ក្រសួងបរិស្ថានឱ្យដឹងថា ក្នុងរយៈពេល៩ខែឆ្នាំនេះ មន្ត្រីឧទ្យានុរក្សបានបង្ក្រាបបទល្មើសធនធានធម្មជាតិ បានជិត៦ ៦០០ករណី ក្នុងនោះ បានបញ្ជូនសំណុំរឿងទៅតុលាការជាង៤៥០ករណី រួមនឹងរឹបអូសបានវត្ថុតាងជាច្រើនទៀត។
រដ្ឋលេខាធិការក្រសួងបរិស្ថាន លោក នេត្រ ភក្ត្រា មានប្រសាសន៍ក្នុងសន្និសីទសារព័ត៌មានមួយនៅថ្ងៃទី២៦ ខែតុលា នៅទីស្តីការក្រសួងថា គិតចាប់ពីខែមករា ដល់ខែកញ្ញា មន្ត្រីឧទ្យានុរក្សបានចុះល្បាតចំនួន១៨ ៧៩៥លើក ក្នុងនោះ បង្ក្រាបបទល្មើសបានចំនួន៦ ៥៩៧ករណី។
លោកបន្តថា ក្នុងប្រតិបត្តិការបង្ក្រាបនោះដែរ មន្ត្រីក្រសួងបានរឹបអូសរណារយន្តចំនួន៣ ៥១៨គ្រឿង រឹបអូសរថយន្តចំនួន១៥០គ្រឿង ត្រាក់ទ័រចំនួន៨៦គ្រឿង គោយន្តកន្ត្រៃចំនួន៨៦៨គ្រឿង ដោះអន្ទាក់បានចំនួន២៩ ៤៨៣អន្ទាក់ ដកហូតកាំភ្លើងកែច្នៃចំនួន៦៣៧គ្រឿង និងដកហូតម៉ូតូបានចំនួន៥៣៣គ្រឿង។
លោក នេត្រ ភក្ត្រា បានបន្ថែមថា ក្រៅពីនោះ មន្ត្រីរឹបអូសឈើបានចំនួន២ ៦២០ម៉ែត្រគូប និងបានឱ្យធ្វើកិច្ចសន្យា និងអប់រំដល់ជនល្មើសកម្រិតស្រាលចំនួន២ ០៦២ករណី ពិន័យអន្តរការណ៍ចំនួន៧៣៤ករណី និងបញ្ជូនសំណុំរឿងទៅតុលាការចំនួន៤៥៤ករណី។
បើតាមមន្ត្រីរូបនេះ ក្នុងក្របខណ្ឌនៃការអនុវត្តគោលនយោបាយកែទម្រង់ការងារគ្រប់គ្រងធនធានធម្មជាតិ បច្ចុប្បន្ន កម្ពុជាមានតំបន់ការពារធម្មជាតិចំនួន៦៨តំបន់ លើផ្ទៃដីប្រមាណ៧,៣លានហិកតា នៅខេត្តចំនួន២០ ឬស្មើនឹង៤១%នៃផ្ទៃដីប្រទេសកម្ពុជា។
លោកបន្តថា បច្ចុប្បន្ននេះ មន្ត្រីឧទ្យានុរក្សចំនួន១ ២៤០នាក់ កំពុងឈរជើងការពារនៅក្នុងតំបន់ការពារធម្មជាតិនិងរបៀងអភិរក្សជីវចម្រុះប្រព័ន្ធតំបន់ការពារធម្មជាតិនៅទូទាំងប្រទេសកម្ពុជា៕
