ប្រធានគណៈមេធាវីកម្ពុជាដែលត្រូវផុតអាណត្តិ លោក សួន វិសាល បានប្ដេជ្ញាថា នឹងប្រើប្រាស់ជំនាញផ្នែកច្បាប់និងបទពិសោធន៍ដ៏យូរឆ្នាំរបស់លោកក្នុងវិស័យនេះ ដើម្បីជួយដល់កិច្ចការកំណែទម្រង់ប្រព័ន្ធយុត្តិធម៌ បន្ទាប់ពីលោកត្រូវបានតែងតាំងជារដ្ឋលេខាធិការក្រសួងយុត្តិធម៌។
បើតាមព្រះរាជក្រឹត្យចុះថ្ងៃម្សិលមិញនេះ លោក សួន វិសាល ដែលទើបតែផុតអាណត្តិជាប្រធានគណៈមេធាវីកម្ពុជាកាលពីចុងខែតុលាកន្លងមកនេះ ត្រូវបានព្រះមហាក្សត្រត្រាស់បង្គាប់តែងតាំងជារដ្ឋលេខាធិការក្រសួងយុត្តិធម៌ ទៅតាមសំណើរបស់លោកនាយករដ្ឋមន្ត្រី ហ៊ុន សែន។
លោក សួន វិសាល ប្រាប់វីអូឌីនៅថ្ងៃនេះថា តំណែងជាប្រធានគណៈមេធាវីកម្ពុជារបស់លោក បានផុតអាណត្តិនៅត្រឹមថ្ងៃទី៣០ ខែតុលាកន្លងមកនេះ បន្ទាប់តំណែងនេះត្រូវបានផ្ទេរទៅលោកមេធាវី លី ច័ន្ទតុលា ដែលទើបជាប់ឆ្នោតកាលពីពាក់កណ្ដាលខែមុន។
លោក សួន វិសាល ប្រាប់វីអូឌីថា លោកមិនទាន់ដឹងទេថា លោកនឹងត្រូវបានចាត់តាំងឱ្យទទួលកិច្ចការអ្វីនៅក្រសួងយុត្តិធម៌ ក្រោយពីលោកត្រូវបានតែងតាំងឱ្យកាន់តំណែងនេះ។
លោក សួន វិសាល អាយុ៥៥ឆ្នាំ ប្រាប់ថា លោកសប្បាយចិត្តជាមួយតួនាទីថ្មីនេះ ដែលលោកថា ស្របទៅនឹងបំណងរបស់លោកដែលចង់ឃើញវិស័យយុត្តិធម៌ល្អប្រសើរផងដែរ។
លោក សួន វិសាល ប្រាប់ថា៖ «អ៊ីចឹង ក្នុងតំណែងថ្មីនេះ គឺវាស្របទៅនឹងបទពិសោធន៍របស់ខ្ញុំនិងបំណងរបស់ខ្ញុំដែលចង់ឱ្យប្រព័ន្ធយុត្តិធម៌ហ្នឹងល្អប្រសើរដែរ»។
ជាមួយតំណែងថ្មីនេះ លោក វិសាល ប្រាប់ថា លោកបានសម្រេចដាក់ពាក្យសុំព្យួរឈ្មោះមេធាវីរបស់លោករួចរាល់ហើយ ដោយសុំមិនប្រកបវិជ្ជាជីវៈនោះឡើយ ហើយលោកប្ដេជ្ញាជួយដល់កិច្ចខិតខំប្រឹងប្រែងរបស់រដ្ឋមន្ត្រីក្រសួងយុត្តិធម៌ លោក កើត រិទ្ធ ក្នុងកិច្ចការកែទម្រង់ច្បាប់និងប្រព័ន្ធយុត្តិធម៌នៅកម្ពុជា។
លោក សួន វិសាល ប្រាប់ថា៖ «ខ្ញុំគិតថា អ្វីដែលខ្ញុំធ្វើគឺស្របទៅនឹងឯកឧត្ដមរដ្ឋមន្ត្រី [កើត រិទ្ធ] ព្រោះអីឯកឧត្ដមរដ្ឋមន្ត្រីគាត់បានយកចិត្តទុកដាក់ធ្វើការកែទម្រង់ច្បាប់និងប្រព័ន្ធយុត្តិធម៌។ ឯកឧត្ដមរដ្ឋមន្ត្រីគាត់ចូលកាន់តំណែងថ្មីភ្លាម គាត់ចាប់ផ្ដើមធ្វើការកែទម្រង់ប្រព័ន្ធរឿងក្ដីនិងប្រព័ន្ធយុត្តិធម៌តែម្ដង។ អ៊ីចឹង ខ្ញុំជឿថា ខ្ញុំអាចមានបទពិសោធន៍ច្រើននៅក្នុងកិច្ចការទាំងអស់ហ្នឹង។ អ៊ីចឹង ខ្ញុំជួយឯកឧត្ដមរដ្ឋមន្ត្រីក្នុងការកែទម្រង់ប្រព័ន្ធតុលាការហ្នឹងជាអាទិភាពមុនគេ»។
លោក សួន វិសាល បានឱ្យដឹងថា លោកបានចាប់ផ្ដើមប្រកបការងារជាមេធាវីការពារក្ដីចាប់តាំងពីឆ្នាំ១៩៩៤ ហើយបានក្លាយជាមេធាវីពេញសិទ្ធិនៅឆ្នាំ១៩៩៨ នៅពេលដែលគណៈមេធាវីកម្ពុជា ត្រូវបានបង្កើតឡើងនាពេលនោះ។
លោកមេធាវីរូបនេះត្រូវបានសហភាតាឬសមាជិកនៃគណៈមេធាវីបោះឆ្នោតជ្រើសរើសឱ្យដឹកនាំគណៈមេធាវីនៅឆ្នាំ២០១៦ សម្រាប់អាណត្តិដំបូងរបស់លោក មានរយៈពេល២ឆ្នាំ មុននឹងលោកជាប់ឆ្នោតជាលើកទី២នៅឆ្នាំ២០១៨ ហើយបញ្ចប់អាណត្តិនៅឆ្នាំ២០២០នេះ៕
