កម្លាំងសន្តិសុខចម្រុះជាច្រើននាក់ និងរនាំងដែកជាច្រើនផ្ទាំង ត្រូវបានគេឃើញដាក់ពង្រាយនៅជុំវិញបរិវេណទីស្នាក់ការកណ្ដាលដែលត្រូវបានហាមឃាត់របស់គណបក្សប្រឆាំងនៅព្រឹកថ្ងៃនេះ ចំខួប៣ឆ្នាំនៃការរំលាយបក្សប្រឆាំងដ៏ធំនៅកម្ពុជា។
អ្នករាយការណ៍ព័ត៌មានវីអូឌីដែលស្ថិតនៅទីតាំងនោះ បានរាយការណ៍ថា សន្តិសុខចម្រុះជាច្រើននាក់ ក្នុងនោះមានទាំងស្លៀកពាក់ឯកសណ្ឋាននិងស្លៀកពាក់ស៊ីវិល បានឈរជើងនៅជុំវិញបរិវេណទីស្នាក់ការរបស់គណបក្សសង្គ្រោះជាតិ ស្ថិតនៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ។
ក្រុមសន្តិសុខចម្រុះទាំងនោះត្រូវបានដាក់ពង្រាយនៅជុំវិញទីស្នាក់ការបែបនេះ បន្ទាប់ពីទទួលបានដំណឹងថា ក្រុមសកម្មជននិងអ្នកគាំទ្របក្សប្រឆាំងប្រហែលគ្រោងលើកគ្នាទៅពិនិត្យមើលដីការបស់តុលាការ នៅចំខួប៣ឆ្នាំនៃការរំលាយបក្សមួយនេះ។
គណបក្សប្រឆាំងដ៏ធំមួយនេះត្រូវបានតុលាការកំពូលសម្រេចរំលាយចោលកាលពីចុងឆ្នាំ២០១៧ នៅក្នុងបណ្ដឹងមួយដែលចោទថា មេដឹកនាំបក្សនេះ គឺលោក កឹម សុខា បានឃុបឃិតជាមួយរដ្ឋបរទេស ឬ «ក្បត់ជាតិ» មានបំណងផ្ដួលរំលំរដ្ឋាភិបាលស្របច្បាប់។
ទីស្នាក់ការគណបក្សសង្គ្រោះជាតិ ត្រូវបានតុលាការហាមឃាត់ និងសម្រេចរឹបអូសជាបណ្ដោះអាសន្នចាប់តាំងពីដើមឆ្នាំ២០១៨មក នៅក្នុងបណ្ដឹងបរិហារកេរ្តិ៍ប្រឆាំងនឹងអតីតប្រធានបក្សនេះ គឺលោក សម រង្ស៊ី ពីសំណាក់លោកនាយករដ្ឋមន្ត្រី ហ៊ុន សែន និងប្រធានរដ្ឋសភា លោក ហេង សំរិន។
លោក សម រង្ស៊ី ដែលកំពុងរស់នៅនិរទេសខ្លួននៅឯក្រៅប្រទេសនោះ ត្រូវបានសាលាដំបូងរាជធានីភ្នំពេញសម្រេចឱ្យចាញ់ក្ដីនៅក្នុងបណ្ដឹងបរិហារកេរ្តិ៍នេះ ហើយតុលាការក៏បានបង្គាប់ឱ្យបង់សំណងជំងឺចិត្តទៅលោក ហេង សំរិន ចំនួន២៥០លានរៀល ឬប្រហែលនឹង៦២ ៥០០ដុល្លារ និងសំណងជំងឺចិត្តទៅលោក ហ៊ុន សែន ចំនួន៤ ២៥០លានរៀល ឬប្រហែលនឹង១លាន ៦ម៉ឺនដុល្លារ៕