ព្រះមហាក្សត្រ បានចេញព្រះរាជក្រឹត្យផ្តល់នីតិសម្បទាធ្វើនយោបាយឡើងវិញ ដល់អតីតតំណាងរាស្រ្តបក្សប្រឆាំង លោកស្រី លី ស្រីវីណា។
យោងតាមព្រះរាជក្រឹត្យរបស់ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ចុះថ្ងៃទី១២ ខែវិច្ឆិកា ឆ្នាំ២០២០ បានត្រាស់បង្គាប់ផ្តល់នីតិសម្បទាឡើងវិញ ដល់លោកស្រី លី ស្រីវីណា ដែលត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល ៥ឆ្នាំ តាមអំណាចសាលដីការបស់តុលាការ កាលពីថ្ងៃទី១៦ ខែវិច្ឆិកា ឆ្នាំ២០១៧។
ព្រះរាជក្រឹត្យរបស់ព្រះមហាក្សត្រ បានធ្វើឡើងក្រោយពីមានការស្នើពីនាយករដ្ឋមន្ត្រី និងក្រោយពីលោកស្រី លី ស្រីវីណា បានដាក់សំណើរទៅក្រសួងមហាផ្ទៃ កាលពីថ្ងៃទី៩ ខែវិច្ឆិកា ឆ្នាំ២០២០ ដើម្បីសុំលើកបម្រាមសិទ្ធិនយោបាយ និងសុំផ្តល់នីតិសម្បទាឡើងវិញ។
បើតាមលិខិតមួយរបស់ច្បាប់របស់ លោកស្រី លី ស្រីវីណា ផ្ញើជូនលោកនាយករដ្ឋមន្ត្រី ហ៊ុន សែន កាលពីថ្ងៃទី៩ខែវិច្ឆិកា និងត្រូវបានផ្សព្វផ្សាយដោយសារព័ត៌មានក្នុងស្រុកមួយ គឺលោកស្រី លី ស្រីវីណា ក៏បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជាផងដែរ។
កាលពីថ្ងៃទី៦ ខែវិច្ឆិកា ឆ្នាំ២០២០ ក្រសួងសុខាភិបាល បានសម្រេចបិទមន្ទីរសំរាកព្យាបាលឈ្មោះ លី ស្រីវីណា ដែលជាកម្មសិទ្ធិរបស់អតីតតំណាងរាស្ត្របក្សប្រឆាំង លោកស្រី លី ស្រីវីណា ដោយហេតុផលថា មន្ទីរសម្រាកព្យាបាលនេះ ពុំមានលក្ខណៈសម្បត្តិគ្រប់គ្រាន់ក្នុងការផ្តល់សេវាសង្គ្រោះអ្នកជំងឺ បណ្តាលឱ្យអ្នកជំងឺម្នាក់ស្លាប់។
គួរបញ្ជាក់ថា អតីតថ្នាក់ដឹកនាំគណបក្សសង្រ្គោះជាតិ សរុប១១៨នាក់ ត្រូវបានតុលាការកំពូលកម្ពុជាចេញសាលដីកា សម្រេចផ្អាកមិនឱ្យធ្វើសកម្មភាពនយោបាយ រយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ ក្រោយពីអតីតគណបក្សសង្រ្គោះជាតិ ត្រូវបានរំលាយដោយអំណាចសាលក្រមតុលាការ។
រហូតមកដល់ពេលនេះ មានអតីតមន្ត្រីគណបក្សសង្រ្គោះជាតិ ជាង១០នាក់ហើយ ដែលត្រូវបានព្រះមហាក្សត្រ ត្រាស់បង្គាប់ផ្តល់នីតិសម្បទាឡើងវិញ ក្រោយពីបានស្នើសុំលើកបម្រាមសិទ្ធិនយោបាយ៕
