មនុស្ស៣នាក់ក្នុងចំណោម៥នាក់ ត្រូវបានសមត្ថកិច្ចខេត្តត្បូងឃ្មុំឃាត់ខ្លួនសួរនាំកាលពីថ្ងៃសៅរ៍សប្ដាហ៍មុន បន្ទាប់ពីពួកគេពាក់អាវដែលមានបោះពុម្ពសារ«អរគុណសន្តិភាព តែត្រូវមើលមាត្រា២ក្នុងរដ្ឋធម្មនុញ្ញ»នៅក្នុងហាងលក់កាហ្វេមួយកន្លែង។
លោក ស៊ិន រស្មី អាយុ២៤ឆ្នាំ បានថ្លែងថា កាលពីម៉ោង៨កន្លះព្រឹកថ្ងៃសៅរ៍សប្ដាហ៍មុន អតីតសកម្មជនគណបក្សសង្គ្រោះជាតិ ចំនួនបាន៥នាក់ បានពាក់អាវដែលមាននិយាយថា «អគុណសន្តិភាព តែត្រូវមើលមាត្រា២ក្នុងរដ្ឋធម្មនុញ្ញ» ហើយបានទៅអង្គុយផឹកកាហ្វេនៅក្នុងហាងមួយនៅក្នុងផ្សារមេមត់។
លោកបានបន្តថា មនុស្ស៣នាក់ក្នុងចំណោមមនុស្ស៥នាក់ ត្រូវបានឃាត់ខ្លួនដោយមន្ត្រីនគរបាលស្រុកមេមត់ ហើយបញ្ជូនទៅសាលាឃុំនិងអធិការដ្ឋាននគរបាលស្រុក ដើម្បីសួរនាំតាំងពីម៉ោងប្រមាណ៩រហូតដល់ប្រមាណ៣ល្ងាច ដោយសមត្ថកិច្ចបានសួរនាំថា តើពួកគេបានអាវទាំងអស់នោះមកពីខាងណា។
លោក ស៊ិន រស្មី ប្រាប់ថា៖ «ពេលត្រឡប់មកវិញ មានសមត្ថកិច្ចមកឃាត់សាកសួរពួកខ្ញុំដែលមានគ្នា៣នាក់ ហើយគាត់សុំឱ្យខ្ញុំធ្វើកិច្ចសន្យាដើម្បីឈប់ពាក់អាវហ្នឹង។ ខ្ញុំបានប្រាប់គាត់ថា ខ្ញុំបានទិញគេមកពីភ្នំពេញ។ គាត់បានសាកសួរទាំង៣នាក់ហើយ គាត់ថា ការឆ្លើយខុសគ្នា ហើយយកជាការអត់បាន»។
លោកបានបន្ថែមថា៖ «គាត់សួរហើយគាត់បានបំភ័យពួកខ្ញុំគាត់ថា ពួកខ្ញុំពាក់អាវហ្នឹងខុសច្បាប់ ដោយសារតែខ្ញុំមានបំណងធ្វើឱ្យចលាចលសង្គម ដូច្នេះ គាត់ថា បើពួកខ្ញុំប្រាប់ថា អាវហ្នឹងទិញមកពីកន្លែងណាឬបុគ្គលណាជាអ្នកឱ្យពួកខ្ញុំពាក់ ពួកគាត់នឹងឃុំខ្ញុំរយៈពេល៧ឆ្នាំ»។
អ្នកស្រី ហ៊ីង សំភ័ក្ស អាយុ២៧ឆ្នាំ ដែលស្ថិតក្នុងចំណោមមនុស្ស៣នាក់ដែលសមត្ថកិច្ចឃាត់ខ្លួនដែរនោះ បានឱ្យដឹងថា មន្ត្រីនគរបាលក្នុងឯកសណ្ឋានស៊ីវិល បានចោទអ្នកស្រីថា ពាក់អាវក្នុងបំណងញុះញង់។
អ្នកស្រី ហ៊ីង សំភ័ក្ស៖ «ខ្ញុំមិនបានធ្វើអីខុសផង ខ្ញុំក៏គ្រាន់តែពាក់អាវអង្គុយផឹកកាហ្វេហើយជិះម៉ូតូមកផ្ទះ ហើយប៉ូលិសគាត់ក៏ឃាត់ខ្លួនសួរនាំថា ហេតុអ្វីបានជាពាក់អាវបែបនេះ។ ខ្ញុំអត់ដឹងថា ប៉ូលិសទេ ខ្ញុំស្មានតែអ្នកធម្មតា ដោយសារតែពួកគាត់ពាក់អាវស៊ីវិល»។
