ប្រជាពលរដ្ឋជាង៥០គ្រួសារនៅក្រុងសំរោង ខេត្តឧត្តរមានជ័យ ស្នើអាជ្ញាធរខេត្តជួយដោះស្រាយវិវាទដីធ្លី ក្រោយពីមានប្រជាពលរដ្ឋមួយក្រុមមកពីខេត្តផ្សេង បានដាក់គ្រឿងចក្រឈូសឆាយប៉ះពាល់លើដីរបស់ពួកគាត់ដែលកំពុងអាស្រ័យផល។
កាលពីថ្ងៃទី១៦ ខែតុលា ឆ្នាំ២០២០ អ្នកភូមិ៥៣គ្រួសារនៅភូមិខ្ទុំ សង្កាត់កូនក្រៀល ក្រុងសំរោង បាននាំគ្នាផ្តិតមេដៃដាក់លិខិតមួយទៅសាលាខេត្តឧត្តរមានជ័យ ដើម្បីសុំឱ្យអភិបាលខេត្ត លោក ប៉ែន កុសល ជួយដោះស្រាយបញ្ហាវិវាទដីធ្លីនេះ។
![](https://vodkhmer.news/wp-content/uploads/05-27-740x477.jpg)
ពលរដ្ឋម្នាក់ អ្នកស្រី ព្រេស សរ ប្រាប់វីអូឌីនៅថ្ងៃចន្ទនេះថា អ្នកភូមិ៥៣គ្រួសារ បានកាន់កាប់ដីទំហំ១៧១,៥ហិកតា និងអាស្រ័យផលដោយធ្វើស្រែលើដីកំពុងមានជម្លោះនោះតាំងពីឆ្នាំ១៩៩៨ រហូតមកដល់បច្ចុប្បន្ន។ អ្នកស្រីបន្តថា ដីនោះទើបតែមានទំនាស់កាលពីឆ្នាំ២០១៩ ខណៈដែលពលរដ្ឋមួយក្រុមមកពីខេត្តត្បូងឃ្មុំ បានដាក់គ្រឿងចក្រឈូសឆាយធ្វើឱ្យប៉ះពាល់លើស្រូវរបស់ពួកគាត់។
អ្នកស្រីបន្ថែមថា កាលពីពេលថ្មីៗនេះ ពលរដ្ឋខេត្តត្បូងឃ្មុំទាំងនោះបានដាក់គ្រឿងចក្រឈូសឆាយលើដីអ្នកភូមិម្តងទៀត ប៉ុន្តែត្រូវបានពួកគាត់រារាំង និងបានដាក់លិខិតទៅរដ្ឋបាលខេត្តឱ្យជួយអន្តរាគមន៍ដោះស្រាយ។
អ្នកស្រី ព្រេស សរ បានគូសបញ្ជាក់ថា៖ «ពេលដែលខ្ញុំមិនបាននៅផ្ទះ រវល់ទៅឃ្វាលគោ គេដាក់គ្រឿងចក្រទៅឈូសឆាយស្រូវរបស់ខ្ញុំ ពួកខ្ញុំមិនសុខចិត្តទេ ទោះគេឈូសឆាយលើស្រូវខ្ញុំយ៉ាងណាក៏ដោយ។ ខ្ញុំមានការសោកស្តាយយ៉ាងខ្លាំងណាស់ ចំពោះការមករំលោភយកដីដែលខ្ញុំកាន់កាប់អាស្រ័យផលយូរឆ្នាំហើយនោះ។ ពួកខ្ញុំនឹងតស៊ូតវ៉ាមិនឱ្យដីទៅគេទេ»។
ពលរដ្ឋម្នាក់ទៀត លោក ថាន ញ៉យ និយាយថា គ្រួសារគាត់មានដីសរុប៨ហិកតា បានបែងចែកទៅឱ្យកូន៤នាក់សម្រាប់ធ្វើស្រែ ប៉ុន្តែត្រូវបានអាជ្ញាធរកាត់យកទៅឱ្យពលរដ្ឋខេត្តត្បូងឃ្មុំស្ទើរអស់ទាំងស្រុង។
លោកបានអះអាងថា អ្នកភូមិជាង៥០គ្រួសារនោះ ភាគច្រើនជាពលរដ្ឋក្រីក្រ គ្មានមុខរបរអ្វីផ្សេងក្រៅពីធ្វើស្រែបន្តិចបន្តួចសម្រាប់ចិញ្ចឹមជីវិតនេះទេ។
