អ្នកភូមិអះអាងថា ពលរដ្ឋ៤នាក់ រស់នៅឃុំអន្លង់វែង ស្រុកអន្លង់វែង ខេត្តឧត្តរមានជ័យ ត្រូវបានសមត្ថកិច្ចចាប់ខ្លួនជាបន្តបន្ទាប់នៅក្នុងសប្តាហ៍នេះ ដោយសមត្ថកិច្ចបានចោទពួកគេថា បានយកគ្រឿងចក្រទៅឈូសឆាយដីរដ្ឋខុសច្បាប់ ខណៈពលរដ្ឋថា ដីនោះជាដីកម្មសិទ្ធិរបស់ពួកគេ។
អ្នកស្រី សុង ឡុន រស់នៅភូមិអូរតាម៉េង ឃុំអន្លង់វែង ប្រាប់វីអូឌីនៅថ្ងៃសុក្រនេះថា កាលពីថ្ងៃទី១១ និងទី១២ ខែវិច្ឆិកានេះ សមត្ថកិច្ចស្រុកអន្លង់វែង បានចាប់ខ្លួនឪពុកក្មេករបស់អ្នកស្រី ឈ្មោះ ជ័យ ឡាំ អាយុ៧០ឆ្នាំ និងអ្នកបើកបរគ្រឿងចក្រ៣នាក់ រួមទាំងបានរឹបអូសយកគ្រឿងចក្រ២គ្រឿង ដោយមិនបានបញ្ជាក់ពីមូលហេតុច្បាស់លាស់នោះទេ។
អ្នកស្រីអះអាងថា ករណីសមត្ថកិច្ចចាប់ខ្លួនអ្នកទាំង៤រូបនោះ គឺធ្វើឡើងក្រោយពេលដែលឪពុករបស់អ្នកស្រី ដាក់គ្រឿងចក្រឈូសឆាយដីចម្ការបស់គាត់ ដើម្បីដាំដំឡូងមី។
អ្នកស្រីបន្ថែមថា៖ «ខ្ញុំឆ្ងល់ដែរ មិនដឹងជាគេចាប់គាត់រឿងអី បើគ្រាន់តែគាត់ឈូសដីបង្កបង្កើនផលចិញ្ចឹមជីវិត។ មានដីតែប៉ុណ្ណោះ ហើយកូន៥នាក់នៅក្នុងបន្ទុកទៀត ហើយគាត់អាយុប៉ុន្មានហើយ។ ខ្ញុំស្រណោះពុកណាស់ គាត់មានរោគប្រចាំកាយទៀត ទឹកនោមផ្អែម លើសឈាម ជាតិអាស៊ីតក៏ឡើង។ ខ្ញុំសូមអំពាវនាវដល់សម្តេចជួយអន្តរាគមន៍ដោះលែងឱ្យពុកខ្ញុំបានចេញមកវិញផង»។
បើតាមអ្នកស្រី សុង ឡុន ឪពុកក្មេករបស់អ្នកស្រី បានចូលទៅរស់នៅលើដីកំពុងមានជម្លោះនោះរយៈពេល១៧ឆ្នាំហើយ ដោយបានកាន់កាប់ដីទំហំ៣ហិកតា សម្រាប់បង្កបង្កើនផលដាំស្វាយចន្ទី ដំឡូងមី ធ្វើស្រែ និងទុកបែងចែកទៅឱ្យកូនៗ៥នាក់។
ពលរដ្ឋម្នាក់ទៀត លោក ជឹម វណ្ណា និយាយថា ប្រជាពលរដ្ឋ១៤២គ្រួសារ បានរស់នៅនិងបង្កបង្កើនផលលើដីទំហំ៤៥៨ហិកតា ក្នុងឃុំអន្លង់វែង តាំងពីចន្លោះឆ្នាំ២០០០ ដល់ឆ្នាំ២០០៤ និងចាប់ផ្តើមមានជម្លោះដីធ្លីជាមួយអាជ្ញាធរតាំងពីឆ្នាំ២០១៦ ដោយអាជ្ញាធរចោទពលរដ្ឋថា រស់នៅលើដីរដ្ឋខុសច្បាប់។
លោកបន្តថា កន្លងមក អ្នកភូមិធ្លាប់បានតវ៉ានិងសុំអន្តរាគមន៍ដល់អាជ្ញាធរថ្នាក់ជាតិ ដូចជា ក្រសួងរៀបចំដែនដី និងស្ថាប័នផ្សេងទៀត ក្នុងនោះ អាជ្ញាធរថ្នាក់ជាតិធ្លាប់បានជំរុញឱ្យអាជ្ញាធរខេត្តដោះស្រាយជូនពលរដ្ឋផងដែរ ប៉ុន្តែមកដល់ពេលនេះ នៅមិនទាន់មានដំណោះស្រាយនៅឡើយ។
លោកបន្ថែមថា៖ «ពលរដ្ឋខ្លះទៅរស់នៅតំបន់នោះ មានកូនពីរបីនាក់ហើយ អាជ្ញាធរនៅតែថា ដីដែលរស់នៅជាដីសហគមន៍ ដីទីទួលសុវត្ថិភាព មិនព្រមដោះស្រាយចែកឱ្យប្រជាពលរដ្ឋឱ្យសមរម្យ។ ចែកឱ្យមួយហិកតា ពីរហិកតា ពលរដ្ឋម៉េចព្រមយក បើកូនច្រើនយ៉ាងនេះ ហើយគាត់មានដីម្នាក់៣ហិកតាឬ៤ហិកតាហ្នឹង។ បើអស់លោកហ្នឹងបានដីលក់ឱ្យគេមួយកន្លែងសុទ្ធតែ៣០ទៅ៤០ និង១០០ហិកតា នៅក្បែរៗនេះ។ គេចង់ដេញប្រជាពលរដ្ឋចេញ ហើយយកដីហ្នឹងលក់ហ្នឹងណា»។
