បុរសម្នាក់ដែលជាអតីតក្រុមប្រឹក្សាខណ្ឌមានជ័យ រាជធានីភ្នំពេញ មកពីអតីតគណបក្សសង្រ្គោះជាតិ ត្រូវបានធ្វើការវះកាត់យកឈាមកកក្នុងក្បាល បន្ទាប់ពីជនមិនស្គាល់អត្តសញ្ញាណបានជិះម៉ូតូមកក្បែរហើយបានប្រើដុំឥដ្ឋវាយលើគាត់។
អតីតក្រុមប្រឹក្សាខណ្ឌមានជ័យមកពីគណបក្សសង្រ្គោះជាតិ លោក ឌិន វ៉ារិន ត្រូវជនមិនស្គាល់មុខយកដុំឥដ្ឋវាយចំក្បាល បណ្ដាលឱ្យរងរបួសធ្ងន់ធ្ងរ កាលពីព្រឹកម៉ោង១០ ថ្ងៃទី១៩ ខែតុលា នៅក្នុងផ្សារចាក់អង្រែ។
ភរិយារបស់លោក ឌិន វ៉ារិន គឺអ្នកស្រី ចាន់ សុភក្តិ ថ្លែងប្រាប់វីអូឌីថា ប្ដីរបស់គាត់កំពុងសម្រាកព្យាបាលក្នុងមន្ទីរពេទ្យមួយនារាជធានីភ្នំពេញ បន្ទាប់ពីគ្រូពេទ្យបានវះកាត់យកឈាមកកចេញពីក្បាលរួចមកនោះ។
អ្នកស្រី ចាន់ សុភក្តិ បានប្រាប់ថា៖ «វះយប់មិញ [ថ្ងៃទី១៩ ខែតុលា] ពេទ្យគេថតឱ្យយើងមើលបើអត់វះទេ ឈាមនឹងចេញច្រើនទៅៗ ពេទ្យថា វះទៅ យកឈាមហ្នឹងចេញ។ ហើយឆ្អឹង ចិញ្ចឹមហ្នឹងបាក់ខុបចូល ចិញ្ចើមបាក់ទៀត ត្រូវរបួសមួយចំហៀងមុខ ជាំភ្នែកទាំងពីរ ពីលើភ្នែកតែម្ដង ភ្នែកគាត់បើកអត់រួចទេ»។
អ្នកស្រី ចាន់ សុភក្តិ បានរំឭកពីព្រឹត្តិការណ៍វាយប្រហារលើស្វាមីរបស់ខ្លួនថា៖ «ដុំឥដ្ឋ! ដុំឥដ្ឋប្រហោងបួនជ្រុង ហើយមាន ហើយវាមានបន្តក់ស៊ីម៉ង់សម្រាប់វាយឱ្យធ្លុះហ្មង មកវាយប្ដីខ្ញុំ ប្ដីខ្ញុំដើរស្ដាំ វាជិះឆ្វេង វាយមួយទំហឹងហ្នឹងណា។»
ស្ត្រីអ្នកលក់សាច់ជ្រូកម្នាក់ រៀបរាប់ហេតុការណ៍ប្រាប់វីអូឌីថា លោក ឌិន វ៉ារិន បានដួលនៅម្ខាងផ្លូវចំមុខតូបលក់របស់អ្នកស្រីកាលពីព្រឹកថ្ងៃចន្ទ ដោយមានឈាមហូរតាមច្រមុះ។ អ្នកស្រីបានឃើញមានម៉ូតូមួយបើកកាត់។ មុនដំបូង អ្នកស្រីគិតថា គេបើកកៀរលោក វ៉ារិន ប៉ុន្តែក្រោយមកអ្នកស្រីឃើញមានដុំថ្មមួយដុំនៅក្បែកន្លែងដែលគាត់ដួល។
អ្នកស្រីបាននិយាយថា វ៉ារិន ខំប្រឹងក្រោកឡើង ប៉ុន្តែខ្លួនគាត់មានសភាពញ័រ ហើយដួលទៅវិញ។ អ្នកលក់សាច់ជ្រូកដែលបានបដិសេធមិនប្រាប់ឈ្មោះ ដោយសារជាអ្នកលក់ដូរនៅទីផ្សារនេះ បាននិយាយថា ប្តីរបស់អ្នកស្រីស្ទុះទៅលោតកន្លងលើលោក វ៉ារិន ពីរបីដង ជាជំនឿដែលមនុស្សមួយចំនួនធ្វើ ដើម្បីឱ្យអ្នកសន្លប់ដឹងខ្លួនឡើងវិញនិងបណ្តេញគ្រោះចង្រៃ ស្របពេលក្រុមមនុស្សចាប់ផ្តើមមកចោមរោមមើល។
អាជីវកររូបនេះបាននិយាយថា អ្នកស្រីគ្រាន់តែដឹងថា លោក វ៉ារិន គឺជាអ្នកលក់បន្លែនៅកាច់ជ្រុងផ្សារ ហើយអាជីវករខ្លះស្រែកហៅប្រពន្ធរបស់លោក វ៉ារិន ដែលកំពុងលក់បន្លែនៅស្តង់របស់គាត់។
អ្នកស្រីនិយាយថា៖ «ខ្ញុំប្រាប់ថា គាត់មិនបាច់ស្រែកឱ្យជួយទេ យកគាត់ទៅពេទ្យភ្លាមៗទៅ ពីព្រោះគ្មាននរណាអាចជួយគាត់បានទេ»។
