តុលាការកំពូលច្រានចោលការទាមទាររបស់អតីតបុគ្គលិកវិទ្យុអាស៊ីសេរីពីររូប ដែលប្ដឹងប្រឆាំងនឹងសេចក្ដីសម្រេចរបស់សាលាដំបូងរាជធានីភ្នំពេញ ពាក់ព័ន្ធនឹងការបើកការស៊ើបអង្កេតសំណុំរឿងរបស់ពួកគេឡើងវិញ។
កាលពីថ្ងៃទី៣ ខែតុលាឆ្នាំមុន សាលាដំបូងរាជធានីភ្នំពេញ បានសម្រេចឱ្យបើកការស៊ើបអង្កេតឡើងវិញនូវសំណុំរឿងប្រឆាំងអតីតបុគ្គលិកវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ដោយថា ការស៊ើបអង្កេតកន្លងមកនៅមានចំណុចខ្វះខាត។
ប៉ុន្តែអតីតបុគ្គលវិទ្យុអាស៊ីសេរីទាំង២រូបនេះ បានប្ដឹងទៅតុលាការថ្នាក់លើជាបន្តបន្ទាប់ ដោយជំទាស់នឹងសេចក្ដីសម្រេចបែបនេះរបស់សាលាដំបូងរាជធានីភ្នំពេញ។
៦ថ្ងៃបន្ទាប់ពីសវនាការ ប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុន នៅថ្ងៃនេះ បានសម្រេចតម្កល់សេចក្ដីសម្រេចរបស់តុលាការថ្នាក់ក្រោមទុកជាបានការដដែល ដោយសម្អាងថា ការឱ្យបើកការស៊ើបអង្កេតវិញនេះ ដើម្បីឱ្យតុលាការស្វែងរកភស្តុតាងបន្ថែម។
លោក និល ណុន បានប្រកាសសេចក្ដីសម្រេចនេះនៅចំពោះមុខលោក អ៊ួន ឈិន និងលោក យាង សុធារិន្ទ ដែលបានបង្ហាញខ្លួនក្នុងបន្ទប់សវនាការផងដែរនៅព្រឹកថ្ងៃនេះ។
ប្រាប់អ្នកសារព័ត៌មាននៅក្រៅរបងតុលាការ លោក អ៊ួន ឈិន សម្ដែងការខកចិត្តចំពោះសេចក្ដីសម្រេចរបស់តុលាការកំពូល ដោយថា ការសម្រេចនេះមិនបានផ្ដល់យុត្តិធម៌ និងធ្វើឱ្យពួកគាត់បន្តបាត់បង់សិទ្ធិសេរីភាពទៀត។
លោក អ៊ួន ឈិន ប្រាប់ថា៖ «អ្វីៗរួមទាំងឧបករណ៍របស់ខ្ញុំ រហូតដល់ខ្ញុំមិនមានលទ្ធភាព មិនមានរបស់ប្រើប្រាស់ ព្រោះពួកគាត់យកទៅក្ដោបក្ដាប់រក្សាទុកអស់ហើយ។ ខ្ញុំគិតថា ពួកគាត់គួរតែធ្វើការ ហើយបញ្ចប់រឿងរ៉ាវ និងផ្ដល់យុត្តិធម៌ដល់ពួកខ្ញុំឱ្យមានសេរីភាពពេញលេញជាពលរដ្ឋដូចគេដូចឯង ធ្វើដំណើរទៅណាមកណាបានដោយសេរី ប្រកបការងារនិងរកស៊ីអីបានស្រួល វាមិនគួរណាមានអ៊ីចឹងតទៅទៀត»។
លោក យាង សុធារិន្ទ ប្រាប់ថា គិតត្រឹមខែក្រោយនេះ សំណុំរឿងរបស់ពួកគាត់មានរយៈពេល៣ឆ្នាំហើយ ប៉ុន្តែតុលាការនៅតែបន្តបើកការស៊ើបអង្កេតទៀត បើទោះតុលាការបានយកឧបករណ៍ផ្ទុកទិន្នន័យនៅក្នុងស្ទូឌីយ៉ូទៅអស់ហើយក៏ដោយ។ លោកលើកឡើងថា ការសម្រេចបែបនេះ បញ្ជាក់ថា តុលាការរកភស្តុតាងដាក់បន្ទុកលើកពួកគាត់មិនបាន។
