អនុប្រធាននាយកដ្ឋាននគរបាលការពារព្រំដែនគោកម្នាក់ ត្រូវបានតុលាការសម្រេចឃុំខ្លួនបណ្តោះអាសន្នពាក់ព័ន្ធនឹងការរុករាននិងឈូសឆាយដីព្រៃខុសច្បាប់នៅខេត្តមណ្ឌលគិរី។
ក្នុងដីកាបង្គាប់ឱ្យឃុំខ្លួនបណ្តោះអាសន្ន ចុះថ្ងៃទី២ ខែតុលាការ ចៅក្រមស៊ើបសួរសាលាដំបូងមណ្ឌលគិរី លោក ញាណ សុវណ្ណ បានសម្រេចឃុំខ្លួនបណ្តោះអាសន្នលោក ពៅ សុធារ៉ាន់ អនុប្រធាននាយកដ្ឋាននគរបាលការពារព្រំដែនគោក ដោយចោទពីបទ «កាប់គាស់រុករានដីព្រៃ ឆ្ការដុត និងឈូសឆាយដីព្រៃដើម្បីយកធ្វើជាកម្មសិទ្ធិ» ស្ថិតនៅភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី។
ចៅក្រមស៊ើបសួរ លោក ញាណ សុវណ្ណ បញ្ជាក់ថា មន្ត្រីនគរបាលការពារព្រំដែនគោក លោក ពៅ សុធារ៉ាន់ បានប្រព្រឹត្តបទល្មើសព្រហ្មទណ្ឌដែលមានចែងផ្តន្ទាទោសតាមមាត្រាទី៦២និងមាត្រា៥៦ នៃច្បាប់ស្តីពីតំបន់ការពារធម្មជាតិ។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី២២ ខែកក្កដា បានចេញសេចក្តីសម្រេចស្តីពី «ការបង្កើតក្រុមការងារអន្តរក្រសួង ដើម្បីចុះសិក្សាស្រាវជ្រាវលើករណីការកាប់រានទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរី» ទៅតាមចំណាររបស់លោកនាយករដ្ឋមន្ដ្រី ហ៊ុន សែន ចុះកាលពីថ្ងៃទី៨ ខែកក្កដា ឆ្នាំ២០២០។
លោក ស ខេង បានចាត់តាំងឱ្យលោក អង មង្គល រដ្ឋលេខាធិការក្រសួងមហាផ្ទៃ ធ្វើជាប្រធានក្រុមការងារអន្តរក្រសួង ដើម្បីចុះសិក្សាស្រាវជ្រាវលើករណីការកាប់រាន ទន្ទ្រាន កាន់កាប់ដីព្រៃខុសច្បាប់ក្នុងខេត្តមណ្ឌលគិរី។
ក្រោយមក ថ្ងៃទី៣០ ខែសីហា លោក ស ខេង បានដាក់លិខិតមួយទៀតទៅលោក ហ៊ុន សែន ដើម្បីពិនិត្យនិងសម្រេចលើលទ្ធផលរបស់ក្រុមការងារអន្តរក្រសួង ចំពោះការចុះសិក្សាស្រាវជ្រាវករណីកាប់រានទន្ទ្រានកាន់កាប់ដីព្រៃខុសច្បាប់ក្នុងតំបន់ការពារធម្មជាតិក្នុងខេត្តមណ្ឌលគិរីនោះ។
លិខិតដដែលនេះ លោក ស ខេង បានស្នើសុំឱ្យមានការជួយសម្រួលភារកិច្ចដល់អភិបាលខេត្ដមណ្ឌលគិរី និងបញ្ចប់មុខតំណែងមន្ដ្រីចំនួន៩រូបទៀតដែលរកឃើញថា មានកំហុសនិងជាប់ពាក់ព័ន្ធនឹងការរុករានរួមទាំងឈូសឆាយដីព្រៃខុសច្បាប់។
បើតាមលិខិត អភិបាលខេត្តមណ្ឌលគិរី លោក ស្វាយ សំអ៊ាង ត្រូវបានស្នើឱ្យថ្នាក់លើអប់រំណែនាំនិងខិតខំអនុវត្តតួនាទីឱ្យបានល្អប្រសើរឡើងវិញ ។
អតីតអភិបាលស្រុកកោះញែក ខេត្តមណ្ឌលគិរី លោក ស៊ិន វណ្ណវុឌ្ឍ ត្រូវបានបញ្ចប់មុខតំណែងនិងឱ្យមកបម្រើការងារនៅក្រសួងមហាផ្ទៃវិញ ខណៈមន្ត្រីពាក់ព័ន្ធផ្សេងទៀតត្រូវបានបញ្ចប់មុខតំណែងនិងដាក់ពិន័យរដ្ឋបាល៕