អ្នកស្រីបានបន្ថែមថា៖ «គាត់ថា អាវហ្នឹងពាក់ព័ន្ធទៅនឹងមាត្រាទី២ និងត្រូវរឿងព្រំដែន ប្អូនឯងពាក់អាវហ្នឹងមករបៀបញុះញង់ឱ្យប្រជាពលរដ្ឋឈ្លោះគ្នាអ៊ីចឹង។ រាលថ្ងៃរស់នៅបានសុខហើយ ហេតុអ្វីបានជាអ៊ីចឹង បើអូនពាក់តែម្នាក់ឯងក៏អត់អីដែរ ប៉ុន្តែពាក់មានជាក្រុម»។
អ្នកស្រីបានឱ្យដឹងដែរថា មុនពេលដោះលែង អាជ្ញាធរបានថតវីដេអូពួកគេនិងថតស្លាកលេខម៉ូតូរបស់ពួកគេ ដែលអ្នកស្រីចាត់ទុកការធ្វើបែបនេះគឺជាការគំរាមកំហែងដល់ពួកគាត់។
ស្នងការនគរបាលខេត្តត្បូងឃុំ លោក បែន រ័ត្ន បានប្រាប់ថា សមត្ថកិច្ចគ្រាន់តែសាកសួរអំពីប្រភពអាវនោះ និងគោលបំណងនៃការពាក់អាវនោះតែប៉ុណ្ណោះ ហើយបានអនុញ្ញាតឱ្យត្រឡប់ទៅផ្ទះវិញ។
លោក បែន រ័ត្ន ប្រាប់ថា៖ «យើងគ្រាន់តែសួរគាត់ពាក់អាវហ្នឹង ហើយគាត់បានអាវហ្នឹងមកពីណា? ហើយគាត់ពាក់ហ្នឹងមានគោលបំណងអី ហើយគាត់ប្រាប់យើង យើងក៏ឱ្យគាត់ទៅផ្ទះវិញទៅ ដោយយើងមិនបានធ្វើអីទេ ពីព្រោះថា អត់មានច្បាប់ថាហាមហ្នឹងហើយដែលយើងឱ្យគាត់ទៅផ្ទះវិញហើយ យើងគ្រាន់តែសួរព័ត៌មាន។ យើងគ្រាន់តែឆ្ងល់»។
លោក ស៊ិន រស្មី ឱ្យដឹងបន្ថែមថា លោកបានអាវនោះមកពីលោក ស៊ូ យាន ជាអតីតសមាជិកជាប់ឆ្នោតនៃក្រុមប្រឹក្សាខេត្តត្បូងឃ្មុំដែលកំពុងរត់គេចខ្លួនពីការតាមចាប់ខ្លួនដោយសមត្ថកិច្ច។
លោក ស៊ូ យាន បានប្រាប់ថា លោកបានទិញអាវចំនួន៥កាលពីចុងខែកញ្ញានៅភ្នំពេញ នៅពេលដែលបានមកពិនិត្យជំងឺ ហើយលោកបានឱ្យអាវនេះទៅយុវជនទាំង៥ ដោយសារតែលោកឃើញអាវនេះមានអត្ថន័យ។ លោកបានបន្តថា បន្ទាប់ពីអាជ្ញាធរមូលដ្ឋានបាននិងកំពុងតែស្វះស្វែងរកចាប់ខ្លួនរូបលោក ដោយសារតែលោកបានឱ្យអាវទាំងនេះទៅកាន់យុវជនទាំងនោះ។
លោក ស៊ូ យាន ប្រាប់ថា៖ «ខ្លឹមសារនៃអាវនោះមិនមានអ្វីខុសនឹងច្បាប់រដ្ឋទេ គ្រាន់តែសូមឱ្យគោរពមាត្រា២នៃរដ្ឋធម្មនុញ្ញ ហើយសារអរគុណសន្តិភាពក៏មិនមានអីខុសដែរ ដោយសារតែវាមាននៅគ្រប់ស្ថានប័នរដ្ឋទូទាំងប្រទេស»។
លោកបានបន្ថែម៖ «ការហៅយុវជនទៅ ជាការបំបាក់ស្មារតីគាត់។ គាត់មានអារម្មណ៍ភ័យខ្លាច ដោយសារតែពួកគាត់គ្រាន់តែសម្តែងទឹកចិត្តប៉ុណ្ណឹង គាត់ត្រូវបានគេហៅ ដូចជាពួកគាត់ជាចោរ»៕