តំណាងអង្គការសហប្រជាជាតិ បានប្រកាសថា ការបង្ក្រាបខាងនយោបាយនិងករណីចោទប្រកាន់មេដឹកនាំបក្សប្រឆាំង លោក កឹម សុខា ពីបទ«ក្បត់ជាតិ» នឹងត្រូវនាំយកទៅបង្ហាញក្រុមប្រឹក្សាសិទ្ធិមនុស្សនៅសប្ដាហ៍ក្រោយនេះ។
ក្នុងសេចក្ដីប្រកាសព័ត៌មាននៅថ្ងៃនេះ ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា (OHCHR) បានប្រកាសថា របាយការណ៍ស្ដីពីស្ថានភាពសិទ្ធិមនុស្សនៅកម្ពុជារបស់អគ្គលេខាធិការអង្គការសហប្រជាជាតិ លោក អង់តូនីញូ ហ្គុយទ័ររ៉េស (António Guterres) នឹងត្រូវនាំយកទៅបង្ហាញនៅក្រុមប្រឹក្សាសិទ្ធិមនុស្សនៅទីក្រុងហ្សឺណែវ នៅយប់ថ្ងៃចន្ទសប្ដាហ៍ក្រោយនេះ។
OHCHR បញ្ជាក់ថា របាយការណ៍ស្ដីពីសិទ្ធិមនុស្សកម្ពុជានោះ បង្ហាញពីការបង្ក្រាបខាងនយោបាយនិងលំហសេរីភាពពលរដ្ឋ ការគ្រប់គ្រងប្រព័ន្ធយុត្តិធម៌ និងសិទ្ធិខាងសង្គម និងសេដ្ឋកិច្ច។
តំណាងស្ថាប័ន UN ប្រចាំនៅកម្ពុជានេះ បានលើកឡើងថា ប្រមុខអង្គការសហប្រជាជាតិ នឹងលើកឡើងពីការចាប់ខ្លួនមនុស្សដែលពាក់ព័ន្ធនឹងគណបក្សសង្គ្រោះជាតិយ៉ាងតិច១៤០នាក់ ដែលត្រូវបានចាត់ទុកជាការបង្ក្រាបខាងនយោបាយកាន់តែធំឡើងនៅក្នុងប្រទេសកម្ពុជា។
ជាងនេះទៅទៀត លោក ហ្គុយទ័ររ៉េស គ្រោងលើកឡើងពីកង្វល់ជុំវិញការចាប់ខ្លួនមេដឹកនាំបក្សប្រឆាំងដ៏ធំនៅកម្ពុជា លោក កឹម សុខា ក្រោមការចោទប្រកាន់ពីបទ«ក្បត់ជាតិ» ដែលបទចោទនេះត្រូវបានគេជឿថា ជាប់ពាក់ព័ន្ធនឹងហេតុផលនយោបាយ និងឆ្លុះបញ្ចាំងឱ្យឃើញពីការប្រើប្រាស់ច្បាប់មិនត្រូវ សំដៅទៅលើគូប្រជែងនយោបាយនិងអ្នករិះគន់រដ្ឋាភិបាល។
លោក កឹម សុខា ត្រូវបានសមត្ថកិច្ចចាប់ខ្លួនកាលដើមខែកញ្ញា ឆ្នាំ២០១៧ ក្រោមការចោទប្រកាន់ពីបទ«ក្បត់ជាតិ» ហើយយកទៅដាក់ឃុំនៅពន្ធនាគារត្រពាំងផ្លុង ស្ថិតនៅជាប់ព្រំដែនកម្ពុជា-វៀតណាម រហូតដល់លោកត្រូវបានផ្ទេរមកដាក់ឃុំក្នុងផ្ទះនៅថ្ងៃទី១០ ខែកញ្ញា ឆ្នាំ២០១៨។ ក្រោយពីជាប់ឃុំក្នុងផ្ទះអស់រយៈពេលជាង១ឆ្នាំ មេបក្សប្រឆាំងរូបនេះត្រូវបានដោះលែងពីការឃុំខ្លួនក្នុងផ្ទះកាលពីខែវិច្ឆិកាឆ្នាំមុន។
