ក្រសួងសុខាភិបាលព្រមានចាត់វិធានការផ្លូវច្បាប់ទៅលើបុគ្គលដែលមិនអនុវត្តតាមវិធានសុខាភិបាលក្នុងការធ្វើចត្តាឡីស័ក ដោយការពិន័យអន្តរការណ៍ជាទឹកប្រាក់ពី២០ម៉ឺនរៀលទៅ១លានរៀល និងផ្តន្ទាទោសតាមច្បាប់ព្រហ្មទណ្ឌ។
យោងតាមសារអប់រំសុខភាពរបស់ក្រសួងសុខាភិបាល នៅថ្ងៃអង្គារនេះ បានណែនាំនូវវិធានការសំខាន់ៗមួយចំនួនសម្រាប់ការធ្វើចត្តាឡីស័ក ក្នុងនោះរួមមាន ត្រូវនៅក្នុងផ្ទះដាច់ដោយឡែកគ្រប់ពេលជារៀងរាល់ថ្ងៃ ក្នុងអំឡុងពេល១៤ថ្ងៃ, តាមដានរោគសញ្ញានៃជំងឺ ដោយវាស់កម្តៅជារៀងរាល់ថ្ងៃនៅពេលព្រឹកនិងពេលល្ងាច ហើយក្នុងករណីកម្តៅលើសពី៣៧,៥អង្សារ ឬមានរោគសញ្ញាណាមួយដូចជាក្អក ឈឺបំពង់ក ពិបាកដកដង្ហើម ត្រូវទាក់ទងទៅកាន់ទូរសព្ទទាន់ហេតុការណ៍ ១១៥។
សារអប់រំបន្តថា ត្រូវរស់នៅក្នុងបន្ទប់និងប្រើប្រាស់សម្ភារដាច់ដោយឡែកពីសមាជិកគ្រួសារ ទាំងការសម្រាក ការប្រើប្រាស់បន្ទប់ទឹក និងការបរិភោគអាហារ ហើយត្រូវពាក់ម៉ាស់ សម្អាតដៃជាប់ជានិច្ច និងត្រូវនៅឃ្លាតពីគ្នាយ៉ាងតិច១,៥ម៉ែត្រ។
ក្រសួងបន្តទៀតថា ត្រូវខ្ទប់មាត់ច្រមុះនៅពេលក្អកឬកណ្តាស់ បរិភោគអាហារដែលចម្អិនបានល្អ អនាម័យល្អក្នុងកន្លែងរស់នៅ និងរក្សាអារម្មណ៍នឹងនរ។
ក្រសួងបញ្ជាក់ថា ការអនុញ្ញាតឱ្យបញ្ចប់ការធ្វើចត្តាឡីស័ក ប្រសិនមានការអនុវត្តត្រឹមត្រូវតាមវិធានការចត្តាឡីស័កតាមការកំណត់១៤ថ្ងៃ ហើយគ្មានចេញរោគសញ្ញាជំងឺ និងត្រូវបានបញ្ជាក់ដោយលទ្ធផលតេស្តកូវីដ១៩ «អវិជ្ជមាន» ដោយមន្ទីរពិសោធន៍ នៅថ្ងៃទី១៣ នៃការធ្វើចត្តាឡីស័ក។
ក្រសួងសុខាភិបាល បានព្រមានថា៖ «បុគ្គលដែលមិនអនុវត្តតាមវិធានការសុខាភិបាលក្នុងការធ្វើចត្តាឡីស័ក ត្រូវទទួលពិន័យអន្តរការណ៍ជាទឹកប្រាក់ពី២០០ ០០០រៀល ដល់ ១ ០០០ ០០០រៀល និងត្រូវផ្តន្ទាទោសតាមច្បាប់ព្រហ្មទណ្ឌជាធរមាន តាមមាត្រា៨ នៃអនុក្រឹត្យលេខ១២៩ អនក្រ.បក ចុះថ្ងៃទី១៧ ខែកញ្ញា ឆ្នាំ២០១៥ ព្រមទាំងតម្រូវឱ្យអនុវត្តវិធានការសុខាភិបាល»។
វិធានការណែនាំរបស់ក្រសួង បានធ្វើឡើងក្រោយពីក្រសួងបានរកឃើញអ្នកប៉ះពាល់ដោយផ្ទាល់និងប្រយោលជាមួយរដ្ឋមន្ត្រីការបរទេសហុងគ្រី ក្នុងព្រឹត្តិការណ៍ថ្ងៃ៣វិចិ្ឆកា ចំនួន១ ១៦៦នាក់ គិតមកដល់ថ្ងៃម្សិលមិញ។
ក្នុងចំណោមអ្នកទាំងនោះ លទ្ធផលវិភាគសំណាកបង្ហាញថា លោក សួស យ៉ារ៉ា សមាជិកសភា លោក ស ចិត្រា អគ្គលេខាធិការរងក្រសួងកសិកម្ម និងឯកអគ្គរដ្ឋទូតហុងគ្រីប្រចាំនៅកម្ពុជា រួមនឹងអង្គរក្សផ្ទាល់គណៈប្រតិភូហុងគ្រី បានឆ្លងជំងឺកូវីដ១៩ ក្នុងព្រឹត្តការណ៍ថ្ងៃ៣វិច្ឆិកានោះ។
ក្រៅពីនោះ ក្រសួងថា អ្នកអវិជ្ជមានវីរុសកូវីដ១៩ មានចំនួន១ ១៤០នាក់ ហើយវត្ថុសំណាកនៅសល់ នឹងត្រូវបន្តវិភាគនៅថ្ងៃនេះទៀត៕