ស្ថានទូតស៊ុយអែតប្រចាំនៅកម្ពុជា បានប្រកាសចាប់ផ្តើមអនុវត្តនូវកម្មវិធីសាច់ប្រាក់ពលកម្មក្នុងប្រទេសកម្ពុជា តាមរយៈសកម្មភាពដាំដើមឈើ ដើម្បីឆ្លើយតបនឹងវិបត្តិកូវីដ១៩។
សេចក្តីប្រកាសព័ត៌មានរបស់ស្ថានទូតស៊ុយអែតប្រចាំនៅកម្ពុជា និងអង្គការ UNDP នៅថ្ងៃទី១៩ ខែតុលា ឆ្នាំ២០២០ បានលើកឡើងថា កម្មវិធីនេះមានគោលបំណងជំរុញឱ្យមានការចូលរួមពីប្រជាពលរដ្ឋដែលរស់នៅជនបទចំនួន១ ៦០០គ្រួសារ នៅខេត្តពោធិ៍សាត់ និងសៀមរាប ដាំដើមឈើនៅក្នុងមូលដ្ឋានរបស់ខ្លួននិងបង្កើតស្ថានីយបណ្តុះកូនឈើ ព្រមទាំងចូលរួមក្នុងសកម្មភាពអភិរក្សដទៃទៀតទូទាំងប្រទេស។
សេចក្តីប្រកាសព័ត៌មាន បន្តថា កម្មវិធីនេះនឹងត្រូវអនុវត្តក្រោមការដឹកនាំរបស់ក្រសួងបរិស្ថាន ដោយមានការគាំទ្រផ្នែកបច្ចេកទេសពី UNDP តាមរយៈគម្រោងកសាងបរិយាកាសអំណោយផលសម្រាប់ការអភិវឌ្ឍប្រកបដោយចីរភាព (BESD)។
ឯកអគ្គរាជទូតស៊ុយអែតប្រចាំព្រះរាជាណាចក្រកម្ពុជា លោក ប៊្យន ហេកម៉ាក បានលើកឡើងក្នុងសេចក្តីប្រកាសព័ត៌មាននោះថា ការគាំទ្ររបស់ប្រទេសស៊ុយអែត នូវកញ្ចប់ថវិកាសង្គ្រោះបន្ទាន់ក្នុងទំហំទឹកប្រាក់៤ ៣០០ ០០០ SEK ឬស្មើប្រមាណកន្លះលានដុល្លារអាមេរិកនេះ នឹងចូលរួមដោះស្រាយបញ្ហាផលវិបាកដែលបង្កឡើងដោយជំងឺកូវីដ១៩នៅកម្ពុជា។
លោកបន្តថា៖ «កញ្ចប់ថវិកានេះ នឹងផ្តល់ឱ្យសហគមន៍ដែលងាយរងគ្រោះ នូវឱកាសរកប្រាក់ចំណូលបានភ្លាមៗ តាមរយៈការដាំដើមឈើ ដើម្បីជួយឱ្យពួកគេអាចទប់ទល់ជាមួយនឹងវិបត្តិសេដ្ឋកិច្ចដែលកំពុងកើតមាន ហើយសកម្មភាពនេះក៏នឹងរួមចំណែកដល់ការស្តារប្រព័ន្ធអេកូឡូស៊ីដ៏មានសារៈសំខាន់ផងដែរ»។
លោកបានបន្ថែមថា កម្មវិធីនេះនឹងបន្តអនុវត្តរហូតដល់ខែមិថុនា ឆ្នាំ២០២១ ដែលនឹងផ្ដល់ឱកាសការងារភ្លាមៗដល់សហគមន៍ដែលមានតម្រូវការចាំបាច់ជាងគេ តាមរយៈសកម្មភាពដាំដើមឈើនិងបណ្តុះកូនឈើនៅរដូវប្រាំង។
រដ្ឋលេខាធិការក្រសួងបរិស្ថាន លោក ទិន ពន្លក មានប្រសាសន៍ថា កម្មវិធីសាច់ប្រាក់ពលកម្មនេះ ជាការអន្តរាគមន៍ជួយដល់ប្រជាពលរដ្ឋដែលរងផលប៉ះពាល់ដោយសារជំងឺកូវីដ១៩ បានទាន់ពេលវេលានិងស្ដារនូវប្រព័ន្ធអេកូឡូស៊ីសំខាន់ៗដែលកំពុងទទួលរងសម្ពាធ។
លោកថា៖ «ការងារនេះនឹងជួយបង្កើនគម្របព្រៃក្នុងតំបន់គោលដៅដែលជាប្រភពស្រូបយកកាបូន រួមចំណែកដល់ការបន្តប្រយុទ្ធប្រឆាំងទៅនឹងការប្រែប្រួលអាកាសធាតុរបស់យើង»។
ចំណែកតំណាងនិវាសនដ្ឋាននៃ UNDP ប្រចាំនៅកម្ពុជា លោក នីក បេរ៉េសហ្វត (Nick Beresford) បានថ្លែងថា ប្រទេសស៊ុយអែត និង UNDP ប្ដេជ្ញារួមគ្នាផ្តល់ការគាំទ្រដល់កម្ពុជា អំឡុងពេលមានការរាតត្បាតជាសកលនេះ។
លោកថា៖ «កម្មវិធីដាំដើមឈើនេះជួយផ្ដល់ជាសាច់ប្រាក់ជាថ្នូរនឹងកម្លាំងពលកម្ម នៅពេលដែលគេត្រូវការសាច់ប្រាក់ជាងគេបំផុត ហើយតាមរយៈការវិនិយោគលើគម្របព្រៃឈើ យើងអាចរួមចំណែកដល់ការកសាងអនាគតកាន់តែបៃតងនិងកាន់តែស្អាតសម្រាប់គ្រប់គ្នា»។
បើតាមសេចក្តីប្រកាសព័ត៌មានរបស់ស្ថានទូតស៊ុយអែត និង UNDP ព្រៃឈើនិងជីវចម្រុះនៅកម្ពុជា នៅបន្តរងសម្ពាធក្នុងកម្រិតខ្ពស់ ហើយវាកំពុងមានការកើនឡើងដោយសារតែការរាតត្បាតជាសកលនៃជំងឺកូវីដ-១៩។
សេចក្តីប្រកាសព័ត៌មានបន្តទៀតថា មនុស្សរាប់ម៉ឺននាក់នៅកម្ពុជា បានបាត់បង់ការងារធ្វើ ហើយពលករចំណាកស្រុកជាង១០ម៉ឺននាក់ បានវិលត្រឡប់ពីប្រទេសជិតខាងទៅកាន់ស្រុកកំណើតនៅតំបន់ជនបទវិញ ដែលធ្វើឱ្យការស្វែងរកប្រាក់ចំណូលនិងស្បៀងអាហារកាន់តែលំបាកទៅៗសម្រាប់ប្រជាជនមួយចំនួន។
សេចក្តីប្រកាសព័ត៌មានបន្ថែមថា ដើម្បីជីវភាពរស់នៅ ជាពិសេសក្នុងអំឡុងពេលនៃជំងឺរាតត្បាតនេះ ប្រជាជនកាន់តែច្រើនចាប់ផ្ដើមចូលព្រៃ ដើម្បីកាប់ឈើ បរបាញ់សត្វព្រៃ និងនេសាទជាដើម ដែលជាការដាក់សម្ពាធបន្ថែមទៀតទៅលើប្រព័ន្ធអេកូឡូស៊ីដែលកំពុងមានភាពផុយស្រួយរួចទៅហើយនោះ៕