លោកនាយករដ្ឋមន្ត្រី ហ៊ុន សែន ព្រមានចំៗទៅអតីតតំណាងរាស្ត្របក្សប្រឆាំង លោក ហូរ វ៉ាន់ ដែលថា បានបញ្ជាឱ្យមានការតវ៉ាមួយនៅមុខស្ថានទូតចិនក្នុងរាជធានីភ្នំពេញ ប្រឆាំងនឹងកងទ័ពចិនដែលត្រូវបានរាយការណ៍ថា មានវត្តមាននៅកម្ពុជា។
លោក ហ៊ុន សែន បានព្រមានបែបនេះនៅក្នុងពិធីបើកការដ្ឋានសាងសង់ស្ពានមួយដែលតភ្ជាប់តំបន់កោះនរា ស្ថិតក្នុងខណ្ឌច្បារអំពៅ មកទីក្រុងរណបកោះពេជ្រ ស្ថិតក្នុងខណ្ឌចំការមន ក្នុងរាជធានីភ្នំពេញ នាថ្ងៃចន្ទនេះ។
លោក ហ៊ុន សែន ថ្លែងថា៖ «អា វ៉ាន់ អ្ហើយ ល្មមបានហើយ! ឈប់បានក៏ឈប់ទៅ អា វ៉ាន់! កូនប្រពន្ធអ្ហែងនៅភ្នំពេញទេ។ សម្តីអ្ហែងបញ្ជា នៅក្នុងទូរសព្ទទាំងអស់។ រឿងអីអ្ហែងមកបញ្ជាឱ្យប្រឆាំងទូតចិន ប្រឆាំងវត្តមានយោធាចិន។ ពួកអ្ហែងឆ្កួត ប្រយ័ត្នប្រពន្ធអ្ហែង កូនអ្ហែង ដេកអត់សុខទេ កំពុងតែភ័យ។ អ្ហែងឈប់បាន ឈប់ទៅ!»។
មេដឹកនាំរូបនេះថ្លែងបន្តថា៖ «អ្ហែងអត់រួចខ្លួនទេ តែអ្ហែងកុំរុញកូនអ្ហែង ប្រពន្ធអ្ហែងឱ្យចូលគុកថែម សូមកុំណា! សង្ឃឹមថា លោកជំទាវ ហូរ វ៉ាន់ [ភរិយាលោក ហូរ វ៉ាន់] មិនធ្វើជាអ្នកបែងចែកលុយសម្រាប់ក្រុមឧទ្ទាមក្នុងស្រុកទេ។ និយាយគ្នាឱ្យច្បាស់!»។
ក្នុងពិធីប្រារព្ធខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីស មានមនុស្សមួយក្រុម រួមទាំងភរិយាអតីតសកម្មជនគណបក្សសង្គ្រោះជាតិ បានព្យាយាមប្រមូលផ្តុំគ្នាមុខស្ថានទូតចិនក្នុងរាជធានីភ្នំពេញ ក្នុងបំណងដាក់ញត្តិទាមទារឱ្យដកកងទ័ពចិនចេញពីកម្ពុជា។ ប៉ុន្តែការព្យាយាមនោះត្រូវបានអាជ្ញាធរបំបែក ហើយមនុស្ស៣នាក់ផ្សេងទៀតត្រូវបានចាប់ឃុំខ្លួន។
ជាងនេះទៀត លោក ហ៊ុន សែន ក៏សំដៅដល់អតីតមន្ត្រីមួយរូបទៀតដោយមិនបញ្ចេញឈ្មោះដែរ ដោយគ្រាន់តែបង្ហើបថា ប្រពន្ធរបស់គេរកស៊ីដូរលុយនៅក្នុងរាជធានី។ បន្ថែមពីនេះ លោកថ្លែងថា ការបង្ហើបសារជាសាធារណៈនេះ មិនមែនមានន័យថា យកក្រុមគ្រួសារអ្នកទាំងនោះធ្វើជាចំណាប់ខ្មាំងទេ។
នាយករដ្ឋមន្ត្រីកម្ពុជាក៏បានប្រតិកម្មទាំងមិនបញ្ចេញឈ្មោះ ឱ្យប្រទេសមហាអំណាចមួយបង្ហាញភស្តុតាង ដែលបានចោទកម្ពុជាពីការលួចចុះហត្ថលេខាសម្ងាត់ជាមួយមហាអំណាចចិនដើម្បីដាក់កងទ័ពលើទឹកដីកម្ពុជា។
លោក ហូរ វ៉ាន់ ដែលនិរទេសខ្លួនក្រោយតុលាការរំលាយគណបក្សសង្គ្រោះជាតិ សុំមិនធ្វើអត្ថាធិប្បាយ ដោយថា លោកមិនទាន់បានស្តាប់សំឡេងរបស់នាយករដ្ឋមន្ត្រីនៅឡើយ ហើយវីអូឌីក៏មិនអាចទាក់ទងភរិយារបស់លោកបាននៅឡើយទេ នៅត្រឹមរសៀលថ្ងៃនេះ។
ខ្មែរនៅក្រៅប្រទេស ដូចជានៅសហរដ្ឋអាមេរិក បារាំង និងនៅប្រទេសស្វីស ជាដើម បានធ្វើពិធីប្រារព្ធខួប២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីស តាមប្រទេសដែលពួកគេរស់នៅ ទាមទារឱ្យប្រទេសជាហត្ថលេខីនៃកិច្ចព្រមព្រៀងនេះ អន្តរាគមន៍ជួយសង្គ្រោះប្រជាធិបតេយ្យនៅកម្ពុជា។
