រដ្ឋាភិបាលកម្ពុជា ប្រកាសច្រានចោលរបាយការណ៍របស់អ្នកជំនាញសិទ្ធិមនុស្សអង្គការសហប្រជាជាតិដែលលើកឡើងថា អ្នកចូលរួមសកម្មភាពសិទ្ធិមនុស្សជាមួយស្ថាប័នរបស់ខ្លួន រងការគំរាមកំហែង បំភិតបំភ័យ និងសងសឹកពីអាជ្ញាធរកម្ពុជា។
ការច្រានចោលនេះបានធ្វើឡើងតាមរយៈសេចក្តីថ្លែងការណ៍របស់ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវ ចុះថ្ងៃទី៣០ ខែកញ្ញា។
សេចក្តីថ្លែងការណ៍នោះបានលើកឡើងថា កម្ពុជាមានការខកចិត្តយ៉ាងខ្លាំងចំពោះការផ្សព្វផ្សាយថ្មីៗនេះលើបណ្តាញសង្គមរបស់ការិយាល័យឧត្តមស្នងការអង្គការសហប្រជាតិទទួលបន្ទុកសិទ្ធិមនុស្សនៅកម្ពុជា។
សេចក្តីថ្លែងការណ៍នោះបានហៅរបាយការណ៍ផ្សព្វផ្សាយនោះថា បានដកស្រង់ព័ត៌មានតែមួយជ្រុង ខ្វះតុល្យភាព ធ្វើឱ្យចុះខ្សោយនូវសុចរិតភាព ឯករាជ្យភាព និងភាពទុកចិត្តបានរបស់ស្ថាប័នអង្គការសហប្រជាជាតិ។
នៅពីរថ្ងៃមុននេះ ការិយាល័យឧត្តមស្នងការអង្គការសហប្រជាជាតិ UNHRC បានលើកឡើងលើទំព័រហ្វេសប៊ុករបស់ខ្លួនថា នៅថ្ងៃទី៣០ ខែកញ្ញា អគ្គលេខាធិការអង្គការសហប្រជាជាតិ នឹងធ្វើបទបង្ហាញអំពីរបាយការណ៍ប្រចាំឆ្នាំ ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ ស្តីពី ការបំភិតបំភ័យនិងការសងសឹកប្រឆាំងនឹងអ្នកដែលបានសហការជាមួយអង្គការសហប្រជាជាតិ ក្នុងវិស័យសិទ្ធិមនុស្ស។
UNHRC លើកឡើងពីការកត់សម្គាល់ថា នៅខែសីហានិងខែវិច្ឆិកា ឆ្នាំ២០១៩ អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា បានទទួលរបាយការណ៍ជាច្រើនអំពីមន្ត្រីនគរបាលមូលដ្ឋានដែលមិនបានអញ្ជើញចូលរួមក្នុងវគ្គបណ្តុះបណ្តាលឬការប្រជុំមួយចំនួនដែលរៀបចំដោយសង្គមស៊ីវិលនិងពលរដ្ឋ ដោយអាជ្ញាធរទាំងនោះបានទៅថតរូបនិងសាកសួរព័ត៌មាន ព្រមទាំងសួររកលិខិតអនុញ្ញាត។
របាយការណ៍បន្តថា នៅថ្ងៃបន្ទាប់ មន្ត្រីនគរបាលបានមកទាមទារព័ត៌មានលម្អិតអំពីសកម្មភាពនិងឈ្មោះអ្នកចូលរួមពីអង្គការ។
ប៉ុន្តែស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិ និយាយក្នុងសេចក្តីថ្លែងការណ៍នោះថា វត្តមានរបស់មន្ត្រីនគរបាលនៅក្បែរទីកន្លែងរៀបចំព្រឹត្តិការណ៍ផ្សេងៗ មិនមែនជាការគំរាមកំហែង បំភិតបំភ័យ ឬរំខាននោះទេ តែថា វាជាភារកិច្ចដើម្បីបង្ការភាពចលាចលឬអសន្តិសុខនានាដែលអាចកើតឡើងជាយថាហេតុ។