លោកបន្ថែមថា៖ «គេថា [ភាគីពលរដ្ឋត្បូងឃ្មុំ] ដីឯកឧត្តមឱ្យគេ គេត្រូវតែយក ប៉ុន្តែពួកខ្ញុំឃាត់ មិនឱ្យឈូសឆាយទេ។ ខ្ញុំថា ដីខ្ញុំអាស្រ័យផលយូរណាស់មកហើយ ហេតុអ្វីខ្ញុំមិនមានសិទ្ធិធ្វើ ហេតុអ្វីអ្នកឯងទើបមកម្សិលមិញ មានសិទ្ធិជាងខ្ញុំជាម្ចាស់ដី។ ខ្ញុំអត់ឱ្យចូលឈូសឆាយដាច់ខាត ពួកខ្ញុំចង់ឱ្យអភិបាលខេត្តកាត់ឆ្វៀលចេញដូចប្រសាសន៍សម្តេចនាយករដ្ឋមន្ត្រី និងចេញបណ្ណកម្មសិទ្ធិ»។
វីអូឌីមិនអាចសុំការឆ្លើយតបពីពលរដ្ឋភាគីម្ខាងទៀតដែលជាគូទំនាស់បានទេ នៅថ្ងៃចន្ទនេះ។
អភិបាលខេត្តឧត្តរមានជ័យ លោក ប៉ែន កុសល មានប្រសាសន៍ថា បញ្ហាវិវាទដីធ្លីនេះ លោកកំពុងឱ្យមន្ត្រីស្រាវជ្រាវនិងពិនិត្យមើល ដើម្បីឈានទៅរកការដោះស្រាយ។
លោកបន្ថែមថា៖ «នេះជារឿងចាស់ទេ ខ្ញុំបានឱ្យអភិបាលរងខ្ញុំម្នាក់ពិនិត្យមើលហើយ ពីព្រោះយើងត្រូវគិតគូរទាំងអស់គ្នា មិនមែនគិតថាប្រជាជននេះប្រជាជននោះទេ»។
មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្តរមានជ័យ លោក ស្រី ណារ៉េន មានប្រសាសន៍ថា វិវាទដីធ្លីនេះកើតឡើងដោយសារអាជ្ញាធរមូលដ្ឋានកំណត់ដីសម្រាប់ធ្វើសម្បទានសង្គមកិច្ចទៅឱ្យពលរដ្ឋមួយក្រុមទៀត ដោយមិនបានពិនិត្យមើលនិងសិក្សាច្បាស់លាស់ពីផលប៉ះពាល់លើដីពលរដ្ឋក្នុងស្រុក។
មន្រ្តីការពារសិទ្ធិមនុស្សរូបនេះ ផ្តល់ជាអនុសាសន៍ថា អាជ្ញាធរពាក់ព័ន្ធគួរកាត់ឆ្វៀលនិងបញ្ចៀសដីគម្រោងសម្បទានសង្គមកិច្ចឱ្យផុតពីដីអាស្រ័យផលរបស់ប្រជាពលរដ្ឋក្នុងស្រុក ខណៈតំបន់នោះនៅសល់ដីទំនេររាប់ពាន់ហិកតាទៀត ក្រោយពីក្រុមហ៊ុនសម្បទានសេដ្ឋកិច្ចមួយបានដកចេញ។
លោកបន្ថែមថា៖ «បើសិនជាយើងរុញ [គម្រោងដីសម្បទានសង្គមកិច្ច] ឱ្យផុតប្រហែលជា៣០០ម៉ែត្រទៅ វាផុតរឿងប៉ះពាល់ដីរវាងពលរដ្ឋត្បូងឃ្មុំ និងពលរដ្ឋចាស់ហើយ។ តែយើងមិនដឹងថា ហេតុអ្វីបានជាអាជ្ញាធរមូលដ្ឋានគាត់ចេះតែដាក់ជាន់គ្នាអញ្ចឹង ព្រោះដីទំនេរនៅតំបន់នោះច្រើនណាស់ ជាង៦ពាន់ហិកតាទៀតណោះ។ ហើយពេលដាក់អញ្ចឹង ធ្វើឱ្យទំនាស់កើតឡើង។ ខាងក្រសួងក៏គាត់មិនបានដឹងដែរ ព្រោះគាត់យោងទៅលើអាជ្ញាធរមូលដ្ឋាន។ អញ្ចឹងបញ្ហាទំនាស់ដីធ្លីរ៉ាំរ៉ៃដោះមិនចេញ ដោយសារអាជ្ញាធរមូលដ្ឋានដែរ»។
កាលពីថ្ងៃទី១៣ ខែសីហា ឆ្នាំ២០២០ រដ្ឋមន្ត្រីក្រសួងមហាផ្ទៃ លោក ស ខេង បានក្រើនរំឭកដល់មន្ត្រីមុខងារសាធារណៈទាំងស៊ីវិលនិងនគរបាល ត្រូវអត់ធ្មត់ក្នុងការដោះស្រាយបញ្ហានានាជាមួយប្រជាពលរដ្ឋ ជាពិសេសវិវាទរឿងធ្លី ដោយចៀសវាងការប្រើហិង្សាលើពលរដ្ឋ និងមិនត្រូវយកកាំភ្លើងទៅបាញ់ទៅលើពលរដ្ឋតវ៉ា៕