គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា ស្ថានភាពជំនន់ទឹកភ្លៀងស្ថិតក្នុងស្ថានភាពអាសន្ននៅឡើយ ខណៈជំនន់ទឹកភ្លៀងនៅខេត្តចំនួន២បានស្រកចុះបន្តិចហើយ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា មានប្រសាសន៍នៅរសៀលថ្ងៃសុក្រនេះថា ជំនន់ទឹកភ្លៀងបានបង្កផលប៉ះពាល់ដល់រាជធានី-ខេត្តចំនួន១៩ ក្នុងនោះ រាជធានី-ខេត្តចំនួន៥ ដែលរងផលប៉ះពាល់ខ្លាំងជាងគេ រួមមាន ខេត្តពោធិ៍សាត់ បាត់ដំបង ប៉ៃលិន កំពង់ស្ពឺ និងរាជធានីភ្នំពេញ។ តែយ៉ាងណា លោកថា ស្ថានភាពជំនន់ទឹកភ្លៀងនៅខេត្តពោធិ៍សាត់ និងខេត្តបាត់ដំបង បានស្រកចុះខ្លះហើយ។
លោកគូសបញ្ជាក់ថា៖ «ជារួម បានស្រកខ្លះហើយ ប៉ុន្តែយើងនៅតែប្រុងប្រយ័ត្នមើលព្យុះដែលវាបង្កឱ្យមានភ្លៀងធ្លាក់មកបន្ថែមទៀត យើងនៅតាមដានអាហ្នឹងមួយទៀត។ ទោះបីវាមានការស្រកតិចតួចក៏ដោយ តែវាមិនទាន់អស់ហានិភ័យទេ វាស្ថិតនៅភាពអាសន្ននៅឡើយ»។
របាយការណ៍របស់គណៈកម្មាធិការជាតិ ឱ្យដឹងថា គិតចាប់ពីថ្ងៃទី១ ខែកញ្ញា ដល់ព្រឹកថ្ងៃទី១៦ ខែតុលា ជំនន់ទឹកភ្លៀងបានបង្កផលប៉ះពាល់ដល់ប្រជាពលរដ្ឋកើនដល់ជាង៥ ៣០០គ្រួសារ ស្មើនឹងជាង២១ម៉ឺននាក់ និងផ្ទះជាង៥ម៉ឺនខ្នង ខណៈមនុស្សស្លាប់បានកើនដល់១៨នាក់ និងប៉ះពាល់ដំណាំស្រូវនិងដំណាំរួមផ្សំផ្សេងៗជាច្រើនម៉ឺនហិកតា រួមនឹងហេដ្ឋារចនាសម្ព័ន្ធជាច្រើនទៀត។
នាយករដ្ឋបាលសាលាខេត្តពោធិ៍សាត់ លោក ឃុត ឧសភា បញ្ជាក់ថា ជំនន់ទឹកភ្លៀងក្នុងខេត្តនេះបានស្រកច្រើនហើយ ហើយផ្លូវមួយចំនួនក្នុងខេត្តដែលរងផលប៉ះពាល់ក៏បានបើកឱ្យប្រជាពលរដ្ឋធ្វើចរាចរណ៍វិញដែរ។
មន្ត្រីលេខាធិការដ្ឋានគ្រោះមហន្តរាយនៅខេត្តបន្ទាយមានជ័យ លោក ឈុន ប៊ុនថា ប្រាប់វីអូឌីថា ស្ថានភាពជំនន់ទឹកភ្លៀងនៅមិនទាន់មានការស្រកចុះនៅឡើយ ហើយអាជ្ញាធរក៏នៅតែបន្តជួយសង្គ្រោះនិងជម្លៀសពលរដ្ឋចេញពីភូមិ ដើម្បីទៅរកទីទួលសុវត្ថិភាព។
មន្ត្រីរូបនេះបន្តថា គិតមកដល់ថ្ងៃនេះ អាជ្ញាធរបានជម្លៀសពលរដ្ឋជាង១៨០០គ្រួសារទៅកាន់ទីទួលសុវត្ថិភាព ចំណែកផលប៉ះពាល់ស្រូវចំនួន១៥ ០០០ហិកតា រួមនឹងដំណាំផ្សេងៗជិត៦០០ហិកតា។ ចំណែកពលរដ្ឋដែលស្លាប់ដោយសារលង់ទឹក បានកើនរហូតដល់១០នាក់។
