បុគ្គលិកសណ្ឋាគារ សូហ្វីតែលភ្នំពេញភូគីត្រា ដែលត្រូវបានថៅកែបញ្ឈប់ពីការងារ បានស្នើទៅក្រសួងការងារឱ្យបញ្ជូនសំណុំរឿងវិវាទការងាររបស់ពួកគេទៅក្រុមប្រឹក្សាអាជ្ញាកណ្ដាល ខណៈដែលពួកគេអះអាងថា វិវាទការងារមួយនេះបានអូសបន្លាយពេលអស់ជិត៣ខែ គ្មានដំណោះស្រាយ។
កាលពីថ្ងៃទី១ ខែសីហាកន្លងមកនេះ បុគ្គលិក៥៣នាក់របស់សណ្ឋាគារ សូហ្វីតែលភ្នំពេញ ត្រូវបានម្ចាស់សណ្ឋាគារបញ្ឈប់ពីការងារ ក្រោមហេតុផលថា សណ្ឋាគារមានបញ្ហាសេដ្ឋកិច្ចដោយសារការរីករាលដាលនៃជំងឺកូវី១៩ ប៉ុន្តែក្រុមកម្មករអះអាងថា ការបញ្ចប់កិច្ចសន្យាការងារនោះ គឺថៅកែមិនបានដោះស្រាយត្រឹមត្រូវតាមផ្លូវច្បាប់ឡើយ ដែលធ្វើឱ្យកម្មករមិនពេញចិត្តនិងបានតវ៉ា។
តំណាងបុគ្គលិកប្រមាណ១០នាក់របស់សណ្ឋាគារ សូហ្វីតែលភ្នំពេញ នៅថ្ងៃអង្គារនេះ បាននាំគ្នាយកញត្តិទៅដាក់នៅក្រសួងការងារ ដើម្បីសុំឱ្យរដ្ឋមន្ត្រីក្រសួងការងារ លោក អ៊ិត សំហេង បញ្ជូនសំណុំរឿងវិវាទការងាររបស់ពួកគេទៅក្រុមប្រឹក្សាអាជ្ញាកណ្តាលដោះស្រាយបន្ត។
ប្រធានសហជីពសាមគ្គីឯករាជ្យនៃសណ្ឋាគារសូហ្វីតែលភ្នំពេញ លោក ផាត់ សារួន ប្រាប់អ្នកសារព័ត៌មានក្រោយដាក់ញត្តិនៅក្រសួងការងារនាព្រឹកនេះថា ម្ចាស់សណ្ឋាគារបានបញ្ឈប់បុគ្គលិកភ្លាមៗដោយមិនបានជូនដំណឹងមុន និងដោះស្រាយសំណងមិនបានត្រឹមត្រូវតាមផ្លូវច្បាប់ឡើយ។
ប្រធានសហជីពរូបនេះ ឱ្យដឹងថា វិវាទការងារនៅសណ្ឋាគារសូហ្វីតែលភ្នំពេញនេះ គឺកន្លងមកមន្ត្រីក្រសួងការងារបានសម្របសម្រួលផ្សះផ្សាដែរ ប៉ុន្តែមានចំណុចមួយចំនួនមិនត្រូវគ្នាឡើយ។
លោក ផាត់ សារួន ប្រាប់ថា៖ «ការបញ្ឈប់នេះ គឺពួកគាត់ទទួលរងការប្រឈមខ្លាំង។ ពួកគាត់ប្រឈមមុខនឹងការអត់ការងារធ្វើ។ សព្វថ្ងៃនេះ ភាគច្រើនពួកគាត់អត់ទាន់មានការងារថ្មីធ្វើទេ។ គាត់សម្រាកនៅផ្ទះ។ អ្នកខ្លះគាត់មានជំងឺប្រចាំកាយទៀត។ ទាំងនេះជាផលលំបាករបស់ពួកគាត់»។
បើតាមញត្តិដាក់ទៅក្រសួងការងារ គឺក្រុមបុគ្គលិកទាមទារសំណងបន្ថែម ក្នុងនោះមានប្រាក់សំណងជំងឺចិត្ត ប្រាប់អតីតភាពការងារមុនឆ្នាំ២០១៩ ដោយយកប្រាក់ឈ្នួលគោលបូកជាមួយប្រាក់បន្ទាប់បន្សំក្នុងការគណនាជូនបុគ្គលិក និងផ្តល់ប្រាក់ដែលថៅកែកាត់ទុកសម្រាប់ការបាក់បែកជូនបុគ្គលិកវិញ។
បុគ្គលិកផ្នែកចុងភៅ កញ្ញា វួច លីន អាយុ២៦ឆ្នាំ បម្រើការងារនៅសណ្ឋាគារ សូហ្វីតែលភ្នំពេញរយៈពេល៦ឆ្នាំហើយនោះ និយាយថា តាំងពីថៅកែបញ្ឈប់ពីការងាររហូតពេលនេះ កញ្ញាមិនទាន់រកការងារធ្វើបាននៅឡើយទេ ដែលធ្វើឱ្យកញ្ញាកំពុងប្រឈមមុខនឹងបញ្ហាជីវភាពគ្រួសារ។
