ពលរដ្ឋ១០នាក់ដែលអះអាងថាជាតំណាងឱ្យពលរដ្ឋ១៩៧គ្រួសារ កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អេគ្រីខាល់ឈ័រ គ្រុប ស្ថិតក្នុងស្រុកស្រែអំបិល ខេត្តកោះកុង បានសុំពន្យារពេលចូលបំភ្លឺចំពោះមុខតុលាការ ដោយសារអវត្តមានមេធាវីការពារក្តីរបស់ពួកគេ។
កាលពីថ្ងៃទី២៩ ខែកញ្ញា ចៅក្រមស៊ើបសួរនៃសាលាដំបូងខេត្តកោះកុង លោក ឡោ ក្រឹម បានបង្គាប់ឱ្យតំណាងពលរដ្ឋមានជម្លោះដីធ្លី១០នាក់ ចូលបំភ្លឺនៅថ្ងៃទី២០ និងថ្ងៃទី២៧ ខែតុលា ទៅតាមបណ្តឹងរបស់លោក ហេង ហ៊ុយ ដែលចោទប្រកាន់ពីបទ «បរិហារកេរិ៍្តជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ប៉ុន្តែតំណាងពលរដ្ឋទាំង១០នាក់នោះ បានដាក់ពាក្យសុំពន្យារពេលចូលបំភ្លឺជាបន្តបន្ទាប់។
អ្នកស្រី ដេត ហួរ ដែលអះអាងថាជាតំណាងពលរដ្ឋ និងកំពុងរងបណ្តឹងដែរនោះ ប្រាប់វីអូឌីនៅថ្ងៃព្រហស្បតិ៍នេះថា កាលពីថ្ងៃទី១៥ ខែតុលា ពួកគាត់ទាំង១០នាក់ បានដាក់ពាក្យសុំពន្យារពេលចូលបំភ្លឺរហូតទៅដល់ខែវិច្ឆិកា ដោយសារមេធាវីការពារក្តីជាប់រវល់។
តំណាងពលរដ្ឋរូបនេះលើកឡើងថា ករណីតុលាការកោះហៅពួកគាត់ឱ្យចូលបំភ្លឺ ជារឿងអយុត្តិធម៌បំផុត ដោយសារពួកគាត់ត្រូវបានឧកញ៉ារំលោភយកដីធ្លីហើយ ថែមទាំងត្រូវបានគេប្តឹងទៅតុលាការថែមទៀត។
អ្នកស្រី ដេត ហួរ ប្រាប់ថា៖ «ឱ្យតែមានប្រជាពលរដ្ឋឡើងទៅតវ៉ាដីធ្លី គឺគេដាក់ពាក្យចោទប្រកាន់គាត់ថា គាត់ជាអ្នកញុះញង់បង្កភាពវឹកវរដល់សង្គម។ ចុះចំណែក ហេង ហ៊ុយ ប្លន់ដីប្រជាពលរដ្ឋទាំងរស់ទាំងភូមិហ្នឹង អត់បង្កភាពវឹកវរដល់សង្គមទេឬយ៉ាងម៉េច។ លោក ហេង ហ៊ុយ គឺជាចោរពិតប្រាកដ បានប្លន់ដីពលរដ្ឋ មិនគួរចោទប្រកាន់ពលរដ្ឋទេ។ បើដោះស្រាយសំណងជូនពួកគាត់រួចស្រេច គឺពួកគាត់មិនឡើងមកតវ៉ាទេ»។
តំណាងពលរដ្ឋម្នាក់ទៀត លោក ឆាន់ ឈឿន ដែលរងបណ្តឹងដែរនោះ និយាយថា ករណីតុលាការកោះហៅតំណាងពលរដ្ឋឱ្យចូលបំភ្លឺនេះ គឺជាការគំរាមកំហែងបំបាក់ស្មារតីពលរដ្ឋមិនឱ្យហ៊ានចេញតវ៉ាទៀត។
តំណាងពលរដ្ឋរូបនេះអំពាវនាវទៅតុលាការឱ្យចាត់ការនិងទម្លាក់ចោលការចោទប្រកាន់លើពួកគាត់ ហើយអាជ្ញាធរពាក់ព័ន្ធត្រូវដោះស្រាយបញ្ចប់វិវាទដីធ្លីជូនពលរដ្ឋ។
លោក ឆាន់ ឈឿន និយាយថា៖ «ខ្ញុំមិនឈប់តវ៉ាទេ ទោះមានការគំរាមកំហែងឬមានការចាប់ខ្លួនយ៉ាងណាក៏ដោយ ពីព្រោះពួកខ្ញុំបានរងគ្រោះនិងបាត់បង់ដីធ្លីពិតប្រាកដមែន ហើយតុលាការចុះស៊ើបអង្កេតដោយផ្ទាល់ផង»។