ទោះជាយ៉ាងណា អធិការរងនគរបាលស្រុកអន្លង់វែង លោក កេត សុធា មានប្រសាសន៍ថា សមត្ថកិច្ចចាប់ខ្លួនពលរដ្ឋទាំង៤នាក់នោះ ដោយសារតែពួកគេបានទៅរុករានយកដីរដ្ឋខុសច្បាប់ ហើយកាលពីថ្ងៃម្សិលមិញ ពួកគេត្រូវបានបញ្ជូនខ្លួនទៅអាជ្ញាធរខេត្ត ដើម្បីមានចំណាត់ការបន្តតាមនីតិវិធី។
លោកបន្ថែមថា៖ «ពួកគាត់តែងតែទន្ទ្រានយកដីរបស់រដ្ឋនៅត្រង់ចំណុចហ្នឹងឯង ដីហ្នឹងគឺយើងរក្សាទុកសម្រាប់ធ្វើទីទួលសុវត្ថិភាព។ ករណីហ្នឹង ខាងអាជ្ញាធរយើងបានចាប់ប្រគល់ឱ្យទៅខាងអាវុធហត្ថស្រុក គាត់ចាត់ការតាមនីតិវិធី ខ្ញុំអត់ដឹងថា គាត់ដាក់ទៅខាងណាទៀតទេ»។
វីអូឌី មិនអាចសុំការបញ្ជាក់ពីមន្ត្រីស្នងការដ្ឋាននគរបាលខេត្តឧត្តរមានជ័យបានទេ នៅថ្ងៃសុក្រនេះ។
អភិបាលខេត្តឧត្តរមានជ័យ លោក ប៉ែន កុសល មានប្រសាសន៍ថា លោកមិនទាន់ទទួលបានដំណឹងពាក់ព័ន្ធដែលថា អាជ្ញាធរស្រុកអន្លង់វែង ចាប់ពលរដ្ឋទាំង៤នាក់នោះទេ។ ប៉ុន្តែលោកថា អាជ្ញាធរខេត្តកំពុងពិភាក្សាជាមួយមន្ត្រីពាក់ព័ន្ធ ដើម្បីដោះស្រាយបញ្ចប់វិវាទដីធ្លីនៅតំបន់នោះ។
លោកបន្ថែមថា៖ «ក្នុងនាមអាជ្ញាធរខេត្ត ខ្ញុំកំពុងគិតដើម្បីរកវិធីដោះស្រាយជូនបងប្អូនប្រជាពលរដ្ឋ និងកំណត់ឱ្យបាន[នូវ]ច្បាប់អំពីដីដែលទុកសម្រាប់ធ្វើទីទួលសុវត្ថិភាពនោះ»។
មន្រ្តីសមាគមអាដហុកប្រចាំខេត្តឧត្តរមានជ័យ លោក ស្រី ណារ៉េន យល់ថា ប្រសិនបើពលរដ្ឋទាំងនោះពិតជាបានរំលោភយកដីរដ្ឋមែន អាជ្ញាធរខេត្តឧត្តរមានជ័យគួរតែចុះអប់រំពលរដ្ឋជាមុនសិន ជាជាងមានវិធានការចាប់ខ្លួនបែបនេះ។ ម្យ៉ាងទៀត លោកថា អាជ្ញាធរគួរតែបោះព្រំកំណត់ដីរដ្ឋដែលទុកធ្វើទីទួលសុវត្ថិភាពនោះឱ្យបានច្បាស់លាស់ និងត្រូវដោះស្រាយជូនពលរដ្ឋ ប្រសិនបើពួកគេបានចូលទៅកាន់កាប់ដីតំបន់នោះយូរឆ្នាំដូចការអះអាងរបស់ពួកគេ។
លោកបន្ថែមថា៖ «ការដែលសមត្ថកិច្ចគាត់ចុះទៅអនុវត្តបែបហ្នឹង វាជារឿងមួយល្អ ប៉ុន្តែសុំឱ្យការអនុវត្តនេះ ឱ្យវាមានភាពស្មើគ្នា ពីព្រោះនៅខេត្តឧត្តរមានជ័យនេះ មានរឿងជាច្រើនដែលត្រូវអនុវត្តបែបនេះ។ មួយទៀត ត្រូវតែធ្វើការអប់រំដល់ប្រជាពលរដ្ឋសិនទៅ ថាហេតុអ្វីបានជាលោកចូលទៅកាន់កាប់នៅតំបន់ដែលគេហាមឃាត់។ បើតាមការអះអាងរបស់ពលរដ្ឋ គឺពួកគាត់បានទៅរស់នៅតំបន់នោះ មុនពេលមានបញ្ហាតាមព្រំដែនទៀត អ៊ីចឹងបើដូចការអះអាងរបស់ពលរដ្ឋមែន អាជ្ញាធរត្រូវតែដោះស្រាយជាគោលនយោបាយជូនពលរដ្ឋ»។
ពាក់់ព័ន្ធនឹងករណីនេះដែរ ក្រុមប្រជាពលរដ្ឋបានព្រមានថា នឹងនាំគ្នារាប់សិបនាក់ទៅប្រមូលផ្តុំតវ៉ានៅមុខសាលាខេត្តឧត្តរមានជ័យ ប្រសិនបើអាជ្ញាធរមិនដោះលែងពលរដ្ឋទាំង៤នាក់នោះឱ្យមានសេរីភាពវិញ៕