សហគមន៍ជនជាតិដើមភាគតិចពូនង ខេត្តមណ្ឌលគិរី អំពាវនាវដល់ក្រសួងបរិស្ថាននិងស្ថាប័នពាក់ព័ន្ធ ទប់ស្កាត់ការកាប់ទន្រ្ទានព្រៃឈើក្នុងតំបន់ដែនជម្រកសត្វព្រៃណាមលៀរឱ្យមានប្រសិទ្ធភាព ខណៈការកាប់ទន្ទ្រានដីព្រៃខុសច្បាប់នៅតែកើតមានក្នុងតំបន់ការពារមួយនេះ។
តំណាងជនជាតិដើមភាគតិចពូនង នៅក្នុងភូមិពូលុ ឃុំប៊ូស្រា ស្រុកពេជ្រាដា លោក ក្លាង ថុល លើកឡើងថា ប្រសិនបើក្រសួងពាក់ព័ន្ធនិងអាជ្ញាធរមិនទប់ស្កាត់ទេ ព្រៃឈើក្នុងតំបន់ដែនជម្រកសត្វព្រៃណាមលៀរនឹងប្រឈមការបាត់បង់ ដែលធ្វើឱ្យប៉ះពាល់ដល់ជម្រកសត្វនិងប៉ះពាល់ប្រពៃណីជនជាតិដើមភាគតិចផងដែរ។
លោកថា៖ «ព្រៃហ្នឹង ជាព្រៃសហគមន៍ស្ថិតនៅក្នុងដែនអភិរក្ស អ៊ីចឹងបើសិនយើងនិងអាជ្ញាធរមិនទប់ស្កាត់ ថ្ងៃក្រោយទៅកូនចៅអត់មានកន្លែងធ្វើចម្ការនិងធ្វើការអភិរក្ស។ ឥលូវហ្នឹង បើយើងម្នាក់សម្រុកទៅកាប់ កូនចៅយើងអត់មានអីធ្វើ។ គេកាប់ទន្ទ្រានរុករានរាល់ថ្ងៃ យកជាកម្មសិទ្ធិម្នាក់ៗ អ៊ីចឹងម៉េចកើត»។
លោក ក្លាង ថុល បញ្ជាក់ថា បច្ចុប្បន្នដីព្រៃនៅក្នុងតំបន់ដែនជម្រកសត្វព្រៃភ្នំណាមលៀរ ប្រហែល៤០ទៅ៥០ហិកតា ត្រូវបានកាប់ទន្ទ្រានយកធ្វើជាកម្មសិទ្ធិពីសំណាក់ពលរដ្ឋនៅក្បែរតំបន់នោះនិងអ្នកចំណាកស្រុក។
អ្នកប្រឹក្សាយោបល់បណ្ដាញសហគមន៍ជនជាតិដើមភាគតិច ខេត្តមណ្ឌលគិរី លោក គ្រើង តុលា បានស្នើក្រសួងបរិស្ថាននិងស្ថាប័នពាក់ព័ន្ធការពារនិងទប់ស្កាត់ការកាប់ទន្រ្ទានដីព្រៃក្នុងដែនជម្រកសត្វព្រៃភ្នំណាមលៀរឱ្យមានប្រសិទ្ធភាព ខណៈបច្ចុប្បន្នសកម្មភាពនៃការទន្ទ្រានដីព្រៃខុសច្បាប់នៅតែកើតមានឡើងដដែល។
ក្រៅពីនោះ លោកស្នើទៅក្រសួងនិងស្ថាប័នពាក់ព័ន្ធចាត់វិធានការទៅលើអាជ្ញាធរណាដែលបានឃុបឃិតជាមួយប្រជាពលរដ្ឋកាប់ទន្រ្ទានព្រៃឈើក្នុងដែនជម្រកសត្វព្រៃនេះផងដែរ។
