លោក កឹម សុខា អះអាងថា ប្រជាពលរដ្ឋដែលរងគ្រោះដោយសារទឹកជំនន់នៅក្នុងខណ្ឌដង្កោរាជធានីភ្នំពេញ កំពុងតែខ្វះជម្រក ស្បៀងអាហារ ហើយអ្នកខ្លះមានជំងឺជាប់ខ្លួនមិនមានពេទ្យទៅព្យាបាលនោះទេ។
លោក កឹម សុខា សរសេរសារនៅលើហ្វេសប៊ុករបស់លោក កាលពីម្សិលមិញថា លោកបានទៅជួបផ្ទាល់ពលរដ្ឋនៅក្នុងខណ្ឌដង្កោរងគ្រោះដោយទឹកជំនន់ កំពុងជួបការខ្វះខាតលើសពីស្បៀងនិងជម្រក។
លោក កឹម សុខា៖ « ប្រជាពលរដ្ឋដែលរងគ្រោះ មិនមែនខ្វះតែស្បៀង និងជម្រកទេ គឺពួកគាត់ខ្វះអនាម័យ ជាពិសេសមានជំងឺជាប់ខ្លួនខ្លះទៀត រួមទាំងកូនក្មេងផង។ សួរទៅថា ពេទ្យក៏មិនបានទៅមើលដែរ នេះនៅក្បែរភ្នំពេញផង»។
លោក កឹម សុខា ក៏បានបញ្ជាក់នៅក្នុងសារនោះដែរថា ករណីដែលខ្វះខាតនោះមិនមែនទាំងអស់គ្នាទេ ហើយលោកក៏មិនមានបន្ទោសអ្នកណាម្នាក់ដែរក្នុងករណីនេះគឺគ្រាន់តែជាការជូនដំណឹង៕