ដំណើរការកាត់ក្ដីមេដឹកនាំបក្សប្រឆាំង ក្រោមបទចោទ«ក្បត់ជាតិ»នេះ ត្រូវបានចាប់ផ្ដើមកាលពីពាក់កណ្ដាលខែមករាក្នុងឆ្នាំនេះ មុននឹងត្រូវបានលើកពេលទៅវិញនៅខែមីនា ដោយសារតែក្ដីបារម្ភជុំវិញការរីករាលដាលនៃវីរុសកូរ៉ូណា។
អ្នកនាំពាក្យគណៈកម្មការសិទ្ធិមនុស្សកម្ពុជា លោក ជិន ម៉ាលីន បានប្រាប់ថា ការលើកឡើងរបស់តំណាង UN នៅកម្ពុជា អំពីការបង្ក្រាបខាងនយោបាយនេះ មិនឆ្លុះបញ្ចាំងពីការពិតនោះឡើយ ហើយលោកថា វាមានទំនោរទៅរកគណបក្សប្រឆាំងទៅវិញ។
រដ្ឋលេខាធិការក្រសួងយុត្តិធម៌រូបនេះ បានចោទសួរទៅវិញពីមូលហេតុដែលការបកស្រាយដោយភាគីរដ្ឋាភិបាល មិនត្រូវបានទទួលយកទៅពិចារណា ហើយបែរជាទទួលយករបាយការណ៍របស់ក្រុមម្ខាងដែលលោកហៅថា ក្រុមមាននិន្នាការប្រឆាំង។
លោក ជិន ម៉ាលីន ប្រាប់ថា៖ «អ្វីដែលជាចម្ងល់និងមន្ទិលសង្ស័យ គឺថាព័ត៌មាន ក៏ដូចជាការបកស្រាយ ការពន្យល់របស់រដ្ឋាភិបាលដែលមានមូលដ្ឋានច្បាប់រឹងមាំនិងច្បាស់លាស់ បែរជាមិនទទួលយកទៅពិចារណា តែបែរជាទទួលយកព័ត៌មានក្រុមម្ខាងទៀតដែលមាននិន្នាការប្រឆាំង ហើយមិនមានមូលដ្ឋានច្បាស់លាស់។ នេះជាមន្ទិលសង្ស័យ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ប្រាប់ថា មន្ត្រីរដ្ឋាភិបាលតែងតែច្រានចោលរបាយការណ៍របស់ UN ប្រចាំកម្ពុជា ដែលថា កម្ពុជានៅតែមានការរំលោភសិទ្ធិមនុស្ស រឹតត្បិតសេរីភាពបញ្ចេញមតិ និងជួបជុំជាដើម។
មន្ត្រីសិទ្ធិមនុស្សរូបនេះ បញ្ជាក់ថា បើរដ្ឋាភិបាលមិនសិក្សានិងពិចារណាលើរបាយការណ៍ទាំងនោះឱ្យបានគ្រប់ជ្រុងជ្រោយទេ នឹងធ្វើឱ្យលទ្ធិប្រជាធិបតេយ្យនៅកម្ពុជាដើរថយក្រោយ ហើយខាតប្រយោជន៍ផ្សេងៗជាដើម។
លោក អំ សំអាត ប្រាប់ថា៖ «បើសិនជាយើងនៅតែច្រានចោល ហើយមិនមានដំណោះស្រាយ ឬក៏ស្វែងរកចំណុចខ្វះខាតក្នុងការកែលម្អ វាអត់អាចចំណេញបានទេ វាអាចរងការរិះគន់បន្តទៀត ហើយចំណុចដដែលៗគេនៅតែលើកជាបន្តទៀត»៕