វីអូឌីមិនអាចសុំការបញ្ជាក់ពីអ្នកនាំពាក្យសាលាដំបូងខេត្តកោះកុង លោក អ៊ិន សុវណ្ណធានី និងលោក ហេង ហ៊ុយ បានទេពាក់ព័ន្ធករណីនេះ។
អភិបាលខេត្តកោះកុង អ្នកស្រី មិថុនា ភូថង ប្រាប់ថា អាជ្ញាធរមិនអាចជួយដោះស្រាយវិវាទដីធ្លីជូនក្រុមពលរដ្ឋ១៩៧គ្រួសារនោះបានទេ។ អ្នកស្រីបញ្ជាក់ថា ដីដែលពលរដ្ឋទាមទារនោះ គឺជាដីមានកម្មសិទ្ធិដែលលោក ហេង ហ៊ុយ ជាម្ចាស់ និងម្យ៉ាងទៀតក្រសួងរៀបចំដែនដី បានចេញលិខិតជាច្រើនដងហើយ បដិសេធមិនដោះស្រាយជូនពលរដ្ឋទាំងនោះ។
អ្នកស្រី មិថុនា ភូថង ប្រាប់ថា៖ «ករណីនេះ ខ្ញុំមិនអាចដោះស្រាយបានទេ ពីព្រោះមានការបដិសេធមិនដោះស្រាយពីក្រសួងរៀបចំដែនដីរួចទៅហើយ ប៉ុន្តែយើងបានព្យាយាមពន្យល់ពលរដ្ឋឱ្យពួកគាត់យល់អំពីការបដិសេធនេះ ហើយអាជ្ញាធរខេត្តយើងនឹងខិតខំពន្យល់បន្ថែមទៀតពាក់ព័ន្ធបញ្ហាផ្លូវច្បាប់»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន យល់ថា ករណីប្តឹងពលរដ្ឋមានជម្លោះដីធ្លីទៅតុលាការនេះ វាគឺជាការគំរាមកំហែងឱ្យប្រជាពលរដ្ឋឈប់តវ៉ា។ លោកបន្តថា ការដែលយកប្រព័ន្ធតុលាការទៅដោះស្រាយជម្លោះដីធ្លីបែបនេះវាមិនអាចដោះស្រាយបាន និងមិនអាចបញ្ឈប់ឱ្យប្រជាពលរដ្ឋឈប់តវ៉ានោះទេ។
លោក ហ៊ួរ អ៊ីន ប្រាប់ថា៖ «អ៊ីចឹងដំណោះស្រាយដែលល្អ គឺអាជ្ញាធរខេត្តនិងក្រសួងដែនដី សូមធ្វើការស៊ើបអង្កេតឱ្យបានច្បាស់លាស់សិន។ តើប្រជាពលរដ្ឋមានដីពិតមែនឬក៏អត់? ហើយបើចោទថា ប្រជាពលរដ្ឋពិតជាបានទទួលសំណងពីក្រុមហ៊ុនហើយ តើសំណងនោះទទួលបានដោយស្ម័គ្រចិត្តទេ? មានការបង្ខិតបង្ខំ មានការគំរាមកំហែងទេ ក្នុងការទទួលយកហ្នឹង? អ៊ីចឹងសូមធ្វើការស្រាវជ្រាវស៊ើបអង្កេតឱ្យបានច្បាស់លាស់សិន មុនធ្វើការបដិសេធឬក៏ធ្វើការច្រានចោលមិនដោះស្រាយជម្លោះដីធ្លីរបស់ពួកគាត់»។
ចាប់តាំងពីពាក់កណ្តាលឆ្នាំ២០១៩មក ពលរដ្ឋ១៩៧គ្រួសារមកពីឃុំជីខលើ និងជីខក្រោម បានឡើងមកតវ៉ានៅភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយចោទថា ក្រុមហ៊ុន ហេង ហ៊ុយ រំលោភយកតាំងពីឆ្នាំ២០០៧។
ប៉ុន្តែត្រូវបានក្រសួងរៀបចំដែនដីបដិសេធមិនដោះស្រាយឱ្យពលរដ្ឋទាំងនោះចំនួន៣ដងហើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នកដែលក្រសួងថា បានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាទៀតផង៕