កញ្ញា វួច លីន ប្រាប់ថា៖ «គេបញ្ឈប់ភ្លាមៗអ៊ីចឹង ខ្ញុំរកការងារថ្មីធ្វើអត់បានទេរហូតមកដល់ពេលឥលូវហ្នឹង ហើយខ្ញុំត្រូវទទួលបន្ទុកក្នុងគ្រួសារមួយចប់តាំងពីលុយបង់ធនាគារ ម្តាយខ្ញុំឈឺ ថ្លៃសាលាក្មួយៗរៀន។ ហើយខ្ញុំទាមទារចង់បានអ្វីដែលច្បាប់ការងារបានកំណត់ទេ ខ្ញុំអត់ចង់បានលើសហ្នឹងទេ»។
បុគ្គលិកផ្នែកចុងភៅម្នាក់ទៀត លោក ជា សូនី អាយុ៤៥ឆ្នាំ បម្រើការងារនៅសណ្ឋាគារ សូហ្វីតែល រយៈពេល១០ឆ្នាំមកហើយនោះ និយាយថា ប្រសិនសំណុំរឿងវិវាទការងារនេះធ្លាក់ដល់ដៃក្រុមប្រឹក្សាអាជ្ញាកណ្តាល គឺពួកគាត់ឈ្នះក្តី ហើយទទួលបានសំណងដូចការទាមទារ។ លោកថា ប្រសិនជាមិនទទួលបានសំណងបន្ថែម និងរកការងារធ្វើអត់បានទៀតនោះ គ្រួសារលោកប្រឈមជំពាក់បំណុលគេទ្វេដង។
លោក ជា សូនី ប្រាប់ថា៖ «ឥលូវកំពុងស្វែងរកខ្ចីគេពីខាងក្រៅ ដើម្បីយកទៅបង់សងធនាគារ ហើយឥលូវសំណងក៏បានតិច ការងារក៏រកមិនទាន់បានធ្វើទៀត និយាយទៅជួបការលំបាកច្រើនណាស់»។
មន្ដ្រីទទួលបន្ទុកផ្នែកដោះស្រាយវិវាទនិងកូដកម្មនៃក្រសួងការងារ លោក និន វណ្ណៈ ដែលបានទទួលញត្ដិពីតំណាងបុគ្គលិកសណ្ឋាគារ សូហ្វីតែល ប្រាប់វីអូឌីថា លោកនឹងបញ្ជូនសំណើរបស់បុគ្គលិកនេះទៅរដ្ឋមន្ត្រី ដើម្បីពិនិត្យនិងចាត់ចែងបន្ត។
លោក និន វណ្ណៈ ប្រាប់ថា៖ «ព្រឹកមិញនេះ ខ្ញុំបានទទួលញត្តិពីបងប្អូននៅសូហ្វីតែល ដូចលោកបានដឹងហើយ។ ហើយក្នុងនាមខ្ញុំជាអ្នកទទួលនូវឯកសារទាំងអស់នេះ ខ្ញុំបានរៀបចំដើម្បីបញ្ជូនទៅឯកឧត្តមបណ្ឌិតរដ្ឋមន្ត្រីដើម្បីចាត់ការ។ អ៊ីចឹងលទ្ធផលយ៉ាងណាៗ ចាំមើលពេលក្រោយ»។
ប្រធានគ្រប់គ្រងធនធានមនុស្សនៅសណ្ឋាគារ សូហ្វីតែលភ្នំពេញ អ្នកស្រី សែម សុភាព សុំមិនទាន់បកស្រាយច្រើនទេ ដោយថា អ្នកស្រីកំពុងប្រជុំជាមួយថ្នាក់ដឹកនាំសណ្ឋាគារពាក់ព័ន្ធករណីនេះ ប៉ុន្តែប្រាប់ថា សណ្ឋាគារសម្រេចបញ្ចប់កិច្ចសន្យាការងារបុគ្គលិកក្នុងចំនួនច្រើននេះ ដោយសារបញ្ហាជំងឺកូវីដ១៩។
អ្នកស្រី សែម សុភាព ប្រាប់ថា៖ «យើងដឹងហើយទាក់ទងបញ្ហាជំងឺកូវីដ។ ឥលូវខ្ញុំសុំមិន comment [បញ្ចេញមតិ] ច្រើនទេ ដោយសារខ្ញុំកំពុងប្រជុំជាមួយថ្នាក់ដឹកនាំពាក់ព័ន្ធបញ្ហានេះ។ ចាំទាក់ទងខ្ញុំពេលក្រោយទៀត»។
ប្រធានសហជីពសាមគ្គីឯករាជ្យនៃសណ្ឋាគារ សូហ្វីតែលភ្នំពេញ លោក ផាត់ សារួន ឱ្យដឹងថា សណ្ឋាគារ សូហ្វីតែល មានបុគ្គលិកសរុបប្រមាណ៣៣៨នាក់ ប៉ុន្តែបច្ចុប្បន្ន បានបញ្ឈប់ជាបន្តបន្ទាប់ប្រមាណជាង៥០នាក់៕