អតីតមេដឹនាំគណបក្សសង្គ្រោះជាតិ លោក សម រង្ស៊ី បានថ្លែងលើហ្វេសប៊ុករបស់លោកនាថ្ងៃទី២៥ ខែតុលា ថា៖ «កាលពីថ្ងៃ២៣ តុលា ២០២០កន្លងទៅនេះ ជនជាតិខ្មែរមួយក្រុមដែលរស់នៅប្រទេសស្វីស បានរៀបចំធ្វើបាតុកម្មនៅទីក្រុងហ្សឺណែវ ដើម្បីថ្កោលទោសនយោបាយឈ្លានពានគេឯង និងវាទីនិយមរបស់ចិនកុម្មុយនីស្តនៅតំបន់អាស៊ីភាគអាគ្នេយ៍»។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង ប្រាប់ក្រុមអ្នកសារព័ត៌មានតាមបណ្តាញសង្គមតេឡេក្រាមនៅថ្ងៃនេះថា អ្នកទាំង៣រូបដែលសមត្ថកិច្ចចាប់ខ្លួនអំឡុងព្យាយាមតវ៉ាមុខស្ថាតទូតចិននោះ ត្រូវបានចោទប្រកាន់ពី«បទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងសម្រេចឱ្យឃុំខ្លួនតាមនីតិវិធីនៅពន្ធនាគារ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា បទចោទនេះដូចជាទម្លាប់ ព្រោះវាដូចគ្នាទៅនឹងករណីចោទប្រកាន់អ្នកដែលត្រូវបានចាប់ឃុំខ្លួនមុនៗ បើទោះបីការចាប់ខ្លួននោះ វាកើតចេញពីការតវ៉ាដោយសន្តិវិធី តែអាជ្ញាធរអះអាងថាជាវិធានការច្បាប់។
ប៉ុន្តែលោក សំអាត ប្រាប់ថា បើគេមើលពីទិដ្ឋភាពច្បាប់ ការចោទប្រកាន់បាន វាទាល់តែមានចេតនាក្នុងការប្រព្រឹត្ត ច្បាប់ចែង និងព្យសនកម្មដែលគេហៅថាការខូចខាតឬវិនាសអន្តរាយណាមួយ។
ប៉ុន្តែលោកថា ករណីចោទប្រកាន់ទាំងអស់មិនមានព្យសនកម្មកើតឡើងទេ ដែលធ្វើឱ្យក្រុមសិទ្ធិមនុស្សជាតិនិងអន្តរជាតិនៅតែមើលឃើញថា សិទ្ធិមូលដ្ឋានរបស់ពលរដ្ឋដែលមានចែងក្នុងច្បាប់ស្ថិតក្នុងភាពរឹតត្បិត ធ្វើឱ្យប៉ះពាលមុខមាត់កម្ពុជាលើឆាកអន្តរជាតិ។
លោក អំ សំអាត ប្រាប់ថា៖ «ការចោទប្រកាន់៣នាក់បន្ថែមទៀតនេះ វាអាចនឹងបន្ថែមការព្រួយបារម្ភ ហើយនិងបន្ថែមនូវការរិះគន់ពីការរំលោភសិទ្ធិមនុស្សនិងសិទ្ធិជាមូលដ្ឋាន»។
អ្នកវិភាគសង្គម លោក គឹម សុខ ដែលមានមូលដ្ឋាននៅក្រៅប្រទេស មានប្រសាសន៍ថា សារទម្លាយរបស់មេដឹកនាំកម្ពុជា អាចជាយុទ្ធសាស្ត្រសម្លុតមុន ដើម្បីទប់ស្កាត់ការងើបឡើងណាមួយ ដូចការផ្ទុះឡើងនៅប្រទេសថៃ ខណៈលោកថា ការដឹកនាំបច្ចុប្បន្នកំពុងបង្កការឈឺចាប់ដល់ប្រជាពលរដ្ឋខ្មែររងគ្រោះធ្ងន់ធ្ងរ។
លោក គឹម សុខ និយាយថា៖ «លោក ហ៊ុន សែន បារម្ភក្រែងមានសិទ្ធិងើបតវ៉ាក្នុងទ្រង់ទ្រាយមហាជនខែ្មរដូចនៅប្រទេសថៃ ដែលអាចធ្វើឱ្យអំណាចគ្រួសារ ហ៊ុន ដល់ចំនុចក្ស័យ […]។ មែនទែនទៅ លោក ហ៊ុន សែន គាត់ប្រុងជើងការទប់ស្កាត់ រហូតប្រើលេសគ្រោះទឹកជំនន់ដាក់ពង្រាយកងទ័ពគ្រប់ខេត្តទាំងអស់»៕