អ្នកភូមិអះអាងថា ប្រជាពលរដ្ឋប្រមាណ៣០០នាក់ដែលកំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អេគ្រីខាល់ឈ័រ គ្រុប ស្ថិតក្នុងស្រុកស្រែអំបិល ខេត្តកោះកុង បានប្រមូលផ្តុំគ្នាឈរលើកបដាមុខសាលាដំបូងខេត្តនេះ ខណៈតំណាងពួកគេ៥នាក់ចូលទៅបំភ្លឺក្នុងតុលាការនៅថ្ងៃនេះ។
ពលរដ្ឋ១០នាក់ដែលអះអាងថា តំណាងឱ្យ១៩៧គ្រួសារ នៅឃុំជីខលើ ស្រុកស្រែអំបិល ត្រូវបានតុលាការខេត្តកោះកុងកោះហៅឱ្យឆ្លើយបំភ្លឺ ចំនួន៥នាក់ នៅថ្ងៃទី១២ ខែវិច្ឆិកានេះ ខណៈ៥នាក់ទៀត នឹងឱ្យចូលបំភ្លឺនៅថ្ងៃទី១៧ ខែវិច្ឆិកា ទៅតាមបណ្តឹងរបស់លោក ហេង ហ៊ុយ ដែលចោទប្រកាន់ពីបទ «បរិហារកេរិ៍្តជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
លោក ឆាន់ ឈឿន ដែលអះអាងថាជាតំណាងពលរដ្ឋ និងកំពុងជាប់បណ្តឹងនៅតុលាការដែរនោះ ប្រាប់វីអូឌីថា អ្នកភូមិបានប្រមូលគ្នាឈរលើកបដាមុខសាលាដំបូងខេត្តកោះកុង ដើម្បីមកគាំទ្រតំណាងពួកគេ៥នាក់ដែលចូលបំភ្លឺនៅថ្ងៃនេះ និងទាមទារទៅតុលាការឱ្យទម្លាក់ការចោទប្រកាន់លើតំណាងទាំងនោះផងដែរ។
![](https://vodkhmer.news/wp-content/uploads/05-35-740x477.jpg)
តំណាងពលរដ្ឋរូបនេះ ឱ្យដឹងថា ក្នុងបដារបស់អ្នកភូមិ គឺពួកគេទាមទារមិនឱ្យយកប្រព័ន្ធតុលាការមកគំរាមកំហែងប្រជាពលរដ្ឋរងគ្រោះដីធ្លី ទាមទារឱ្យតុលាការផ្តល់ភាពយុត្តិធម៌សម្រាប់ប្រជាពលរដ្ឋក្រីក្ររងគ្រោះដីធ្លី និងអាជ្ញាធរពាក់ព័ន្ធត្រូវដោះស្រាយនិងផ្តល់ដីធ្លីជូនពួកគេបានបង្កបង្កើនផលវិញ។
លោក ឆាន់ ឈឿន ប្រាប់ថា៖ «ករណីតុលាការកោះហៅតំណាងពលរដ្ឋទៅបំភ្លឺនេះ គឺជាការគំរាមកំហែងមិនឱ្យពួកយើងហ៊ានចេញតវ៉ាដីធ្លីទៀត។ ដូចខ្ញុំលើកឡើងអ៊ីចឹង បើសិនជាលោក ហេង ហ៊ុយ មិនរំលោភយកដីធ្លីរបស់ពួកខ្ញុំទេ ក៏ពួកខ្ញុំមិនដើរតវ៉ាដែរ។ អ៊ីចឹងហើយ ខ្ញុំឱ្យតុលាការពិចារណាទម្លាក់ចោលការចោទប្រកាន់ និងកុំឱ្យមានការកោះហៅតំណាងពលរដ្ឋបន្តទៀត»។
ពលរដ្ឋម្នាក់ដែលចូលរួមប្រមូលផ្តុំនិងមកគាំទ្រតំណាងដែរនោះ អ្នកស្រី ទូច ធី និយាយថា វាជារឿងអយុត្តិធម៌បំផុតដែលពួកគាត់ត្រូវបានលោកឧកញ៉ា ហេង ហ៊ុយ រំលោភយកដីធ្លីហើយ និងប្តឹងតំណាងពួកគេទៅតុលាការថែមទៀត។
អ្នកភូមិរូបនេះបន្តថា អ្នកស្រីមកគាំទ្រតំណាង គឺដោយសារតំណាងទាំងនោះពុំមានកំហុសដូចការចោទប្រកាន់។ អ្នកស្រីបារម្ភខ្លាចមានការឃាត់ខ្លួនពួកគេ។