សេចក្តីថ្លែងការណ៍បន្តថា៖ «កម្ពុជាសូមបញ្ជាក់ជាថ្មីនូវការប្តេជ្ញាចិត្តក្នុងការដោះស្រាយរាល់បញ្ហាប្រឈមនានាដែលអង្គការសង្គមស៊ីវិលជួបប្រទះ តាមរយៈយន្តការជាតិនិងថ្នាក់ក្រោមជាតិ ដែលមានស្រាប់ រួមទាំងវេទិកាភាពជាដៃគូដែលបានរៀបចំជាទៀងទាត់»។
ប្រធានផ្នែកសិទ្ធិមនុស្សនិងដីធ្លីនៅសមាគមការពារសិទ្ធិមនុស្សអាដហុក លោក នី សុខា មានប្រសាសន៍ថា មិនមែនជារឿងចម្លែកទេដែលរដ្ឋាភិបាលកម្ពុជាច្រានចោលពាក់ព័ន្ធទៅនឹងការរកឃើញពីការគំរាមកំហែងសិទ្ធិមនុស្ស ព្រោះកន្លងមក រដ្ឋាភិបាលក៏មិនទទួលស្គាល់លើបញ្ហានេះដែរ រហូតដល់សហគមន៍អឺរ៉ុបបានប្រកាសដកប្រព័ន្ធអនុគ្រោះពន្ធ EBA ២០ភាគរយ។
អ្នកឃ្លាំមើលសិទ្ធិមនុស្សរូបនេះអះអាងថា អ្វីដែលអ្នកជំនាញសិទ្ធិមនុស្សអន្តរជាតិរកឃើញករណីគំរាមកំហែងនិងបំភិតបំភ័យអ្នកចូលរួមសកម្មភាពសិទ្ធិមនុស្សនេះ ជាចំនួនតិចតួចបំផុត បើប្រៀបធៀបនឹងការរកឃើញរបស់សមាគមអាដហុក។
លោកថា៖ «យើងមានរបាយការណ៍គ្រប់គ្រាន់ […] គ្រាន់តែយើងសុំមិនបញ្ចេញឈ្មោះទេ តែបើរដ្ឋាភិបាលចង់ដឹងអាហ្នឹង យើងអាចសហការផ្តល់ព័ត៌មានជូនបាន»។
សាស្ត្រាចារ្យវិទ្យាសាស្ត្រនយោបាយ លោក ឯក សុវណ្ណរ៉ា និយាយថា ការបង្ហាញទស្សនៈផ្សេងគ្នារវាងរដ្ឋាភិបាលនិងអង្គការក្រៅរដ្ឋាភិបាលពីស្ថានភាពសិទ្ធិមនុស្សនៅកម្ពុជានេះ អាចមកពីពួកគេឱ្យតម្លៃខុសគ្នាទៅលើគោលការណ៍ជាមូលដ្ឋានស្តីពីសិទ្ធិជាសកលរបស់អង្គការសហប្រជាជាតិ។ ប៉ុន្តែលោកថា បញ្ហានេះកំពុងជំរុញកម្ពុជាឱ្យខាតបង់។
លោកបានថ្លែងថា៖ «យន្តការដែលធ្វើឱ្យកម្ពុជាទទួលបានអត្ថប្រយោជន៍ទៅលើនយោបាយការបរទេសនិងទំនាក់ទំនងពាណិជ្ជកម្មបរទេសនេះ គឺអាស្រ័យលើរដ្ឋាភិបាលកម្ពុជាឆ្លើយតបទៅនឹងការលើកឡើងរបស់សហគមន៍អន្តរជាតិ ជាពិសេសសំដៅលើសហរដ្ឋអាមេរិកនិងសហភាពអឺរ៉ុប»។
សហភាពអឺរ៉ុប អំឡុងខែសីហា បានសម្រេចដកប្រព័ន្ធអនុគ្រោះពន្ធ EBA ២០ភាគរយពីកម្ពុជា ក្រោមហេតុផលថា រដ្ឋាភិបាលកម្ពុជាបានធ្វើឱ្យលំហប្រជាធិបតេយ្យរួមតូច។
ចំណែកសហរដ្ឋអាមេរិកក៏បានដាក់ទណ្ឌកម្មលើមន្ត្រីជាន់ខ្ពស់នៅកម្ពុជាមួយចំនួនផងដែរ ក្រោមហេតុផលពាក់ព័ន្ធនឹងសិទ្ធិមនុស្សដូចគ្នានេះ ក្រោយពីអតីតគណបក្សប្រឆាំងដែលមានអ្នកគាំទ្រជាង៤០ភាគរយ ត្រូវបានផាត់ចេញពីការធ្វើនយោបាយ៕
