សមត្ថកិច្ចខេត្តកោះកុង បានឃាត់ខ្លួនប្រជាពលរដ្ឋចំនួន៤នាក់ ដើម្បីសួរនាំជាង១០ម៉ោង ខណៈដែលពលរដ្ឋទាំងនោះរួមជាមួយពលរដ្ឋផ្សេងទៀត បានបោះតង់តវ៉ាទាមទាររកដំណោះស្រាយរឿងដីធ្លី នៅមុខសាលាខេត្ត។
អ្នកស្រី ឆៃ គឹមធុច អះអាងជាពលរដ្ឋរងគ្រោះដីធ្លី និងឃើញហេតុការណ៍នេះ ប្រាប់វីអូឌីថា ចាប់តាំងពីថ្ងៃចន្ទដើមសប្តាហ៍នេះ ពលរដ្ឋប្រមាណ ៦០នាក់ បាននាំគ្នាបោះតង់នៅមុខសាលាខេត្ត រងចាំដំណោះស្រាយរឿងដីធ្លីរបស់ពួកគាត់ជាមួយក្រុមហ៊ុនចិន ញូញៀន (Union Development Group ឬ UDG) ពីសំណាក់អាជ្ញាធរ។
អ្នកស្រីបន្តថា ក្នុងការតវ៉ានោះ សមត្ថកិច្ចខេត្តកោះកុងប្រមាណជិត១០០នាក់ បានចុះទៅរុះរើតង់ និងឃាត់ខ្លួនពលរដ្ឋ៤នាក់ នៅម៉ោងប្រមាណ ២កន្លះទៀបភ្លឺ ប៉ុន្តែបានដោះលែងវិញនៅម៉ោង៣កន្លះរសៀលថ្ងៃពុធនេះក្រោយសួរនាំជាង១០ម៉ោង។
អ្នកស្រី ឱ្យដឹងថា ពលរដ្ឋទាំង៤នាក់ ដែលសមត្ថកិច្ចចាប់ខ្លួនទាំងកណ្តាលយប់នោះ រួមមាន អ្នកស្រី ព្រាប រដ្ឋា ជាតំណាងពលរដ្ឋ, អ្នកស្រី ព្រំ គង់, លោក សុខ ពេជ្រ និងម្នាក់ទៀតឈ្មោះ ថាវ ។
អ្នកស្រី ឆៃ គឹមធុច បញ្ជាក់ថា៖ «អាជ្ញាធរមកស្ងាត់ៗ មកក្តោបយកក្នុងតង់តែម្តងនៅម៉ោង២ជាង ដែលមនុស្សកំពុងតែដេកលង់លក់។ អាជ្ញាធរធ្វើនេះដូចជាចោរប្លន់ ដល់ពេលអីចឹងធ្វើឱ្យពួកខ្ញុំរឹតតែឈឺចាប់ នាំគ្នាយំស្រែកទាមទារឱ្យដោះលែងម្ចាស់ដីវិញ។ ពួកខ្ញុំជាម្ចាស់ដី អាជ្ញាធរមិនគិតខំដោះស្រាយឱ្យពួកខ្ញុំទេគិតចាប់ម្ចាស់ដីដាក់គុកដាក់ច្រវ៉ាក់ទៅវិញ»។
អ្នកស្រី សាំង ពុយ អះអាងជាតំណាងពលរដ្ឋមានជម្លោះដីធ្លីនៅឃុំកោះស្តេច និយាយថា ក្រៅពីការចាប់ខ្លួនពលរដ្ឋទាំង ៤នាក់នោះ សមត្ថកិច្ចក៏បានរុះរើយកតង់របស់ពលរដ្ឋ មិនឱ្យសម្រាកតវ៉ាមុខសាលាខេត្តទៀត។
អ្នកស្រីបន្តថា៖ «មិនគួរសម្ថកិច្ចខេត្តកោះកុង ធ្វើបែបហ្នឹងដាក់ពលរដ្ឋទេ។ ខ្ញុំគិតថា វាអយុត្តិធម៌ និងរំលោភសិទ្ធិ ពួកយើងណាស់ គេរំលោភយកដីធ្លីហើយ គេចាប់ចងយើងជាម្ចាស់ដីថែមទៀត។ អាជ្ញាធរគួរណាតែរកវិធីដោះស្រាយដីធ្លីជូនពលរដ្ឋ មិនគួរណាធ្វើបែបនេះទេ»។