អ្នកស្រីរៀបរាប់ថា មានឈាមហូរច្រើនណាស់នៅពេលនោះ។
ឌី ឡាប៉ុច អាយុ៣៧ឆ្នាំ ជាអ្នកលក់អង្ករនៅស្តង់ក្បែរអ្នកលក់សាច់ជ្រូកនោះ បាននិយាយថា អ្នកស្រីបានឃើញលោក វ៉ារិន ដួល ប៉ុន្តែមិនដឹងថា គាត់មានឈាមហូរតាមច្រមុះនិងត្រចៀកទេ។
អ្នកស្រីបាននិយាយថា៖ «ខ្ញុំអត់ហ៊ានមើលទេ ក្រោយពីខ្ញុំឃើញមានឈាមហូរ»។
អាជីវករទាំងនោះអះអាងថា នគរបាលបានមកសុំឆែកមើលកាមេរ៉ាសុវត្ថិភាពនៅហាងអ៊ុតសក់ទល់មុខស្តង់របស់ពួកគាត់ ប៉ុន្តែក្រុមមន្ត្រីដែលខ្លះស្លៀកពាក់ស៊ីវិលនិងខ្លះមានឯកសណ្ឋាននោះមិនបានសួរនាំពួកគាត់ទេ។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា មានប្រសាសន៍ថា នគរបាលមូលដ្ឋានកំពុងធ្វើការលើរឿងនេះ និងថា ពួកគេកំពុងតាមដានស្រាវជ្រាវចំពោះករណីនេះដើម្បីវែកមុខរកអ្នកប្រព្រឹត្ត។
លោក សាន សុខសីហា មានប្រសាសន៍៖ «សមត្ថកិច្ចកំពុងធ្វើការលើរឿងហ្នឹង តាំងពីពេលកើតហេតុ តាំងពីយើងទទួលបានព័ត៌មានភ្លាម។ សមត្ថកិច្ចចុះដល់ទីតាំងកើតហេតុ តាមជំនាញស្រាវជ្រាវរឿងហ្នឹង ប៉ូលិសបានទទួលការផ្ដល់ចម្លើយពីប្រពន្ធគាត់ មិនទាន់ទទួលបានចម្លើយពីជនរងគ្រោះទេ។»
នាយករងអង្គការលីកាដូ លោក អំ សំអាត ស្នើឱ្យអាជ្ញាធរចាត់វិធានការស៊ើបអង្កេតករណីហិង្សាជាបន្ទាន់ពិសេស ត្រូវស្វែងរកចាប់ខ្លួនជនសង្ស័យមកផ្តន្ទាទោសតាមច្បាប់។
លោក អំ សំអាត បានលើកឡើងថា៖ «យើងអំពាវនាវឱ្យអាជ្ញាធរចាត់វិធានការផ្លូវច្បាប់ ដើម្បីរកជនដៃដល់មកផ្តន្ទាទោសតាមច្បាប់ ទី១ គឺផ្ដល់យុត្តិធម៌ជូនជនរងគ្រោះ ទី២ គឺបំបាត់វប្បធម៌និទណ្ឌភាព ទី៣ គឺបំបាត់មន្ទិលដែលគេរិះគន់ថាជារឿងនយោបាយ»។
ទោះយ៉ាងណាក៏ដោយ អ្នកស្រី ចាន់ សុភក្តិ ចាត់ទុកថា អំពើហិង្សាលើប្ដីរបស់អ្នកស្រីមិនមែនជាករណីគំនុំគំកួនឡើយ ដោយសារតែគ្រួសារគាត់មិនដែលមានទំនាស់ពីមុនមកជាមួយអ្នកណានោះទេ។
អ្នកស្រី ចាន់ សុភក្តិ បាននិយាយថា៖ «គ្រួសារខ្ញុំតាំងពីចេញពីអាពតមកដល់ឥលូវ មិនដែលឈ្លោះជាមួយអ្នកណាទេ! ខ្ញុំកំពុងភ័យបារម្ភពីសុវត្ថិភាពកូនៗផង ព្រោះគិតថា គេអាចជីកស្មៅជីកទាំងឫសផង។»
បើតាមលោក អំ សំអាត ចាប់ពីឆ្នាំ២០១៨ រហូតមកដល់ថ្ងៃទី២០ ខែតុលានេះ សកម្មជននិងមន្ត្រីមូលដ្ឋានគណបក្សសង្គ្រោះជាតិជាង១០នាក់រួចហើយដែលត្រូវជនមិនស្គាល់អត្តសញ្ញាណ ប្រើប្រាស់ហិង្សាវាយបណ្ដាលឱ្យរងរបួស។
មន្ត្រីជាន់ខ្ពស់គណបក្សប្រឆាំង ធ្លាប់បានចាត់ទុកថា អំពើហិង្សាមកលើសមាជិកគណបក្សសង្គ្រោះជាតិ ជាករណីហិង្សាផ្នែកនយោបាយ ប៉ុន្តែមន្ត្រីរដ្ឋាភិបាលច្រានចោលការចោទប្រកាន់នេះ។ ទោះជាយ៉ាងណាក្ដី គ្មានជនណាម្នាក់ត្រូវបានចាប់ខ្លួនឡើយក្នុងសំណុំរឿងមន្ត្រីបក្សប្រឆាំងរងនូវអំពើហិង្សានេះ៕
