ក្រសួងសុខាភិបាលឱ្យដឹងថា អ្នកប៉ះពាល់ក្នុងព្រឹត្តិការណ៍ ០៣វិច្ឆិកា សរុបជិត១ ២០០នាក់ ក្នុងនោះមានអ្នកឆ្លងជំងឺកូវីដចំនួន៤នាក់ និងអវិជ្ជមានចំនួន១ ១៤០នាក់ ខណៈវត្ថុសំណាកចំនួន២៣នាក់ទៀតនឹងត្រូវបន្តវិភាគនៅថ្ងៃនេះទៀត។
សេចក្តីជូនព័ត៌មានរបស់ក្រសួងសុខាភិបាលនៅថ្ងៃអង្គារនេះ បានឱ្យដឹងថា ការធ្វើតេស្តចំនួន២ដង ក្នុងព្រឹត្តិការណ៍៣វិច្ឆិកា មានចំនួន១ ១៦៦នាក់ ក្នុងនោះលទ្ធផលបង្ហាញថា លោក សួស យ៉ារ៉ា សមាជិកសភា លោក ស ចិត្រា អគ្គលេខាធិការរងក្រសួងកសិកម្ម និងឯកអគ្គរដ្ឋទូតហុងគ្រីប្រចាំនៅកម្ពុជា រួមនឹងអង្គរក្សផ្ទាល់គណប្រតិភូហុងគ្រី។
ក្រសួងបន្តថា អ្នកអវិជ្ជមានវីរុសកូវីដ១៩ មានចំនួន១ ១៤០នាក់ និងវត្ថុសំណាកនៅសល់ នឹងត្រូវបន្តវិភាគនៅថ្ងៃនេះទៀត។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី១០ ខែវិច្ឆិកា ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៣០០នាក់ ក្នុងនោះព្យាបាលជាសះស្បើយចំនួន២៨៨នាក់ និងកំពុងសម្រាកព្យាបាលនៅមន្ទីរពេទ្យ ចំនួន១២នាក់។
លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ បានអំពាវនាវយ៉ាងទទូចដល់ប្រជាពលរដ្ឋទាំងអស់ កុំមានការភ័យខ្លាចចំពោះស្ថានភាពជំងឺកូវីដ១៩ និងអំពាវនាវចំពោះអ្នកដែលជាប់ពាក់ព័ន្ធទាំងអស់ បន្តធ្វើចត្តាឡីស័កឱ្យបានខ្ជាប់ខ្ជួន ចៀសវាងការរីករាលដាលធំឡើងដោយការធ្វេសប្រហែសណាមួយ៕