អ្នកស្រី ទូច ធី និយាយថា៖ «ពួកខ្ញុំ ប្រជាពលរដ្ឋរងគ្រោះដីធ្លីនេះ បានផ្តិតមេដៃឱ្យពួកគាត់ធ្វើជាតំណាង។ ដល់ពេលពួកគាត់ធ្វើតំណាងហើយ លោក ហេង ហ៊ុយ បានប្តឹងពួកគាត់ទៅតុលាការ ទាំងដែលតំណាងខ្ញុំ១០រូបនេះអត់មានលួច ហើយក៏អត់មានប្លន់ អត់បានបរិហារកេរ្តិ៍ អត់បានញុះញង់ អត់បានធ្វើឱ្យដូចឧកញ៉ា ហេង ហ៊ុយ ទេ ព្រោះពួកយើងបានបាត់បង់ដីធ្លីពិតប្រាកដមែន»។
វីអូឌីមិនអាចសុំការបញ្ជាក់ពីអ្នកនាំពាក្យសាលាដំបូងខេត្តកោះកុង លោក អ៊ិន សុវណ្ណធានី និងម្ចាស់ក្រុមហ៊ុន លោក ហេង ហ៊ុយ បានទេពាក់ព័ន្ធករណីនេះ។
ប៉ុន្តែលោក ឆាន់ ឈឿន បានឱ្យដឹងថា តំណាងពលរដ្ឋដែលចូលបំភ្លឺនៅថ្ងៃនេះ មានអ្នកស្រី ដេត ហួរ អ្នកស្រី អ៊ិន ធូ អ្នកស្រី កើត នៅ អ្នកស្រី អើប វី និងលោក ពូ ហ៊ូន បានចូលទៅបំភ្លឺចំពោះមុខតុលាការតាំងពីម៉ោង៨ព្រឹករហូតមកដល់ម៉ោង១១កន្លះព្រឹកនេះ។
កាលពីថ្ងៃទី២២ ខែតុលា អភិបាលខេត្តកោះកុង អ្នកស្រី មិថុនា ភូថង ប្រាប់វីអូឌីថា អាជ្ញាធរខេត្តមិនអាចជួយដោះស្រាយវិវាទដីធ្លីជូនក្រុមពលរដ្ឋ១៩៧គ្រួសារបានទេ។ អ្នកស្រីបញ្ជាក់ថា ដីដែលពលរដ្ឋទាមទារនោះ គឺជាដីមានកម្មសិទ្ធិដែលលោក ហេង ហ៊ុយ ជាម្ចាស់។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន យល់ថា ការដែលយកប្រព័ន្ធតុលាការទៅដោះស្រាយជម្លោះដីធ្លីបែបនេះ វាមិនអាចដោះស្រាយបាន និងមិនអាចបញ្ឈប់ឱ្យប្រជាពលរដ្ឋឈប់តវ៉ានោះទេ។
មន្ត្រីសិទ្ធិមនុស្សរូបនេះស្នើឱ្យមានការស្រាវជ្រាវនិងស៊ើបអង្កេតឱ្យបានច្បាស់លាស់ជាមុនសិន មុនបដិសេធមិនដោះស្រាយនិងធ្វើការចោទប្រកាន់ទៅលើប្រជាពលរដ្ឋ។
លោក ហ៊ួរ អ៊ីន ប្រាប់ថា៖ «អ៊ីចឹងដំណោះស្រាយដែលល្អ គឺសូមធ្វើការស៊ើបអង្កេតឱ្យបានច្បាស់លាស់សិន។ តើប្រជាពលរដ្ឋមានដីពិតមែនឬក៏អត់? ហើយបើចោទថា ប្រជាពលរដ្ឋពិតជាបានទទួលសំណងពីក្រុមហ៊ុនហើយ តើសំណងនោះទទួលបានដោយស្ម័គ្រចិត្តទេ? មានការបង្ខិតបង្ខំ មានការគំរាមកំហែងទេ ក្នុងការទទួលយកហ្នឹង?»
ចាប់តាំងពីពាក់កណ្តាលឆ្នាំ២០១៩មក ពលរដ្ឋ១៩៧គ្រួសារ មកពីឃុំជីខលើ និងជីខក្រោម បានឡើងមកតវ៉ានៅភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយចោទក្រុមហ៊ុន ហេង ហ៊ុយ ថាបានរំលោភយកតាំងពីឆ្នាំ២០០៧។
ប៉ុន្តែត្រូវបានក្រសួងរៀបចំដែនដីបដិសេធមិនដោះស្រាយឱ្យពលរដ្ឋទាំងនោះចំនួន៣ដងហើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នកដែលក្រសួងថា បានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាទៀតផង៕