រដ្ឋមន្ត្រីការបរទេសកម្ពុជា បានលើកឡើងថា ទោះជាមានឧបទ្ទវហេតុនៃការចម្លងជំងឺកូវីដ១៩នៅកម្ពុជា ក្នុងដំណើរទស្សនិច្ចរបស់រដ្ឋមន្ត្រីការបរទេសហុងគ្រី ប៉ុន្តែករណីនេះមិនបានធ្វើឱ្យប៉ះពាល់ដល់មិត្តភាពនិងទំនាក់ទំនងការទូតនៃប្រទេសទាំងពីរឡើយ ខណៈរដ្ឋមន្រ្តីរូបនេះបានជួយប្រឆាំងនឹងការព្យួរ EBA ២០ភាគរយ ពីកម្ពុជា។
រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា លោក ប្រាក់ សុខុន បានលើកឡើងក្នុងទំព័រហ្វេសប៊ុករបស់លោកនៅថ្ងៃព្រហស្បតិ៍នេះថា តាមរយៈការសន្ទនាតាមទូរសព្ទ រដ្ឋមន្ត្រីការបរទេសហុងគ្រី លោក Péter Szijjártó បានបង្ហាញការសោកស្តាយយ៉ាងខ្លាំងនិងផ្ញើនូវការសុំទោសដែលលោកបង្កផលលំបាកដល់កម្ពុជា ពាក់ព័ន្ធនឹងការចម្លងជំងឺកូវីដ១៩នេះ។
លោកបន្តថា រដ្ឋមន្ត្រីការបរទេសហុងគ្រី បានអះអាងសារជាថ្មីថា ពេលលោកបានធ្វើតេស្តមុនលោកចេញដំណើរមកកម្ពុជា លទ្ធផលពេលនោះគឺអវិជ្ជមាន។ តែយ៉ាងណា លោកថា រូបលោក Péter Szijjártó ត្រូវបានផ្សព្វផ្សាយយ៉ាងល្បីល្បាញក្នុងបណ្តាញសង្គមនៅកម្ពុជា និងមានការធ្វើអត្ថាធិប្បាយបែបចម្រុះស្តីពីដំណើរទស្សនកិច្ចរបស់គាត់មកភ្នំពេញ។
លោក ប្រាក់ សុខន បានបញ្ជាក់ថា៖ «យ៉ាងណាក៏ដោយ គេមិនត្រូវភ្លេចទេថា លោក Szijjártó ជារដ្ឋមន្ត្រីការបរទេសនៃប្រទេសជាសមាជិកសហភាពអឺរ៉ុបមួយ ដែលតែងហ៊ានចេញមុខការពារយុត្តិធម៌ចំពោះកម្ពុជា»។
លោកបន្ថែមថា៖ «គាត់ [រដ្ឋមន្ត្រីការបរទេសហុងគ្រី] គឺជាអ្នកក្រោកឡើង បន្លឺសំឡេងប្រឆាំងនឹងការជ្រៀតជ្រែកពីខាងក្រៅចូលកិច្ចការផ្ទៃក្នុងកម្ពុជា។ គាត់គឺជាអ្នកតវ៉ាប្រឆាំងនឹងការព្យួរភាពអនុគ្រោះពន្ធក្រោមក្របខណ្ឌ EBA ២០% ពីកម្ពុជា»។
រដ្ឋមន្ត្រីការបរទេសរូបនេះ បានបញ្ជាក់ដែរថា គិតមកដល់ពេលនេះ មានរយៈពេល១០ថ្ងៃមកហើយ ដែលលោកបានទទួលជួបប្រាស្រ័យការងារជាមួយរដ្ឋមន្ត្រីការបរទេសហុងគ្រីដែលបានមកបំពេញទស្សនកិច្ចផ្លូវការនៅកម្ពុជា កាលពីថ្ងៃទី០៣ ខែវិច្ឆិកា ហើយបច្ចុប្បន្ន ស្ថានភាពសុខភាពរបស់លោកមានសភាពល្អធម្មតា និងមានលទ្ធផលតេស្តអវិជ្ជមានវីរុសកូវីដ១៩។
បើតាមក្រសួងសុខាភិបាល គិតមកដល់ថ្ងៃទី១១ ខែវិច្ឆិកា អ្នកប៉ះពាល់ផ្ទាល់និងប្រយោលក្នុងព្រឹត្តិការណ៍ថ្ងៃ៣វិច្ឆិកា មានមនុស្សចំនួន២ ៤៩៧នាក់ ត្រូវបានយកវត្ថុសំណាកទៅធ្វើតេស្ត ហើយលទ្ធផលបង្ហាញថា អ្នកឆ្លងជំងឺកូវីដ១៩ក្នុងព្រឹត្តិការណ៍នោះមានចំនួន៤នាក់ ខណៈអ្នកផ្សេងទៀតអវិជ្ជមានទាំងអស់៕