លោកថា៖ «ខ្ញុំគិតថា គួរតែចាត់វិធានការមន្ត្រីជំនាញដែលគ្រប់គ្រងនៅកន្លែងនោះ ព្រោះ បើសិនជាមេប៉ុស្តិ៍ឬស្នាក់ការនៅទីនោះមិនអនុញ្ញាត ប្រជាពលរដ្ឋធម្មតាគ្មានអ្នកណាហ៊ានទេ។ អ៊ីចឹងបើសិនជាសមត្ថកិច្ចនិងមន្ត្រីជំនាញគាត់មិនបើកដៃទេ ប្រជាពលរដ្ឋនិងអ្នកផ្សេងទៀតនឹងមិនហ៊ានធ្វើទេ»។
នាយកដែនជម្រកសត្វព្រៃណាមលៀរ លោក វុធ សារុំ មានប្រសាសន៍ថា មន្ត្រីបរិស្ថានតែងតែធ្វើការទប់ស្កាត់រាល់បទល្មើសព្រៃឈើក្នុងដែនអភិរក្សនេះ។
លោកថា៖ «ពួកខ្ញុំគឺមន្ត្រីជំនាញអនុវត្តនីតិវិធីតាមច្បាប់ អ៊ីចឹងពាក់ព័ន្ធនឹងការដឹករណារយន្ត យកចូលព្រៃ យកអី! តែគាត់ដឹកកាត់កន្លែងខ្ញុំ ឱ្យតែខ្ញុំឃើញ គឺខ្ញុំចាប់ហើយ ទោះនៅលើដងផ្លូវសាធារណៈក៏ដោយ»។
ដែនជម្រកសត្វព្រៃណាមលៀរ ត្រូវរដ្ឋាភិបាលដាក់បញ្ចូលជាដែនជម្រកសត្វព្រៃកាលពីឆ្នាំ២០១៦ ដោយស្ថិតនៅក្រោមការគ្រប់គ្រងរបស់ក្រសួងបរិស្ថាន ដែលមានផ្ទៃដីជាង២ម៉ឺនហិកតា (២១ ៩៣៣ហិកតា)។
មន្ត្រីសម្របសម្រួលសមាគមអាដហុកប្រចាំខេត្តមណ្ឌលគិរី លោក អ៊ាង ម៉េងលី សង្កេតឃើញថា ការកាប់រុករានដីព្រៃក្នុងតំបន់ដែនជម្រកសត្វព្រៃបានថយចុះមួយរយៈនេះ បន្ទាប់ពីក្រុមការងារមកពីក្រសួងកសិកម្ម ក្រសួងរៀបចំដែនដី និងក្រសួងបរិស្ថាន បានចុះទៅពិនិត្យនិងវាស់វែងកំណត់ដីរដ្ឋនៅក្នុងខេត្តនោះ។
លោកថា៖ «បទល្មើសមានការថមថយ ប៉ុន្តែបន្ទាប់ពីគណៈកម្មការហ្នឹងខកខានមិនបានចុះផ្ទាល់ ការកាប់ទន្រ្ទានដីព្រៃមានឡើងវិញ នេះជារូបភាពមួយ យើងឃើញថា អាចជាប់ពាក់ព័ន្ធនឹងការឃុបឃិតគ្នាជាមួយអាជ្ញាធរថ្នាក់ក្រោមជាតិ ហើយឈ្មួញមានអំណាចផង ដែលប្រើប្រាស់ឱ្យប្រជាពលរដ្ឋចំណាកស្រុកនិងអ្នកនៅនោះផ្ទាល់ រំលោភយកដីរដ្ឋនេះ»។
ក្រសួងបរិស្ថាន ធ្លាប់បានព្រមានជារឿយៗនិងបានចាត់វិធានការផ្លូវច្បាប់ចំពោះជនខិលខូចដែលទៅទន្ទ្រានកាន់កាប់ដីរដ្ឋនិងដីតំបន់ការពារដោយខុសច្បាប់។ ក្រសួងក៏បានដាក់ចេញវិធានការនិងការណែនាំជាបន្តបន្ទាប់មិនឱ្យមានការទិញលក់ដី និងត្រូវបញ្ឈប់ជាបន្ទាន់រាល់សកម្មភាពខុសច្បាប់នៅតំបន់ការពារធម្មជាតិនិងដីរដ្ឋ៕