អភិបាលរងខេត្តកោះកុង លោក សុខ សុទ្ធី មានប្រសាសន៍ថា អាជ្ញាធរមិនចាប់ឬឃាត់ខ្លួនពលរដ្ឋ៤នាក់នោះទេ គឺគ្រាន់តែចាត់វិធានការរដ្ឋបាល ដោយហៅទៅសួរនាំ ដើម្បីរក្សាសណ្តាប់ធ្នាប់ ពេលថ្នាក់ដឹកនាំធ្វើដំណើរឆ្លងកាត់ទីនោះតែប៉ុណ្ណោះ។
លោកបន្ថែមថា៖«ដើម្បីរក្សាសណ្តាប់ធ្នាប់ គេហៅគាត់ទៅធ្វើវិធានរដ្ឋបាល សួរនាំដើម្បីធ្វើកំណត់ហេតុថា តើមកធ្វើអីមានបំណងអីឱ្យពិតប្រាកដ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន យល់ថា ការឃាត់ខ្លួនពលរដ្ឋពីសំណាក់អាជ្ញាធរនេះ ជាការគំរាមកំហែង និងរំលោភសិទ្ធិពលរដ្ឋក្នុងការប្រមូលផ្តុំតវ៉ាដោយសន្តិវិធី ដែលមានចែងក្នុងរដ្ឋធម្មនុញ្ញ និងកត្តាសញ្ញាស្តីពីសិទ្ធផ្សេងៗ។
លោកបន្ថែមថា៖ «ករណីនេះ គឺជាការរំលោភសិទ្ធិមនុស្សមួយយ៉ាងធ្ងន់ធ្ងរ ទៅលើប្រជាពលរដ្ឋដែលបានរងគ្រោះដីធ្លី។ ពលរដ្ឋគាត់ត្រូវបានរងគ្រោះបាត់បង់ដីធ្លីហើយ នៅពេលពួកគាត់មកតវ៉ាហ្នឹង គាត់ត្រូវបានរងគ្រោះមួយតង់ទៀត ដោយចំណាត់ការរបស់អាជ្ញាធរថែមទៀត អីចឹងអាជ្ញាធរខេត្តគួរពិនិត្យឡើងវិញថា តើចំណាត់ការរបស់ខ្លួនហ្នឹងធ្វើត្រឹមត្រូវតាមច្បាប់ឬអត់»។
គួររំលឹកថា ពលរដ្ឋប្រមាណ៦០នាក់ ដែលអះអាងថា កំពុងមានជម្លោះដីធ្លីជាមួយក្រុមហ៊ុនចិន ញូញៀនបានប្រមូលផ្តុំគ្នាតវ៉ា និងបោះតង់ដេកមុខសាលាខេត្តកោះកុង តាំងពីថ្ងៃទី២៨ ខែកញ្ញាឆ្នាំ២០២០ ដោយសារជម្លោះដីធ្លីរបស់ពួកគេអូសបន្លាយរយៈពេល១២ឆ្នាំ មកហើយ នៅពុំទាន់មានដំណោះស្រាយពីអាជ្ញាធរ។
កាលពីដើមសប្តាហ៍នេះ អភិបាលខេត្តកោះកុង លោកស្រី មិថុនា ភូថង បានបញ្ជាក់ថា ជម្លោះដីធ្លីរវាងពលរដ្ឋ និងក្រុមហ៊ុនចិនញូញៀននេះ ក្រសួងរៀបចំដែនដី និងអាជ្ញាធរខេត្ត កំពុងដំណើរការសិក្សាបន្ថែមលើអត្តសញ្ញាណរបស់ប្រជាពលរដ្ឋ និងអត្តសញ្ញាណផ្សេងៗទៀត ដើម្បីឈានទៅរកការដោះស្រាយបញ្ចប់វិវាទ៕
