ថ្នាក់ដឹកនាំក្រសួងបរិស្ថាន ជំរុញឱ្យមន្ត្រីក្រោមឱវាទបន្តពង្រឹងការការពារនិងអភិរក្សធនធានធម្មជាតិ និងត្រូវពន្លឿនការងារបោះបង្គោលព្រំ និងចុះបញ្ជីដីរដ្ឋនៅតំបន់ការពារធម្មជាតិទាំងអស់ ដើម្បីឱ្យការងារគ្រប់គ្រងធនធានធម្មជាតិមានប្រសិទ្ធភាព។
នៅក្នុងពិធីបើក «សន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១» នាទីស្តីការក្រសួងបរិស្ថាន នៅថ្ងៃអង្គារនេះ រដ្ឋមន្ត្រីក្រសួងបរិស្ថាន លោក សាយ សំអាល់ ថ្លែងថា កន្លងមក ក្រសួងបានរៀបចំបង្កើតតំបន់ការពារធម្មជាតិ និងបានរៀបចំកំណត់និងបែងចែកតំបន់គ្រប់គ្រង បោះបង្គោលព្រំ បណ្តុះបណ្តាលមន្ត្រីជំនាញនិងឧទ្យានុរក្ស បំពាក់ឧបករណ៍ មធ្យោបាយនិងសម្ភារចាំបាច់ ពង្រឹងការងារល្បាត និងអនុវត្តវិធានការច្បាប់លើបទល្មើសធនធានធម្មជាតិ។
លោកបន្តថា ក្រសួងក៏បានរៀបចំតំបន់ការពារធម្មជាតិទាំងនោះឱ្យទៅជាប្រព័ន្ធតំបន់ការពារធម្មជាតិមួយដែលមានលក្ខណៈស៊ីសង្វាក់គ្នាផ្នែកអេកូឡូស៊ី ដើម្បីបំពេញតួនាទីទ្រទ្រង់ជីវិតសត្វ សន្តិសុខស្បៀង និងសេដ្ឋកិច្ច-សង្គមនៅកម្ពុជាផងដែរ។
តែយ៉ាងណា លោកថា ក្រសួងក៏មានបញ្ហាប្រឈមមួយចំនួនដោយសារកត្តាផ្សេងៗ ដូចជា ប្រវត្តិសាស្ត្រ ភូមិសាស្ត្រ និងប្រជាសាស្ត្រ ក៏ដូចជាតម្រូវការជាក់ស្តែងផ្សេងៗ ដែលតម្រូវឱ្យមានការដោះស្រាយកែសម្រួលឱ្យបានសមស្របទៅនឹងស្ថានភាពបច្ចុប្បន្ន ដើម្បីធានាការគ្រប់គ្រងធនធានធម្មជាតិ អភិរក្សជីវចម្រុះ និងលើកកម្ពស់ជីវភាពប្រជាពលរដ្ឋនៅមូលដ្ឋានឱ្យកាន់តែប្រសើរ។
លោករដ្ឋមន្ត្រី សាយ សំអាល់ បានណែនាំដល់មន្ត្រីក្រោមឱវាទ បន្តពង្រឹងប្រសិទ្ធភាពនៃការគ្រប់គ្រងធនធានធម្មជាតិនិងអភិរក្សជីវចម្រុះឱ្យកាន់តែប្រសើរថែមទៀត ដោយធ្វើការកែសម្រួលព្រំតំបន់ការពារធម្មជាតិនិងកាត់ឆ្វៀលចេញនូវដីដែលប្រជាពលរដ្ឋបានប្រើប្រាស់និងអាស្រ័យផលជាក់ស្តែងជាយូរ ប្រកបដោយប្រសិទ្ធភាព តម្លាភាព សុចរិតភាព និងភាពត្រឹមត្រូវ។
លោកបានគូសបញ្ជាក់ថា៖ «ហើយត្រូវពន្លឿនការងារបោះបង្គោលព្រំនិងចុះបញ្ជីដីរដ្ឋនៃតំបន់ការពារធម្មជាតិទាំងអស់ ព្រមទាំងត្រូវបន្តពង្រឹងការអនុវត្តវិធានការច្បាប់ឱ្យកាន់តែតឹងរ៉ឹង»។
រដ្ឋលេខាធិការក្រសួងបរិស្ថាន លោក ផៃ ប៊ុនជឿន មានប្រសាសន៍ថា តំបន់ការពារធម្មជាតិបច្ចុប្បន្ន បានកើនដល់៦៥កន្លែង គ្របដណ្តប់លើផ្ទៃដីទំហំប្រមាណ៧,២លានហិកតា ស្មើនឹង៤១%នៃផ្ទៃដីប្រទេស។ លោកបន្តថា ក្នុងឆ្នាំនេះ ក្រសួងបានចុះបញ្ជីដីសាធារណៈរបស់រដ្ឋ សម្រាប់តំបន់ស្នូលនិងតំបន់អភិរក្សនៃដែនជម្រកសត្វព្រៃពាមក្រសោប លើផ្ទៃដីជាង៤ ៦៧២ហិកតា និងដែនជម្រកសត្វព្រៃភ្នំព្រេច លើផ្ទៃដីជាង១១៩ ៥៥៤ហិកតា។
ចំពោះការទប់ស្កាត់និងបង្ក្រាបបទល្មើសវិញ លោកថា មន្ត្រីជំនាញនិងឧទ្យានុរក្សបានបង្ក្រាបការលួចកាប់និងដឹកជញ្ជូនឈើខុសច្បាប់ ការបរបាញ់និងដាក់អន្ទាក់សត្វព្រៃ និងការទន្ទ្រានយកដីក្នុងតំបន់ការពារធម្មជាតិដោយខុសច្បាប់ ក្នុងនោះ បានដោះអន្ទាក់២៩ ៤២៦អន្ទាក់, រឹបអូសវត្ថុតាងរណារយន្ត៣ ៤៩២គ្រឿង, ត្រាក់ទ័រ៨៥គ្រឿង, រថយន្ត១៤៨គ្រឿង, គោយន្តកន្ត្រៃ៦៩៧គ្រឿង, ម៉ូតូ៤២៩គ្រឿង និងកាំភ្លើងកែច្នៃ៦៣៣ដើម។
លោក ផៃ ប៊ុនជឿន បានបន្ថែមថា ទន្ទឹមនឹងនោះ បទល្មើសចំនួន៦ ០៣៧ករណី ត្រូវបានបង្ក្រាប ក្នុងនោះបានធ្វើការអប់រំនិងកិច្ចសន្យា១ ៧៨០ករណី, ពិន័យអន្តរការណ៍៧៣១ករណី និងបានកសាងសំណុំរឿងទៅតុលាការចំនួន៤៥២ករណី៕