ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ ឱ្យដឹងថា អ្នកប្រជាធិបតេយ្យខ្មែរមួយចំនួនបានរួបរួមគ្នាចងជាសម្ព័ន្ធ ហើយលោកជាអ្នកដឹកនាំសម្ព័ន្ធនេះ។
លោក ម៉ម សូណង់ដូ ប្រាប់វីអូឌីនៅថ្ងៃនេះថា អ្នកសម្ព័ន្ធអ្នកប្រជាធិបតេយ្យខ្មែរទាំងនោះ រួមមាន គណបក្សខ្មែររួបរួមជាតិ របស់លោក ញឹក ប៊ុនឆៃ និងគណបក្សខ្មែរតែមួយ របស់លោក កែម រិទិ្ធសិត ដែលជាប្អូនប្រុសលោក កែម ឡី។
លោកបន្តថា ក្រុមសម្ព័ន្ធអ្នកប្រជាធិបតេយ្យទាំងនោះ សម្រេចចិត្តចូលរួមគ្នាបង្កើតគោលនយោបាយ និងលក្ខន្តិកៈ ដើម្បីធ្វើការណែនាំទៅប្រជាពលរដ្ឋនៅទូទាំងប្រទេស ឱ្យចេះសម្រេចចិត្តជ្រើសរើសមេដឹកនាំប្រទេសជាតិកាន់តែរីកចំរើនទៅមុខ។
លោកមានប្រសាសន៍ថា៖ «យើងបង្ហាញទៅសាធារណៈជនថា អ្វីដែលល្អ ថ្មី សម្រាប់ជាតិ សម្រាប់សន្តិភាព ហើយសម្រាប់យុវជន យើងចាប់ផ្តើមធ្វើ បើគាត់យល់ថាល្អ គាត់ជ្រើសរើសជាភ័ព្វវាសនារបស់ស្ថាបនិក និងប្រទេសជាតិដែរ»។
លោក ម៉ម សូណង់ដូ បញ្ជាក់ថា លោកជាក្បាលម៉ាស៊ីនដឹកនាំរចនាសម្ព័ន្ធ នៃអ្នកប្រជាធិបតេយ្យនោះ។
ទោះជាបែបនេះក្តី លោក សូណង់ដូ បន្តថា នៅពេលស្ថានភាពកូវីដ១៩ មានភាពល្អប្រសើរឡើងវិញ ក្រុមអ្នកប្រជាធិបតេយ្យខ្មែរនឹងធ្វើសន្និសីទកាសែត ប្រាប់ពីបំណង គោលនយោបាយ និងលក្ខខន្តិកៈឱ្យលម្អិត ជូនសាធារណៈជនឱ្យបានដឹងពីបញ្ហាទាំងនោះ។
បន្ថែមពីនេះលោកបន្តថា ក្រុមអ្នកនយោបាយទាំង៣រូបនោះ មិនរំលាយគណបក្សចាស់ ឬបង្កើតគណបក្សថ្មី តែមួយនោះទេ ពោលរក្សាទុកនៅដដែល៕