លោក យាង សុធារិន្ទ ប្រាប់ថា៖ «យើងធ្វើការស្ថិតនៅក្នុងការរឹតត្បិតខ្លួនឯងខ្លាំង ហើយបើផ្លូវចិត្តកូនប្រពន្ធវិញចេះតែមានជាប់រហូត។ កូនចេះតែសួរដែរពីបញ្ហាតុលាការហ្នឹង រហូតដល់គាត់ថា បើមានលុយសឹងទិញសេរីភាពហ្នឹងទៀត»។
លោក សុធារិន្ទ បន្តថា៖ «ខ្ញុំសំណូមពរពេលហ្នឹង សូមឱ្យតុលាការថ្នាក់ក្រោមលោកធ្វើការឱ្យបានលឿនចំពោះបញ្ហារឿងខ្ញុំហ្នឹង ហើយទី២ ខ្ញុំឃើញថា ក្រសួងយុត្តិធម៌តែងតែប្រកាសពន្លឿននីតិវិធី ធ្វើម៉េចសំណុំដែលកប់ចោលឱ្យបានលឿនបានអីហ្នឹង ខ្ញុំគាំទ្រអាហ្នឹង សូមឱ្យធ្វើបានដូចមាត់គាត់និយាយផង ហើយកុំសើរើតែសំណុំរឿងផ្សេងៗ សម្រាប់សំណុំពួកខ្ញុំដែលជារឿងនយោបាយហ្នឹង កប់ចោល ហើយចេះតែរក្សាទុក វាអយុត្តិធម៌សម្រាប់ពួកខ្ញុំ»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា ហៅកាត់ CCHR អ្នកស្រី ចក់ សុភាព សម្ដែងការខកចិត្តចំពោះការសម្រេចបែបនេះរបស់តុលាការកំពូល។ អ្នកស្រីបន្តថា ការសម្រេចបែបនេះ បង្ហាញច្បាស់ថា តុលាការគ្មានភស្តុតាងគ្រប់គ្រាន់ក្នុងការដាក់បន្ទុកលើពួកគាត់។
អ្នកស្រី ចក់ សុភាព ប្រាប់ថា៖ «កន្លងមក យើងសង្ឃឹមថា តុលាការគួរតែធ្វើការសម្រេចជាស្ថាពរលើករណីនេះ ដើម្បីធានាថា ពួកគាត់ទាំងពីរទទួលបាននូវយុត្តិធម៌ ប៉ុន្តែយើងឃើញថា តាំងពីដំណាក់សាលាដំបូង ចុងក្រោយតុលាការកំពូល នៅតែតម្កល់នូវសេចក្ដីដែលគេហៅថា ចាត់របៀបឬបើកការស៊ើបអង្កេតឡើងវិញ»។
អ្នកស្រី ចក់ សុភាព បន្តថា ការសម្រេចរបស់តុលាការបង្ហាញឱ្យឃើញថា យុត្តិធម៌នឹងមិនត្រូវបានផ្ដល់ឱ្យអ្នកទាំងពីរនោះទេ ប្រសិនជាប្រព័ន្ធយុត្តិធម៌នៅតែត្រូវបានយកមកដើម្បីប្រឆាំងនឹងមតិរិះគន់នោះ។
អ្នកស្រី ចក់ សុភាព ប្រាប់បន្តថា៖ «វាជាសារមួយបង្ហាញថា អ្នកដែលមានមតិជំទាស់ឬក៏អ្នកដែលបំពេញតួនាទីជាអ្នកសារព័ត៌មានដែលមានវិជ្ជាជីវៈ នឹងត្រូវប្រឈមនឹងការប្រើប្រាស់ប្រព័ន្ធយុត្តិធម៌ជាការដៅមុខសញ្ញា»។
លោក អ៊ួន ឈិន និងលោក យាង សុធារិន្ទ ត្រូវបានអាជ្ញាធរចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧ ហើយក្រោយមក ត្រូវបញ្ជូនខ្លួនទៅដាក់ឃុំក្រោមការចោទប្រកាន់ថា បានធ្វើចារកម្មឱ្យរដ្ឋបរទេស ហើយក្រោយមក ត្រូវបានចោទប្រកាន់មួយករណីទៀតពីបទផលិតនិងកាន់កាប់រូបភាពអាសអាភាស។
អ្នកទាំងពីរត្រូវបានដោះលែងឱ្យស្ថិតនៅក្រៅឃុំបណ្ដោះអាសន្ន និងដាក់ឱ្យស្ថិតក្រោមការត្រួតពិនិត្យតាមផ្លូវតុលាការចាប់តាំងពីខែសីហា ឆ្នាំ២០១៨៕