រដ្ឋសភាបានអនុម័តលើសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម ដោយសំឡេង១១៦លើ១១៦សំឡេង ខណៈអតីតបក្សប្រឆាំងប្រកាសបដិសេធមិនទទួលស្គាល់ការអនុម័តនេះ។
សេចក្តីប្រកាសព័ត៌មានរបស់រដ្ឋសភា ស្តីពី លទ្ធផលសម័យប្រជុំរដ្ឋសភា លើកទី៥ នីតិកាលទី៦ បានឱ្យដឹងថា សម័យប្រជុំរដ្ឋសភា នៅថ្ងៃទី០២ ខែវិច្ឆិកានេះ បានពិភាក្សានិងអនុម័តលើសេចក្តីព្រាងច្បាប់ចំនួន៦ ក្នុងនោះក៏មានសេចក្តីព្រាងច្បាប់ ស្តីពី ការអនុវត្តយល់ព្រមលើពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម។ សេចក្តីប្រកាសព័ត៌មាន បន្តថា អង្គរដ្ឋសភាបានអនុម័តយល់ព្រមលើសេចក្តីព្រាងច្បាប់ទាំងនោះ ដោយសំឡេង១១៦លើ១១៦សំឡេង។
យោងតាមសេចក្តីថ្លែងហេតុរបស់រដ្ឋាភិបាលកម្ពុជា ចុះថ្ងៃទី៩ ខែតុលា ឆ្នាំ២០២០ បានឱ្យដឹងថា ពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម ជាឯកសារបច្ចេកទេសដែលបានកត់ត្រាទុកយ៉ាងលម្អិតនូវខ្សែព្រំដែនគោករវាងប្រទេសទាំងពីរ និងអមដោយផែនទីឋានលេខាព្រំដែនគោកខ្នាត ១/២៥០០០ ចំនួន ៩២ផ្ទាំង។
នៅថ្ងៃនេះដែរ អតីតគណបក្សសង្គ្រោះជាតិ បានចេញសេចក្តីថ្លែងការណ៍មួយដោយចាត់ទុកការអនុម័តលើសេចក្តីព្រាងច្បាប់នេះពីសំណាក់រដ្ឋសភាកម្ពុជា ថាជាការយល់ព្រមកាត់ទឹកដីខ្មែរទៅឱ្យប្រទេសវៀតណាមជាផ្លូវការ។
គណបក្សនេះបន្តថា ច្បាប់ស្តីពីការអនុវត្តយល់ព្រមលើពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម ធ្វើឡើងតាមសន្ធិសញ្ញាកំណត់ព្រំដែនរដ្ឋឆ្នាំ១៩៨៥ ដែលជាសន្ធិសញ្ញាខុសច្បាប់ ធ្វើឱ្យប្រទេសកម្ពុជា បាត់បង់បូរណភាពទឹកដីលើប្រទេសវៀតណាមម ហើយដែលត្រូវមោឃភាពដោយកិច្ចព្រមព្រៀងទីក្រុងប៉ារីស ឆ្នាំ១៩៩១ និងមាត្រា៥៥នៃរដ្ឋធម្មនុញ្ញនៃព្រះរាជាណាចក្រកម្ពុជា។
គណបក្សនេះបញ្ជាក់ថា៖ «គណបក្សសង្គ្រោះជាតិ ប្រកាសបដិសេធមិនទទួលស្គាល់ដាច់ខាតនូវច្បាប់ស្តីពីការអនុវត្តយល់ព្រមលើពិធីសារខណ្ឌសីមានិងបោះបង្គោលព្រំដែនគោក រវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម»។
ទោះយ៉ាងណា ប្រធានគណៈកម្មាធិការព្រំដែនកម្ពុជា លោក វ៉ា គឹមហុង ធ្លាប់បានអះអាងហើយថា ការបោះបង្គោលព្រំដែនរវាងកម្ពុជានិងវៀតណាម ត្រឹមត្រូវ១០០ភាគរយ ហើយលោកជំរុញអ្នកអះអាងថាមានបញ្ហា ឱ្យបង្ហាញភស្តុតាងត្រឹមត្រូវទៅកាន់គណៈកម្មាធិការរបស់លោក។
លោក វ៉ា គឹមហុង មានប្រសាសន៍ថា៖ «បើថាបាត់ សូមប្រាប់ផង ហើយក៏សូមថា កុំថាខ្ញុំអគតិ។ ខ្ញុំអត់មាននេះទេ ខ្ញុំ Open [បើកចំហ] គឺថាប្រាប់មកល្អ ថាវាបាត់អីមែន ខ្ញុំនឹងដាក់ឱ្យស្រាវជ្រាវ ជាជាងពិបាកស្វែងរក ទៅរកអាប្រភពបាត់មែនឬមិនមែន។ មិនជឿ គាត់ចេះតែថា ចេះតែថាទៅ ប្អូនឯង! អាងគណបក្សប្រឆាំងផង វាចេះតែថាសំអុយរដ្ឋាភិបាលទៅ។ អាពួកអង្គការខ្លះប្រឆាំងយើង វាចេះតែថាឱ្យរួចខ្លួនទៅ»។
គួរបញ្ជាក់ថា កម្ពុជានិងវៀតណាម មានព្រំដែនគោករួមគ្នាប្រវែង១ ២៧០គីឡូម៉ែត្រ៕
