លោកនាយករដ្ឋមន្ត្រី ហ៊ុន សែន បានប្រកាសពីគម្រោងបង្កើត «សមាគមការពារសេចក្តីថ្លៃថ្នូរជនពិការ» ដើម្បីការពារជនពិការពីការប្រមាថនានា ដែលធ្វើឱ្យប៉ះទង្គិចអារម្មណ៍និងសេចក្តីថ្លៃថ្នូររបស់ជនពិការ។
ការប្រកាសរបស់លោកនាយករដ្ឋមន្ត្រី បានធ្វើឡើងនៅក្នុងអំឡុងពេលដែលលោកចុះជួបសួរសុខទុក្ខនិងជួយឧបត្ថម្ភដល់ប្រជាពលរដ្ឋដែលរងគ្រោះដោយជំនន់ទឹកភ្លៀងនៅខេត្តបន្ទាយមានជ័យ នៅព្រឹកថ្ងៃពុធនេះ។
លោកនាយករដ្ឋមន្ត្រី ហ៊ុន សែន បានថ្លែងថា កន្លងមក មានការប្រមាថមួយចំនួនទៅលើជនពិការ រួមទាំងរូបលោកផងដែរ ដែលករណីនេះ លោកមិនអាចអត់ឱនបានទេ។ លោកបានអំពាវនាវឱ្យមានការយោគយល់និងយកចិត្តទុកដាក់បន្ថែមលើជនពិការ និងចៀសវាងការប្រមាថទៅលើជនពិការ។
លោកមានប្រសាសន៍ថា៖ «ខ្ញុំសូមអំពាវនាវ សូមមេត្តាយោគយល់ចំពោះជនពិការ បើទោះបីមិនបានផ្តល់អ្វីឱ្យជនពិការទេ សូមមេត្តាកុំប្រមាថជនពិការ ដូចជាការហៅគ្នា អាកំបាក់ អាកំបុត»។
លោកក៏បានបញ្ជាក់ដែរថា លោកក៏មានបំណងចង់បង្កើតសមាគមមួយដើម្បីការពារជនពិការពីការប្រមាថផងដែរ។
លោកបានថ្លែងថា៖ «ខ្ញុំក៏ចង់បង្កើតសមាគមការពារសេចក្តីថ្លៃថ្នូរសម្រាប់ជនពិការ ដើម្បីចៀសវាងការប្រមាថ [លើជនពិការ] នេះជារឿងមិនធម្មតាមួយសម្រាប់អារម្មណ៍ជនពិការ វាប៉ះទង្គិចអារម្មណ៍ [របស់ពួកគាត់] ដោយការប្រមាថពីអ្នកដទៃ»៕