះមុខចៅក្រមស៊ើបសួរ ហើយមានពលរដ្ឋជាច្រើននាក់មកពីស្រុកស្រែអំបិល ស្រុកបទុមសាគរ និងគិរីសាគរ បានមកស្រែកតវ៉ាមុខតុលាការសុំឱ្យដោះស្រាយរឿងវិវាទដីធ្លីទៅវិញ។
សេចក្តីថ្លែងការណ៍ដដែលបញ្ជាក់ថា សំណុំរឿងរបស់តំណាងពលរដ្ឋ៣នាក់នោះជាសំណុំរឿងព្រហ្មទណ្ឌ មិនមែនជាសំណុំរឿងពាក់ព័ន្ធវិវាទដីធ្លីឡើយ។
តំណាងពលរដ្ឋម្នាក់ អ្នកស្រី ផាវ ញ៉ើង នៅតែអះអាងថា ករណីអ្នកស្រី ឆាយ វី ប្តឹងពួកគាត់ទៅតុលាការនោះគឺពាក់ព័ន្ធវិវាទដីធ្លី ដោយអ្នកស្រីថា រឿងនេះកើតឡើងដោយសារអ្នកស្រីនិងប្រជាពលរដ្ឋរាប់រយនាក់ បានយកពាក្យបណ្តឹងទៅដាក់នៅក្រសួងមហាផ្ទៃលើករណីអ្នកស្រី ឆាយ វី បានឃុបឃិតគ្នាលួចលក់ដីសហគមន៍ទៅឱ្យអ្នកមានលុយមានអំណាច។
អ្នកស្រី ផាវ ញ៉ើង ប្រាប់ថា៖ «ខ្ញុំបានដាក់ពាក្យបណ្តឹងអ្នកស្រី ឆាយ វី វិញហើយកាលពីម្សិលមិញ។ ខ្ញុំចោទ ឆាយ វី វិញ ពីបទបរិហារកេរ្តិ៍ខ្ញុំវិញ ដោយសារគាត់បានលួចលក់ដីមែន ខ្ញុំមានទាំងសាក្សីនិងភស្តុតាង»។
បើតាមអ្នកស្រី ផាវ ញ៉ើង ក្រោយចូលឆ្លើយបំភ្លឺចំពោះចៅក្រមស៊ើបសួរកាលពីម្សិលមិញ តុលាការបានសម្រេចឱ្យពួកគាត់នៅក្រៅឃុំ និងដាក់ស្ថិតក្រោមការត្រួតពិនិត្យរបស់តុលាការ។
អ្នកស្រី ឆាយ វី ដែលជាដើមបណ្តឹង និងជាអតីតតំណាងពលរដ្ឋសហគមន៍១៧៥ ប្រាប់វីអូឌីម្សិលមិញថា អ្នកស្រីមិនបានលួចលក់ដីរដ្ឋឬដីសហគមន៍ដូចតំណាងពលរដ្ឋ៣នាក់នោះលើកឡើងទេ។ អ្នកស្រីនៅតែទាមទារឱ្យតំណាងពលរដ្ឋ៣នាក់នោះ បង្ហាញឯកសារនិងភស្តុតាង។
អ្នកស្រី ឆាយ វី ប្រាប់ថា៖ «បើរកភស្តុតាងមិនឃើញដូចគាត់ចោទប្រកាន់ខ្ញុំទេ ខ្ញុំសុំឱ្យគាត់សងជំងឺចិត្តខ្ញុំ២ម៉ឺនដុល្លារ និងជាប់គុករយៈពេល៥ឆ្នាំ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន ប្រាប់ថា ករណីតុលាការហៅពលរដ្ឋឱ្យឆ្លើយបំភ្លឺនេះ គឺពាក់ព័ន្ធនឹងរឿងជម្លោះដីធ្លី។ លោកថា ការដែលយកប្រព័ន្ធតុលាការទៅដោះស្រាយជម្លោះដីធ្លីបែបនេះ គឺជាការគំរាមកំហែងនិងបំបាក់ស្មារតីពលរដ្ឋរងគ្រោះដីធ្លី មិនឱ្យហ៊ានតវ៉ាទៀតតែប៉ុណ្ណោះ។
កាលពីថ្ងៃទី២៥ ខែវិច្ឆិកាឆ្នាំមុន ក្រុមពលរដ្ឋរាប់រយនាក់មកពីសហគមន៍១៧៥ ស្ថិតនៅឃុំជីខលើ និងជីខក្រោម ស្រុកស្រែអំបិល បាននាំគ្នាផ្តិតមេដៃប្តឹងទៅរដ្ឋមន្ត្រីក្រសួងមហាផ្ទៃ លោក ស ខេង ដោយចោទប្រកាន់អ្នកស្រី ឆាយ វី អតីតតំណាងពួកគេថាបាន «ញុះញង់ឱ្យប្រជាពលរដ្ឋលក់ដីសេសសល់បម្រុងទុករបស់សហគមន៍ ទៅឱ្យឧកញ៉ានិងអ្នកមានលុយមានអំណាច» នៅក្នុងខេត្តកោះកុង៕