លោកបន្ថែមថា៖ «យើងបានជម្លៀសពួកគាត់ចេញមកទីទួលសុវត្ថិភាពហើយ ឥលូវឯកឧត្តមអភិបាលលោកកំពុងយកអំណោយទៅចែកជូនពួកគាត់»។
ចំពោះស្ថានភាពទឹកជំនន់នៅខេត្តប៉ៃលិនវិញ នាយករដ្ឋបាលខេត្ត លោក អ៊ុន ប៊ុនលី ឱ្យដឹងថា តំបន់ខ្លះបានស្រកចុះនិងតំបន់ខ្លះទឹកបន្តឡើង ប៉ុន្តែមិនឈានដល់មានការជម្លៀសពលរដ្ឋចេញពីភូមិនោះទេ។
លោកបន្តថា ជំនន់ទឹកភ្លៀងបានលិចស្រូវអស់៥០ហិកតា ដំឡូងមី២ ៩៦៧ហិកតា និងដំណាំផ្សេងៗជិត១ ៦០០ហិកតា ខណៈផ្លូវរងការខូចខាតប្រវែង២ ២៦៧៥ម៉ែត្រ។ លោកថា នៅខេត្តប៉ៃលិន មានមនុស្សតែម្នាក់ប៉ុណ្ណោះដែលបានស្លាប់ដោយសារជំនន់ទឹកភ្លៀងនេះ។
លោកបន្ថែមថា៖ «ឥលូវនេះ កន្លែងខ្លះនៅមានការលិចទៀត ប៉ុន្តែវាមិនធ្ងន់ធ្ងរដូចមុនទេ ដោយសារពីល្ងាចភ្លៀងទៀត បានបង្កឱ្យលិចផ្ទះមួយចំនួនដែលធ្លាប់លិចកន្លងមក»។
ចំណែកអភិបាលរាជធានីភ្នំពេញ លោក ឃួង ស្រេង មានប្រសាសន៍ពេលចុះជួយប្រជាពលរដ្ឋនៅខណ្ឌដង្កោ នៅថ្ងៃនេះថា រហូតមកដល់ពេលនេះ ប្រជាពលរដ្ឋជាង៥ពាន់គ្រួសារ ត្រូវបានជម្លៀសទៅទីទួលសុវត្ថិភាព និងស្ថិតក្រោមការមើលថែយ៉ាងយកចិត្តទុកដាក់ពីអាជ្ញាធរនិងសមត្ថកិច្ចពាក់ព័ន្ធ។
កាលពីថ្ងៃម្សិលមិញ ក្រសួងធនធានទឹក និងឧតុនិយម បានឱ្យដឹងពីស្ថានភាពអាកាសធាតុថា រាជធានី-ខេត្តស្ទើរទូទាំងប្រទេស នឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១៧ ដល់ថ្ងៃទី១៩ ខែតុលានេះ ដោយសារកម្ពុជារងប្រព័ន្ធសម្ពាធទាបនិងឥទ្ធិពលនៃព្យុះទី១៧ ឈ្មោះ សូឌែល (Saudel)។
ក្រសួងបញ្ជាក់ថា ឥទ្ធិពលព្យុះទី១៧ និងប្រព័ន្ធសម្ពាធទាប បាននិងកំពុងបន្តអូសបន្លាយលើប្រទេសកម្ពុជា ដែលស្ថានភាពនេះនឹងធ្វើឱ្យមានភ្លៀងធ្លាក់ច្រើនជាប់ជាបន្ត នៅតំបន់វាលទំនាប ក្នុងនោះមានរាជធានីភ្នំពេញ ខេត្តសៀមរាប បន្ទាយមានជ័យ បាត់ដំបង ពោធិ៍សាត់ កំពង់ធំ កំពង់ឆ្នាំង កំពង់ស្ពឺ និងកណ្តាល។
ចំពោះបណ្តាខេត្តនៅតំបន់ជួរភ្នំដងរែក ខ្ពង់រាបឦសាន ខេត្តជាប់ព្រំដែនប្រទេសវៀតណាម និងខេត្តនៅតំបន់មាត់សមុទ្រ ក្រសួងថា នឹងមានភ្លៀងធ្លាក់ពីបង្គួរទៅច្រើននិងរលកសមុទ្រខ្ពស់ៗ៕